Por resolución da Dirección Xeral de Recursos Humanos do Servicio Galego de Saúde do 8 de abril de 1996 (DOG nº 74, do 16 de abril), convocouse concurso-oposición para o ingreso nas categorías incluídas na oferta pública de emprego para o ano 1995 do persoal laboral do Complexo Hospitalario Santa Mª Madre-Dr. Cabaleiro Goás de Ourense. De conformidade co apartado 5 da base sexta A), unha vez realizados os distintos exercicios da fase de oposición, correspóndelles ós tribunais establece-los criterios de corrección deles e decidir baseándose nisto os aspirantes que os superan ou que resultan eliminados.

Así mesmo, de conformidade co apartado 13 da base sexta A) da dita convocatoria, de oficio ou con base nas reclamacións presentadas, os tribunais poderán anular algunha ou algunhas preguntas dun exercicio, substituíndoas polas correspondentes preguntas de reserva.

Adoptado acordo polos respectivos tribunais sobre a anulación, se é o caso, de preguntas do segundo exercicio da fase de oposición e sobre a publicación das puntuacións outorgadas ós aspirantes neste segundo exercicio, de conformidade co disposto nos apartados 12 e 13 da base sexta A) da citada convocatoria, procede agora darlle publicidade no Diario Oficial de Galicia, amais de expoñe-los listados correspondentes nos taboleiros de anuncios do dito complexo hospitalario, nos servicios centrais da Consellería de Sanidade e Servicios Sociais, nos da Dirección Xeral de Recursos Humanos do Servicio Galego de Saúde, nos das delegacións provinciais da Consellería de Sanidade e Servicios Sociais e nos das direccións provinciais do Servicio Galego de Saúde, facultándose para isto expresamente a esta Dirección Xeral de Recursos Humanos do Servicio Galego de Saúde, polo que,

RESOLVO:

Primeiro.-Anula-las preguntas do segundo exercicio da fase de oposición das seguintes categorías:

-Grupo xestión da función administrativa: pregunta nº 28 que será substituída pola pregunta reserva nº 76.

-Telefonista: pregunta nº 34, que é substituída pola pregunta reserva nº 51.

Segundo.-Declarar aptos a todos aqueles aspirantes que obtivesen no segundo exercicio da fase de oposición, na respectiva categoría, unha puntuación igual ou superior a seguinte:

ATS: 20.

Xestión da función administrativa: 22,50.

Traballador social: 22,50.

TEL: 15,60.

TER: 24,75.

Auxiliar de enfermería: 40,50.

Auxiliar administrativo: 75,60.

Telefonista: 15.

Celador: 23,25.

Operario: 12,90.

Terceiro.-Declarar expresamente excluídos do concurso-oposición a todos aqueles aspirantes que non acadasen a dita puntuación na respectiva categoría.

Cuarto.-Contra a presente resolución poderá presentarse polos interesados reclamación perante o tribunal no prazo de dez días naturais, contados a partir do día seguinte ó da súa publicación no Diario Oficial de Galicia.

Santiago de Compostela, 23 de maio de 1997.

Valeriano Martínez García

Director xeral de Recursos Humanos

4161