O Concello de Calvos de Randín (Ourense), en sesión celebrada o día 12 de xullo de 1997, aprobou o proxecto de acceso á estrada de Randín a Vilar e na mesma sesión acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa. O concello remitiu a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Relacións Laborais o día 25 de setembro de 1997 baixo o número 13339.
Os bens nos que se concreta a declaración de urxente ocupación están determinados no expediente que se someteu á información pública.
A Dirección Xeral de Calidade Medioambiental e Urbanismo da Consellería de Política Territorial, Obras Públicas e Vivenda emitiu informe favorable. O dito informe tivo entrada no rexistro xeral da Consellería de Xustiza, Interior e Relacións Laborais o día 23 de outubro de 1997 baixo o número 15195.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque se trata de darlle prestación dun servicio básico á comunidade, cal é o acceso a núcleos de poboación considerado pola Lei reguladora de bases de réxime local como servicio mínimo obrigatorio para prestar por tódolos municipios, e ademais, con esta preténdese resolver un problema de comunicación defectuoso entre a vila de Randín e Vilar desconxestionando o tráfico do centro da vila de Randín e solucionar así os problemas de dificultade na circulación e molestias para os veciños.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día seis de novembro de mil novecentos noventa e sete,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Calvos de Randín (Ourense), para efectos de expropiación forzosa,
dos bens e dereitos concretados no expediente administrativo instruído para o efecto e necesarios para a execución das obras do proxecto de acceso á estrada de Randín a Vilar.
Santiago de Compostela, seis de novembro de mil novecentos noventa e sete.
Manuel Fraga Iribarne
Presidente
Jesús C. Palmou Lorenzo
Conselleiro de Xustiza, Interior e Relacións Laborais
8822