Visto o expediente do convenio colectivo para a empresa Chocogalicia, S.L., que tivo entrada nesta delegación provincial o día 5-9-1997, subscrito en representación da parte económica por unha representación da empresa, e da parte social, polo delegado de persoal, en data 18-6-1997, de conformidade co disposto no artigo 90.2º e 3º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta delegación provincial,
ACORDA:
Primeiro.-Ordena-la súa inscrición no libro de rexistro de convenios colectivos de traballo desta delegación provincial e a notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.
Terceiro.-Dispoñe-la súa publicación no Diario Oficial de Galicia.
Vigo, 12 de decembro de 1997.
Antonio Coello Bufill
Delegado provincial de Pontevedra
Convenio colectivo de Chocogalicia, S.L.
Artigo 1º.-Unidades de negociación.
A representación das partes que negociaron, aprobaron e subscribiron o texto deste convenio estivo constituída do seguinte xeito:
-Pola parte económica:
Alfonso J. Alonso Rodríguez, como administrador da empresa.
-Pola parte social:
José Mª López Durán, delegado de persoal.
Artigo 2º.-Ámbito de aplicación.
O presente convenio regulará as relacións laborais da empresa Chocogalicia, S.L. e afecta a todo o persoal pertencente actualmente ó cadro, así como ós traballadores que ingresen durante a súa vixencia.
Artigo 3º.-Vixencia. Denuncia.
O presente convenio terá unha vixencia de dous anos; entrará en vigor a partir do día 1 de xaneiro de 1997 e finalizará o día 31 de decembro de 1998. Prorrogarase tacitamente por períodos anuais, salvo denuncia de calquera das partes, con tres meses de anticipación, como mínimo, á data da súa terminación.
A dita denuncia deberase facer por escrito dirixido á outra parte afectada polo convenio.
Artigo 4º.-Compensación e absorción.
As melloras contidas neste convenio unicamente poderán ser absorbidas ou compensadas por aquelas melloras legais ou regulamentarias que no futuro se establezan, consideradas en cómputo global e anual.
Artigo 5º.-Xornada de traballo.
Establécese unha xornada laboral anual de 1.743,75 horas de traballo efectivo, distribuídas de luns a venres de 7.30 a 15.30 horas, cun descanso de 15 minutos para bocadillo a cargo da empresa.
Artigo 6º.-Horas extraordinarias.
Devengaranse horas extraordinarias cando as necesidades de traballo o requiran, como reparar sinistros e outros danos extraordinarios e urxentes, así como caso de risco de perda de materia prima ou productos terminados, por períodos punta de producción, ausencias imprevistas, cambios de quenda ou outras circunstancias de carácter estructural.
Artigo 7º.-Permisos retribuídos.
O traballador, avisado coa posible anticipación e xustificándoo adecuadamente, poderá faltar ó traballo, con dereito a remuneración, por algún dos motivos e durante o tempo que a seguir se expón:
a) Por matrimonio: 15 días naturais.
b) Por falecemento do cónxuxe, parella estable, pais ou fillos: 5 días naturais.
c) Por falecemento de irmáns, pais políticos, avós ou netos: 3 días naturais.
d) Por enfermidade grave do cónxuxe, parella estable, pais, fillos ou irmáns, e por nacemento de fillo: 3 días naturais.
Se cómpre o desprazamento a outras localidades nos casos c) e d), o permiso incrementarase un día.
Artigo 8º.-Vacacións.
Constarán de 30 días naturais, e para o seu desfrute poderase pacta-lo seu fraccionamento, de común acordo.
Polo menos un período de 15 días deberase desfrutar de xeito continuado.
Artigo 9º.-Salarios base.
Para o ano 1997 establécese un salario resultante de lles incrementar ós vixentes ata o 31-12-1996 cinco mil pesetas mensuais.
Os salarios así establecidos quedan reflectidos na táboa salarial que figura como anexo deste convenio,
que serán as bases de cómputo para as restantes percepcións de índole salarial.
Para 1998 establécense os salarios en función de incrementa-los de 1997 co índice de prezos previsto polo Goberno para 1998.
Artigo 10º.-Antigüidade.
Os traballadores ó servicio da empresa afectada polo presente convenio percibirán como premio de antigüidade dez trienios ó 6% do salario base de cada un deles. Para este efecto, computaranse os períodos de aprendizaxe.
O módulo para o cálculo e o aboamento do complemento persoal de antigüidade será o último salario base percibido polo traballador. Este premio quedará suxeito nos seus límites á normativa de rango superior que se puidese establecer.
O comezo do seu aboamento terá lugar desde o primeiro día do propio mes do seu cumprimento.
Se existise persoal fixo de campaña, desfrutará destes incrementos pero computándose cada 12 meses de campaña por un trienio.
Artigo 11º.-Pagas extraordinarias.
As gratificacións extraordinarias aboaranse nos meses de xullo e decembro e consistirán nunha mensualidade de salario base máis antigüidade cada unha delas.
Estas gratificacións faránselle efectivas ó traballador que ingresase no transcurso do ano ou cesase durante el, en proporción ó tempo traballado, para o cal, para os traballadores que teñan polo menos dous anos de antigüidade na empresa, a fracción do mes computarase como unidade completa.
Artigo 12º.-Participación en beneficios.
Con carácter de participación en beneficios, a empresa aboaralles ós seus traballadores unha gratificación equivalente a 30 días de salario base máis a antigüidade correspondente, o pagamento do cal se efectuará na segunda quincena de febreiro.
Esta gratificación percibiraa todo o persoal da empresa, incluídos aqueles que ingresen ou cesen nela durante o ano, os cales, cos eventuais ou interinos, a percibirán en proporción ó tempo traballado.
Artigo 13º.-Suplido de gastos de transporte.
Tódolos traballadores afectados polo presente convenio terán dereito á percepción dun plus de transporte na contía de 10.562 pesetas mensuais, descontándose a parte proporcional dos días de falta ó traballo mediante a seguinte fórmula:
10.562
---------------------------- x nº días de faltas
nº días laborables/mes
As cantidades percibidas por este concepto non terán a consideración de salario para ningún efecto, polo que non se computarán para o caso de antigüidade, gratificacións extraordinarias, vacacións, etc.
O persoal de vendas que realice a súa tarefa con vehículo propio, así recoñecido pola dirección, percibirá a cantidade compensatoria de 22 pesetas por quilómetro percorrido.
Artigo 14º.-Quebranto de moeda.
O persoal que habitualmente efectúa pagamentos e cobramentos de facturas percibirá por este concepto a cantidade de 12.768 pesetas mensuais.
Artigo 15º.-Novas categorías laborais.
Sereno: é o profesional contratado para efectua-las funcións propias de vixilancia. A súa contratación realizarase especificamente para realiza-la xornada nocturna, e o salario correspondente fíxase tendo en conta esta circunstancia.
Secretario de dirección: a súa función administrativa de asistencia á dirección comprenderá, ademais das delegacións de funcións desta, o labor de coordinación dos mandos intermedios e dirección, así como as actividades de representatividade e de relacións comerciais propias deste nivel xerárquico (asimilable a oficial de 1ª administrativo).
Caixeiro: o seu cometido é realizar cobramentos e pagamentos na fábrica, de acordo coas normas que sobre o particular ten establecidas a empresa ou que poida establecer, emanándolle as ordes do órgano superior administrativo. Deberá efectua-los apuntamentos de caixa e face-las anotacións nos libros auxiliares do movemento diario.
Degustador: é o profesional que efectúa a publicidade dos artigos da empresa nos establecementos comerciais onde se necesita efectua-la promoción deles.
Licenciado: é aquel traballador que, sendo licenciado por calquera das facultades dunha universidade, realiza o seu traballo precisamente relacionado coa súa titulación e en consonancia con ela.
Artigo 16º.-Enfermidade ou accidente.
Os traballadores que padezan enfermidade percibirán desde o primeiro día e durante o prazo de seis meses o complemento necesario para que, sumado ás prestacións da Seguridade Social, alcance o 100 por 100 do seu salario base máis antigüidade, nos casos seguintes:
a) En tódolos supostos que requiran hospitalización.
b) Nas enfermidades de máis de 20 días consecutivos de duración.
No caso de a incapacidade se derivar dun accidente de traballo, o prazo de seis meses ampliarase a un ano, aboándoselle ó 100% en tódolos supostos desde o primeiro día.
Os traballadores deberán presenta-los xustificantes médicos na oficina da empresa dentro dos prazos establecidos regulamentariamente.
Artigo 17º.-Xubilación anticipada.
De conformidade coa normativa vixente sobre a materia, e en atención ós posibles efectos que, para
palia-lo paro, puidese ter, os asinantes deste convenio acordan a posibilidade de xubilación ó cumpriren os 64 anos os traballadores que así o soliciten, comprometéndose a empresa á contratación simultánea de traballadores novos ou receptores do seguro de desemprego en número igual ó das xubilacións anticipadas que se pacten, con contrato de igual natureza que os que se substitúen.
Artigo 18º.-Equipo de protección persoal.
Os labores de limpeza que requiran calzado especial estarán dotados de dous pares de botas que se lle asignarán a cada operario/a por ano natural.
O persoal de fabricación será provisto de:
-2 uniformes (bata, mandís, cofias) ó ano, ó persoal feminino.
-2 fundas ó persoal masculino.
-Luvas especiais nos casos en que se requiran.
Artigo 19º.-Garantía ad personam.
As condicións pactadas neste convenio enténdense sempre con este carácter de mínimas, e deben ser respectadas as condicións de todo tipo que veñen desfrutando os traballadores en canto sexan máis beneficiosas que as aquí establecidas, consideradas estas en cómputo global e anual.
Artigo 20º.-Axuda por xubilación.
Ó se produci-la baixa na empresa por xubilación dun traballador con máis de vinte anos de servicio nela, recibirá desta o importe íntegro dunha mensualidade de salario real.
Artigo 21º.-Traballo nocturno.
Os traballadores que sexan contratados para traballaren na quenda de noite (de 22 horas pm a 6,00 horas am) percibirán a retribución que se pacte, coa excepción do sereno á que se refire o artigo 15º.
No caso de traballadores doutras quendas (xa sexa mañá ou tarde), cando a súa xornada habitual se cambie á quenda de noite, estes percibirán un incremento do 25% no seu salario base.
Artigo 22º.-Comisión paritaria.
Para a interpretación das cláusulas deste convenio, a comisión paritaria estará formada por dous representantes da empresa e dous representantes dos traballadores, entre os que estarán os compoñentes da comisión negociadora.
Vigo, 7 de xullo de 1997.
ANEXO
Táboa de salarios
Categorías Salario base mensual
Técnicos titulados: Licenciado 110.595 Perito 105.455
Técnicos non titulados: Encargado xeral 100.420
Categorías Salario base mensual
Mestre de fabricación 100.420
Administrativos: Xefe administrativo de 1ª 110.595 Xefe administrativo de 2ª 105.455 Técnicos de custos 95.251 Oficial de 1ª 95.251 Secretario de dirección 91.383 Oficial de 2ª 87.063 Caixeiro 87.063 Auxiliar 76.574
Persoal mercantil: Xefe de vendas 105.455 Viaxante e vendedor 85.636 Corredor de praza 81.889
Persoal de producción: Oficial de 1ª 86.905 Oficial de 2ª 83.579 Axudante 77.900 Formación maior de 18 anos 75.900
Subalternos: Almaceneiro 78.670 Cobrador 78.670 Basculador-pesador 78.670 Porteiro 78.670 Sereno 76.656 Persoal de limpeza 75.900 Ordenanza 75.900
Persoal de acabado, envasado e empaquetado: Oficial de 1ª 77.164 Oficial de 2ª 76.373 Axudante 76.373
Persoal de oficios auxiliares: Oficial de 1ª 86.905 Oficial de 2ª 83.580 Peón 75.900 Degustadora 85.636 Aprendiz, 17 47.497
10560
