O Instituto Galego de Promoción Económica, Igape, convoca probas de selección para cubri-las seguintes prazas:
a) 1 técnico medio fixo.
b) 1 técnico medio interino.
c) 1 auxiliar administrativo fixo, secretaria de dirección, con bos coñecementos de inglés.
d) 1 auxiliar administrativo fixo con bos coñecementos de inglés.
e) 1 auxiliar administrativo fixo.
f) 1 subalterno.
As retribucións de cada unha das prazas convocadas serán as seguintes:
Técnicos medios: máximo 3.093.992 ptas. brutas anuais.
Auxiliares administrativos: máximo 2.173.478 ptas. brutas anuais.
Secretaria de dirección: máximo 2.408.786 ptas. brutas anuais.
Subalterno: máximo 2.104.288 ptas. brutas anuais.
Requisitos xerais:
-Ter nacionalidade dun país membro da Unión Europea.
-Ter cumpridos os 18 anos de idade.
-Non padecer enfermidade ou defecto físico que impida desempeña-las funcións correspondentes.
-Non estar separado do servicio de ningunha Administración pública en virtude de expediente disciplinario, nin atoparse inhabilitado por sentencia firme para o exercicio de funcións públicas.
-Posuír e acredita-la titulación académica esixida (homologada polo Ministerio de Educación, no caso de títulos expedidos por un país que non sexa membro da Unión Europea).
Condicións específicas de cada praza:
A) e B) Técnicos medios.
Requisitos mínimos que deberán acreditarse:
-Titulación universitaria media ou superior.
-Experiencia mínima de ano e medio en posto similar.
Coñecementos necesarios para cubrir este posto:
-Coñecementos de procedemento administrativo en axudas e subvencións (estudio, concesión, seguimento e liquidación).
-Coñecementos de MS-OFFICE.
-Coñecementos do sistema público de axuda e incentivos ás Pemes (especialmente Igape, SODIGA, INESGA e BIC).
Valorarase:
-Coñecementos de idiomas.
C) e D) Auxiliar administrativo-secretaria de dirección e auxiliar administrativo con bos coñecemento de inglés.
Requisitos mínimos que deberán ser debidamente acreditados:
-Graduado escolar ou equivalente.
-Galego nivel perfeccionamento.
-Experiencia mínima de ano e medio en posto similar.
Coñecementos necesarios para cubrir este posto:
-Informática. Imprescindible o manexo de Word e Excel baixo contorno Windows.
-Igape/SODIGA/INESGA/BIC como instrumentos de apoio ó sistema productivo de Galicia.
-Coñecementos altos de inglés, falado e escrito.
-Estructura organizativa da Xunta de Galicia.
Valorarase:
-Coñecementos de francés e/ou alemán.
-Coñecementos doutras ferramentas informáticas.
E) Auxiliar administrativo.
Requisitos mínimos que deberán ser debidamente acreditados:
-Graduado escolar ou equivalente.
-Experiencia mínima de ano e medio en posto similar.
-Galego nivel perfeccionamento.
Coñecementos necesarios para cubrir este posto:
-Informática. Imprescindible o manexo de Word e Excel baixo contorno Windows.
-Igape/SODIGA/INESGA/BIC como instrumentos de apoio ó sistema productivo de Galicia.
-Estructura organizativa da Xunta de Galicia.
Valorarase:
-Coñecementos de inglés, francés e/ou alemán.
-Coñecementos doutras ferramentas informáticas.
F) Subalterno (información e rexistro):
Requisitos mínimos que deberán ser debidamente acreditados:
-Graduado escolar ou equivalente.
-Experiencia mínima de ano e medio.
Coñecementos necesarios para cubrir este posto:
-Coñecementos de informática en contorno Windows.
-Bos coñecementos de galego.
-Igape como instrumento de apoio ó sistema productivo de Galicia.
- Estructura organizativa da Xunta de Galicia.
Valorarase:
-Experiencia en postos de atención ó público.
Documentación que hai que presentar:
-Fotocopia do DNI.
-Fotografía tamaño carné.
-Documentación orixinal ou fotocopia compulsada que acredite a titulación, formación e experiencia esixidas, así como a formación e/ou experiencia que desexe achegar para ser valorada. Acreditarase a experiencia con historial completo da Seguridade Social ou certificado de empresa.
-Currículum vitae demostrable.
Lugar e prazo de presentación:
-As solicitudes presentaranse en calquera das oficinas do Igape.
-O prazo de presentación será de 15 días naturais contados a partir do día seguinte ó da publicación deste anuncio.
Proceso de selección:
1. Expirado o prazo de presentación de solicitudes, o comité de selección publicará as listas previas de admitidos e excluídos ó proceso de selección, coa motivación da exclusión, se é o caso, establecéndose un prazo de 5 días hábiles para, por petición do interesado, reparar calquera erro que sexa emendable. Esgotado este prazo, publicaranse as listas definitivas de admitidos e excluídos ó proceso de selección, incluíndo lugar e data en que comezarán as probas, ás que deberán asisti-los candidatos provistos do DNI. Estas listas serán publicadas nos taboleiros de anuncios do Igape.
2. As probas de selección consistirán nunha proba teórico-práctica e entrevista persoal.
a) Proba teórico-práctica. Versará sobre os coñecementos e demais requisitos esixidos na convocatoria para cubrir este posto, que haberá que superar para pasar á entrevista persoal.
A proba teórico-práctica poderá realizarse nunha ou dúas fases, por criterio do comité de selección; neste último caso, soamente pasarán á entrevista persoal aqueles candidatos que superasen as dúas fases de proba.
Unha vez corrixida a proba teórico-práctica, o comité de selección publicará no taboleiro de anuncios do Igape a lista de aprobados e suspensos, e incluirá o lugar e data en que se realizarán as entrevistas persoais.
b) Entrevista persoal. Avaliaranse os coñecementos do candidato, ademais da adecuación deste ó posto de traballo.
3. Unha vez rematado todo o proceso anterior, o comité de selección publicará o nome das persoas seleccionadas no taboleiro de anuncios do Igape, facendo consta-la data de ingreso, así como a documentación complementaria que deberán achegar para formaliza-lo contrato.
Santiago de Compostela, 30 de setembro de 1997.
Diego Diz Fernández
Director xeral do Instituto Galego de Promoción Económica
7505
