A Consellería de Pesca, Marisqueo e Acuicultura establece indemnizacións por participación nas tarefas de busca, auxilio, salvamento e rescate no mar, co fin de contribuír a palia-los gastos e o lucro cesante daqueles profesionales do mar que, co espírito solidario que sempre os animou, colaboren nas devanditas tarefas baixo a dirección das autoridades competentes e no ámbito da Comunidade Autónoma de Galicia. Considerando o anterior,
DISPOÑO:
Artigo 1º.-Obxecto.
Establécense e regúlanse pola presente orde as indemnizacións por participación nas tarefas de busca, auxilio, salvamento e rescate no mar co fin de palia-los gastos e o lucro cesante dos profesionais do mar que colaboren nas devanditas tarefas, coa condición inescusable de que realicen a actividade baixo a dirección das autoridades competentes, autonómicas ou da Administración del Estado, e no ámbito da Comunidade Autónoma de Galicia.
Estas indemnizacións aboaranse con cargo á partida orzamentaria que determine a Lei de orzamentos xerais da Comunidade Autónoma de Galicia de cada ano e condicionadas, en todo caso, á existencia de crédito adecuado e suficiente.
No presente exercicio de 1997 outorgaranse con cargo á aplicación orzamentaria 12.03.612.B.470.0 -indemnizacións por participación en tarefas de rescate-.
Artigo 2º.-Beneficiarios.
Poderán ser beneficiarios destas indemnizacións os titulares das embarcacións da flota pesqueira artesanal e artesanal polivalente así como os auxiliares de acuicultura cun arqueo de ata 20 T.R.B., e incluídos no Rexistro de Buques da Comunidade Autónoma de Galicia os seus tripulantes e os mergulladores debidamente acreditados.
Artigo 3º.-Indemnizacións.
As indemnizacións terán os seguintes topes por día de participación:
a) Para o titular da embarcación: 2.500 pesetas por tonelada de rexistro bruto.
b) Para os tripulantes: 5.000 pesetas; se ben poderán acada-las 7.500 pesetas para o patrón e o motorista ou piloto.
c) Para os mergulladores, enrolados ou autorizados a saír nunha embarcación que participe na tarefa pola autoridade de Mariña, 7.500 pesetas.
Artigo 4º.-Solicitudes e documentación.
As solicitudes formularanse no modelo que figura como anexo I desta orde e presentaranse nas dele
gacións territoriais e comarcais da Consellería de Pesca, Marisqueo e Acuicultura ou en calquera dos lugares a que se refire o artigo 38 da Lei 30/1992, de 26 de novembro.
Á solicitude que inclúe a petición en conxunto das indemnizacións por embarcación, tripulantes e mergulladores enrolados ou autorizados nela acompañarase a seguinte documentación:
a) Copia da folla de asento actualizada do buque.
b) Relación de tripulantes da embarcación, coas súas categorías, e mergulladores enrolados ou autorizados nela, e que teñan participado nas tarefas de auxilio.
c) Copia dos documentos de identidade e NIF do titular da embarcación e dos tripulantes e mergulladores.
d) Certificación da autoridade de mariña relativa a:
-Días de participación nas tarefas de salvamento.
-Datos básicos da embarcación e do seu titular, e relación de tripulantes e mergulladores intervenientes nas operacións de salvamento.
Artigo 5º.-Prazo de presentación.
O prazo de presentación de solicitudes de indemnización serán de dous meses contados a partir do día seguinte ó fin da participación nas tarefas.
Artigo 6º.-Procedemento e resolución.
Se unha vez presentada a documentación á que se refire o artigo 4º da presente orde, esta non reúne os requisitos esixidos, as delegacións territoriais requirirán do interesado a emenda do defecto con a presentación da documentación preceptiva.
A documentación que reúna os requisitos establecidos será remitida pola delegación territorial á Dirección Xeral de Pesca e Industrias Pesqueiras que elevará proposta de resolución.
A solicitude será resolta polo conselleiro de Pesca, Marisqueo e Acuicultura.
A non resolución expresa no prazo de tres meses, contados dende a presentación da solicitude, determinará a súa denegación presunta quedando aberta a vía contencioso-administrativa.
Artigo 7º.-Cobramento de indemnización.
Para o cobramento da indemnización, o titular do buque deberán aporta-la seguinte documentación:
a) Acreditación de ter comunicada a resolución do conselleiro mediante a entrega dunha copia, a todos e cada un dos tripulantes e mergulladores participantes no salvamento.
b) Certificación de que o titular do buque se encontra ó corrente nas súas obrigas tributarias, sociais e coa Comunidade Autónoma.
c) Certificación da entidade bancaria, acreditativa da titularidade da conta na que se domicilia a axuda.
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 25 de setembro de 1997.
Juan Caamaño Cebreiro
Conselleiro de Pesca, Marisqueo e Acuicultura