Dentro do labor de coordinación que se vén desenvolvendo no campo das publicacións dos distintos departamentos da Xunta de Galicia, parece conveniente estender esta coordinación a tódalas publicacións unitarias con menos de cincuenta páxinas, polo que cómpre incluí-los folletos, os carteis e as follas soltas, que ata agora quedaban exentos no apartado b da disposición adicional do Decreto 316/1990, dentro do ámbito de aplicación do decreto que regula as publicacións da Xunta de Galicia (DOG do 16 de xuño e corrección de erros: DOG do 6 de xullo).

Na súa virtude, por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do quince de xaneiro de mil novecentos noventa e oito,

DISPOÑO:

Artigo único.-A disposición adicional do Decreto 316/1990, do 8 de xuño, polo que se regulan as publicacións da Xunta de Galicia, quedará redactado do seguinte xeito:

«Disposición adicional

1. Quedan exentos do ámbito de aplicación deste decreto as publicacións periódicas.

2. Non obstante o disposto no número anterior, as consellerías presentaranlle ó Consello Coordinador de Publicacións a programación semestral das publicacións ás que fai referencia o número 1 desta disposición adicional, conforme co que se establece no artigo 2.b.».

Disposicións adicionais

Primeira.-Facúltase o conselleiro da Presidencia e Administración Pública para dicta-las disposicións

necesarias para a execución do disposto no presente decreto.

Segunda.-O presente decreto entrará en vigor o día seguinte ó da súa publicación no Diario Oficial de Galicia.

Santiago de Compostela, quince de xaneiro de mil novecentos noventa e oito.

Manuel Fraga Iribarne

Presidente

Dositeo Rodríguez Rodríguez

Conselleiro da Presidencia e Administración Pública