A Lei orgánica 1/1990, do 3 de outubro, de ordenación xeral do sistema educativo establece no título III, artigo 52, que as persoas adultas que desexen adquiri-los coñecementos equivalentes á educación básica contarán cunha oferta adaptada ás súas condicións e necesidades.
A Lei 9/1992, do 24 de xullo, de educación e promoción de adultos da Comunidade Autónoma de Galicia, establece no título I, artigo 2º, os campos fundamentais de actuación da educación e promoción de adultos definindo a formación básica como aprendizaxe complementaria dunha instrucción deficiente en atención ás esixencias da sociedade actual.
Para o logro dos obxectivos establecidos nas referidas leis, a Consellería de Educación e Ordenación Universitaria dictou a Orde do 26 de maio de 1997 (DOG do 15 de xullo) pola que se regula o ensino básico para as persoas adultas. O dito ensino organízase en tres niveis, correspondéndolles o nivel I e o nivel II ás ensinanzas básicas iniciais e o nivel III ás ensinanzas conducentes á obtención do título de graduado en educación secundaria.
Así mesmo, en aplicación do Real decreto 1487/1994, do 1 de xullo (BOE do 28), polo que se modifica e completa o Real decreto 986/1991, do 14 de xuño, polo que se aproba o calendario de aplicación da nova ordenación do sistema educativo, durante o curso 1997-1998 deixarán de impartirse as ensinanzas correspondentes ó curso oitavo da educación xeral básica.
Ó abeiro dos citados preceptos, a presente orde pretende posibilita-la implantación da ensinanzas básicas iniciais de nivel I e nivel II nos centros e aulas de educación das persoas adultas.
En consecuencia e en uso das competencias que esta consellería ten en materia de planificación, regulación e administración do ensino regrado,
DISPOÑO:
Primeiro.-Os centros docentes públicos e privados de educación das persoas adultas e as aulas de educación das persoas adultas en centros docentes públicos e privados ordinarios autorizados para imparti-las ensinanzas de educación de adultos equivalentes ó nivel de educación xeral básica quedan autorizados para imparti-las ensinanzas iniciais de nivel I e nivel II do ensino básico para as persoas adultas regulados na Orde do 26 de maio de 1997.
Segundo.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 18 de xullo de 1997.
Celso Currás Fernández
Conselleiro de Educación e Ordenación
Universitaria
5992