A Escola Galega de Administración Pública organiza, en colaboración coa Asesoría Xurídica Xeral da Xunta de Galicia, unhas xornadas de estudio sobre procedemento administrativo sancionador, conforme as seguintes bases:

1. Obxectivos.

Realizar un estudio detallado da normativa en materia de sancións, tanto no aspecto substantivo do exercicio da potestade sancionadora, como no relativo ós trámites procedementais, vía de recurso e ulterior impugnacion xurisdiccional.

2. Contido.

Entre outros, desenvolveranse os seguintes temas:

-A potestade sancionadora da Administración.

-A potestade sancionadora en materia de sanidade, alimentación, saúde pública e defensa dos consumidores.

-A potestade sancionadora da Administración e a xurisprudencia do Tribunal Constitucional.

-Cuestións actuais do procedemento administrativo sancionador.

-Función pública e poder disciplinario do Estado.

-As infraccións e sancións en materia laboral.

3. Destinatarios.

Funcionarios da Administración de xustiza e da Administración estatal, autonómica e local; profesionais do dereito, docentes universitarios, xuristas e interesados en xeral.

4. Lugar e datas.

As xornadas convocadas terán lugar os días 4 e 5 de decembro no salón de actos da Escola Galega de Administración Pública, rúa de Madrid, 2-4, polígono das Fontiñas, en Santiago de Compostela.

A repetida actividade abrirase ás 9 horas do xoves, día 4 de decembro, e rematará ás 14 horas do venres día 5.

5. Inscrición.

-Prazo: remata o martes, día 2 de decembro de 1997.

-Lugar de presentación: no rexistro xeral da Escola Galega de Administración Pública (polígono das Fontiñas, rúa de Madrid, 2-4, 15707 Santiago de Compostela). Tfno. 54 60 40. Telefax 54 63 37.

-Forma: as solicitudes de inscrición faranse por escrito, no modelo oficial que figura ó final destas bases. Serán rexeitadas todas aquelas peticións que non reúnan o dito requisito.

As peticións de admisión poderanse enviar por correo ordinario ou por telefax ó número consignado.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión chamando, a partir do día 2 de decembro, por teléfono de 10 a 14.45 horas, ós seguintes números: (981) 54 62 39 ou (981) 54 60 40.

6. Certificación de asistencia.

Entregaráselles ó remate destas xornadas a aqueles asistentes que concorresen asiduamente a elas, e expresarase neste documento a natureza da actividade e as datas da súa realización.

Santiago de Compostela, 17 de novembro de 1997.

Domingo Bello Janeiro

Director da Escola Galega de Administración Pública

8606