As confrarías de pescadores son corporacións de dereito público, dotadas de personalidade xurídica e capacidade de obrar para o cumprimento dos fins e o exercicio das funcións que lles están encomendadas, que actúan como órganos de consulta e colaboración coa Administración na promoción do sector pesqueiro.
Co fin de acada-los devanditos obxectivos de consulta e de colaboración, a disposición transitoria 5ª da Lei 4/1988, do 26 de maio, reguladora da función pública de Galicia e o Decreto 109/1989, do 1 de xuño, adscribiron á Consellería de Pesca, Marisqueo e Acuicultura, unha escala específica para a realización das funcións encomendadas a estas.
Neste sentido, o artigo 8 da Lei 9/1993, do 8 de xullo, de confrarías de pescadores establece que as confrarías de pescadores contarán con persoal funcionario da Xunta de Galicia, e á súa fronte estará o secretario. O secretario é un posto esencial dentro da estructura da confraría polo que resulta necesario articular un sistema de cobertura da dita praza.
Por todo o exposto, por iniciativa do conselleiro de Pesca, Marisqueo e Acuicultura e por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do día un de outubro de mil novecentos noventa e sete,
DISPOÑO:
Artigo único.-En tanto non se desenvolva regulamentariamente o artigo 8 a) da Lei de confrarías de pescadores, poderán asumi-las funcións de secretario os funcionarios do grupo D da escala de confrarías de pescadores, coas atribucións establecidas no artigo 3 da Lei de confrarías de pescadores.
Disposicións derradeiras
Primeira.-O conselleiro de Pesca, Marisqueo e Acuicultura poderá dictar cantas disposicións considere convenientes en desenvolvemento deste decreto.
Segunda.-O presente decreto entrará en vigor o día seguinte ó da súa publicación no Diario Oficial de Galicia.
Santiago de Compostela, un de outubro de mil novecentos noventa e sete.
Manuel Fraga Iribarne
Presidente
Dositeo Rodríguez Rodríguez
Conselleiro da Presidencia e Administración Pública
7642