Co obxecto de reconducir e unificar tódolos procesos recadatorios ó sistema previsto polo Regulamento xeral de recadación para os ingresos a través de entidades colaboradoras na recadación, formúlase, como primeira medida, a necesidade de introducir no modelo actual de recadación de taxas e prezos os cambios que o fagan posible.
Por isto, facendo uso das facultades conferidas pola disposición adicional do Decreto 172/1992, do 26 de xuño, polo que se establecen as normas para a xestión, liquidación e recadación das taxas e prezos públicos da Comunidade Autónoma,
DISPOÑO:
Artigo 1º
Modificación do artigo 2º da Orde do 29 de xuño de 1994, pola que se regula o procedemento de recadación voluntaria de taxas e prezos da Comunidade Autónoma de Galicia.
O artigo 2º queda redactado como segue:
Artigo 2º
Os ingresos realizaranse nas contas restrinxidas abertas nas entidades colaboradoras autorizadas na xestión recadatoria dos tributos cedidos, titulada: «Tesouro Facenda Pública Galega-Conta restrinxida de colaboración na recadación da Delegación Territorial da Consellería de Economía e Facenda de..., para declaracións-liquidacións».
Artigo 2º
Modificación do artigo 7º da Orde do 29 de xuño de 1994.
O artigo 7º queda redactado como segue:
Artigo 7º
As entidades colaboradoras, nos prazos previstos no Regulamento xeral de recadación, é dicir, dentro dos sete días hábiles seguintes á fin de cada quincena, ingresarán, mediante cheque nominativo cruzado a prol do Tesouro público de Galicia, o recadado cada quincena polo concepto de taxas e prezos. O ingreso instrumentarase co mandamento de ingreso TP01, debendo efectuarse perante o servicio de recadación da propia delegación territorial da Consellería de Economía e Facenda.
Cada quincena comprenderá desde a fin da anterior ata o día 5 ou 20 seguinte ou ata o inmediato hábil posterior, se o 5 ou 20 son inhábiles. Para tales efectos, serán considerados días inhábiles os sábados.
Calquera que sexa o número de días hábiles, o ingreso na conta do Tesouro público deberá producirse no mesmo mes no que finaliza a quincena correspondente.
Artigo 3º
Modificación do artigo 8º da Orde do 29 de xuño de 1994.
O artigo 8º queda redactado como segue:
Artigo 8º.-Presentación dos ingresos mediante soporte magnético.
8.1. Ó mesmo tempo que se produce o ingreso, as entidades colaboradoras presentarán, en soporte magnético, perante o Servicio Central de Recadación da Dirección Xeral de Tributos, a información centralizada dos ingresos xerados en cada quincena, acompañado do anexo VIII sobre saldos ingresados por cada unha das delegacións territoriais.
O Servicio Central de Recadación estampará data e sinatura no exemplar do anexo VIII destinado á entidade colaboradora, e que servirá a esta como xustificante da entrega do soporte.
8.2. O soporte magnético axustarase ás especificacións técnicas establecidas no anexo V.
Co fin de que a información achegada polas entidades sexa incorporada correctamente ás correspondentes bases de datos, efectuarase un proceso de validación do soporte magnético polo Servicio Central de Recadación no que se verificará:
a) Que as características do soporte se axustan ás especificacións sinaladas no anexo V.
b) Que o total dos ingresos incluídos no soporte magnético coincide co importe ingresado segundo os mandamentos de ingreso e cos que figuran no anexo VIII de saldos.
Concluído o proceso de validación do soporte magnético e dependendo do seu resultado, procederase a:
a) A aceptación total do soporte, cando no proceso de validación non apareza ningún tipo de incidencia ou erro.
b) O rexeitamento do soporte magnético cando no proceso de validación se detecten erros.
O Servicio Central de Recadación comunicaralle á entidade financeira cando pode proceder a retira-lo soporte para a súa corrección.
O prazo para emenda-los erros detectados será como máximo de dous días hábiles desde que sexa requirida.
Artigo 4º
Suprímese o artigo 9º da Orde do 29 de xuño de 1994.
Disposición adicional
Modifícase o anexo V da Orde do 29 de xuño de 1994 polo que figura no anexo II da presente orde.
Apróbase o anexo VIII daquela orde co texto que figura no anexo I da presente.
Disposición transitoria
Para efectos do previsto nesta orde e tendo en conta a data da súa entrada en vigor, a primeira quincena á que é de aplicación abarcará o período comprendido entre o día 1 e 5 do mes.
Disposición derradeira
Esta orde entrará en vigor o día 1 de maio de 1997.
Santiago de Compostela, 2 de abril de 1997.
José Antonio Orza Fernández
Conselleiro de Economía e Facenda
ANEXO II
Transferencia de entidades colaboradoras
a servicios centrais
Descrición da información.
A información que se transferirá consistirá nunha lista que detalle cada ingreso tramitado durante o mes correspondente, especificando os seguintes datos:
-Código do formulario de ingreso.
-Orixe do ingreso: código da consellería, servicio e delegación.
-Suxeito pasivo: DNI ou CIF e nome.
-Entidade tramitadora: códigos de entidade bancaria e sucursal.
-Código de taxa.
-Data.
-Importe ingresado.
Convenios de transferencia.
A continuación establécense algúns convenios para a transferencia.
Codificación:
Os códigos de consellería, servicio, delegación e taxa serán os facilitados pola Consellería de Economía e Facenda.
Soporte magnético:
Para transferir tal información existen dúas posibilidades:
* Un ou máis disquetes de 3,5 pulgadas e alta densidade, formateados para IBM PC; cada un deles conterá un único ficheiro ASCII con rexistros de lonxitude
fixa. O nome do ficheiro será
* Unha cinta de 1.200/2.440 pés, 9 pistas, 1.600 a 6.250 bpi, en EBCDIC, sen etiqueta e bloques de 10 rexistros con formato idéntico ó especificado para disquete.
Formato de ficheiro
Os campos de ficheiro serán os seguintes:
Nome Lonxitude Comentarios
CÓDIGO 9 Código do ingreso CON 2 Código da consellería SVC 2 Código de servicio DEL 2 Código de delegación DNI 10 DNI do suxeito pasivo NOME 50 Nome e apelidos do suxeito pasivo BAN 4 Código da entidade colaboradora SUC 4 Código de sucursal TAXA 6 Código de taxa DATA 8 Data do ingreso AAAAMMDD IMPORTE 10 Importe sen decimais
2882
