A reestructuración dos servicios centrais e periféricos da Consellería de Agricultura, Gandería e Montes e do Instituto Lácteo e Gandeiro de Galicia (ILGG), como consecuencia das modificacións das súas estructuras orgánicas producidas polo Decreto 388/1996, do 31 de outubro, así como a aprobación das relacións de postos de traballo da consellería e do dito organismo por acordo do Consello da Xunta de Galicia, na súa reunión do 30 de xullo de 1997, determinan a necesidade de que se clarifiquen os procedementos administrativos ata agora xestionados pola Dirección Xeral de Producción Agropecuaria e Industrias Agroalimentarias e servicios periféricos da consellería, que pasan a ser tramitados polos servicios centrais ou provinciais do Instituto Lácteo e Gandeiro de Galicia.
Así mesmo, a dita tramitación obriga ó efectivo traslado dos expedientes administrativos, cos antecedentes e soportes informáticos que así o requiran.
Por iso, en uso das facultades atribuídas nas disposicións adicional cuarta e derradeira primeira do Decreto 128/1996, do 14 de marzo, polo que se desenvolve a Lei 7/1994, de creación do ILGG e se establece a súa estructura orgánica, e derradeira segunda do Decreto 388/1996, do 31 de outubro,
DISPOÑO:
Artigo 1º
Tódolos expedientes administrativos referidos a materias da competencia do Instituto Lácteo e Gandeiro de Galicia que se viñan xestionando pola Dirección Xeral de Producción Agropecuaria e Industrias Agroalimentarias e servicios provinciais da Consellería de Agricultura, Gandería e Montes e que de seguido se relacionan, serán tramitados polos servicios centrais e provinciais do ILGG:
1.1. Primas gandeiras e axudas por superficies derivadas da aplicación da política agrícola común.
1.2. Dereitos de primas gandeiras.
1.3. Medidas e axudas sobre melloras estructurais e modernización das explotacións agrarias.
1.4. Indemnizacións compensatorias en zona desfavorecida.
1.5. Cesamento anticipado na actividade agraria.
1.6. Promoción de novas tecnoloxías en maquinaria e equipos agrarios.
1.7. Mellora e ordenación de superficies incultas ou infrautilizadas.
1.8. Axudas para o fomento de métodos de producción agrícola e gandeira compatibles coa protección do medio ambiente e conservación do espacio natural.
1.9. Xestión das cantidades de referencia de leite e productos lácteos.
1.10. Programas de mellora xenética.
1.11. Programas de mellora da eficacia dos sistemas productivos agrarios.
Artigo 2º
A tramitación dos expedientes polo ILGG incluirá, se é o caso, a autorización, execución e contabilización do pagamento das primas, indemnizacións ou subvencións, así como as actividades de inspección e control do cumprimento dos compromisos adquiridos polos seus beneficiarios.
Artigo 3º
Os expedientes administrativos referidos ás materias sinaladas no artigo 1º, xunto cos antecedentes e soportes informáticos necesarios, trasladaranse fisicamente ás dependencias dos servicios centrais ou provinciais do ILGG.
Disposición adicional
Os servicios da Consellería de Agricultura, Gandería e Montes continuarán prestándolle-lo apoio e colaboración adecuada ós interesados e ó Instituto Lácteo e Gandeiro de Galicia, nas materias que, de acordo coa presente orde, pasan a ser xestionadas polo dito instituto.
Disposición derradeira
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 4 de novembro de 1997.
Tomás Pérez Vidal
Conselleiro de Agricultura, Gandería e Montes
8031