A necesidade de mellora-los viños galegos obriga a dispoñer de viñedos constituídos por variedades de calidade adecuada, e en atención a aquelas explotacións que polas súas condicións de dimensións lles é difícil acollerse a plans de mellora de carácter integral e que constitúen a gran maioría dos viticultores galegos, é preciso arbitrar unha liña de axuda que cubra estas necesidades.
En consecuencia, de acordo co disposto no artigo 30ª 1.3. do Estatuto de autonomía de Galicia e en
uso das competencias que me confire a Lei 1/1993, reguladora da Xunta e do seu presidente,
DISPOÑO:
Artigo 1º
Poderán acollerse ás axudas que considera a presente orde aqueles agricultores que, cumprindo a lexislación vixente en materia de plantacións, substitucións e replantacións, desexen substituí-los seus viñedos constituídos por variedades non preferentes ou autorizadas, por variedades autóctonas ou recomendadas, de acordo co establecido no Regulamento (CEE) nº 3800/81, da comisión sobre clasificación de variedades de vide.
Así mesmo, poderán acollerse os agricultores que teñan por obxectivo renova-los seus viñedos envellecidos, ou os que pretendan cambia-lo marco de plantación mellorando a súa productividade, sempre e cando as variedades utilizadas sexan autóctonas ou recomendadas.
Artigo 2º
Serán subvencionables os seguintes investimentos necesarios para a implantación do viñedo:
-Preparación do terreo, incluíndo o arrinque de cepas. Considerarase, así mesmo, a fertilización de fondo, a desinfección e as emendas.
-Adquisición da planta, que deberá realizarse en viveiro autorizado.
-Instalación de postes, arames e demais material necesario para a plantación.
Artigo 3º
Terán preferencia na concesión destas axudas:
1º) Os solicitantes que sexan agricultores a título principal, titulares de explotacións agrarias prioritarias de acordo co establecido na Lei 19/1995, do 4 de xullo, de modernización de explotacións agrarias.
2º) Os solicitantes que teñan a súa explotación en zonas de denominación de orixe ou productoras de viño da terra.
3º) O resto dos solicitantes.
En caso de solicitantes do mesmo grupo, terán preferencia as persoas xurídicas constituídas máis recentemente e, logo, os solicitantes de menor idade.
Artigo 4º
O investimento/UTA (unidade de traballo agrario) non será superior a 11.145.000 ptas., e o investimento máximo/explotación será de 22.290.000 ptas.
A porcentaxe máxima de subvención para bens inmobles será do 30% do investimento auxiliable se a explotación radica en zona desfavorecida, e do 26% no resto das zonas.
Se o solicitante non é agricultor a título principal, estas porcentaxes máximas para bens inmobles serán do 26% e 22%, respectivamente.
A superficie máxima subvencionable corresponderá a unha plantación de 2 ha., e 500 m será o mínimo de superficie atendible.
En ningún caso serán subvencionables plantacións de viñedo en regadío.
Artigo 5º
As solicitudes para acollerse ás axudas que inclúe a presente orde presentaranse en calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, antes do 30 de agosto de 1997, preferentemente nas oficinas locais ou provinciais da Consellería de Agricultura, Gandería e Montes, utilizando o impreso normalizado do anexo I.
A solicitude deberá ir acompañada da seguinte documentación:
a) Agricultores individuais:
-Fotocopia compulsada do DNI ou NIF.
-Fotocopia compulsada da declaración da renda das persoas físicas correspondente ó último ano.
-Fotocopia compulsada do boletín de cotización á Seguridade Social dos tres últimos meses, ou ben, certificación da Tesourería Xeral da Seguridade Social de estar ó día na cotización.
-Acreditación de non ter pendente de pagamento ningunha débeda, por ningún concepto, coa Administración pública da Comunidade Autónoma.
-Autorización de plantación, de acordo coa lexislación vixente en materia de plantacións de viñedo.
b) Asociacións con personalidade xurídica:
b.1. Asociacións con personalidade xurídica que teñan a actividade agraria como actividade principal:
-Fotocopia compulsada do CIF da asociación.
-Fotocopia compulsada da declaración da renda das persoas físicas, correspondente ó último ano de, polo menos, o 50% dos socios.
-Fotocopia compulsada do boletín de cotización á Seguridade Social, correspondente ós tres últimos meses de, polo menos, o 50% dos socios.
-Acreditación de non ter pendente de pagamento ningunha débeda, por ningún concepto, coa Administración pública da Comunidade Autónoma.
-Autorización de plantación, de acordo coa lexislación vixente en materia de plantacións de viñedo.
-Certificación da Axencia Estatal de Administración Tributaria de estar ó corrente no cumprimento das súas obrigas fiscais.
-Documentos TC1 xustificativos de estar ó corrente na cotización á Seguridade Social.
b.2. Outras asociacións con personalidade xurídica:
-Fotocopia compulsada do CIF da asociación.
-Certificación da Axencia Estatal de Administración Tributaria de estar ó corrente no cumprimento das súas obrigacións fiscais.
-Acreditación de non ter pendente de pagamento ningunha débeda, por ningún concepto, coa Administración pública da Comunidade Autónoma.
-Documento TC1 xustificativos de estar ó corrente na cotización á Seguridade Social.
-Autorización de plantación de acordo coa lexislación vixente en materia de plantacións de viñedo.
As delegacións provinciais remitirán un informe sobre as solicitudes recibidas á Dirección Xeral de Producción Agropecuaria e Industrias Agroalimentarias, que emitirá a proposta correspondente para a súa aprobación polo conselleiro de Agricultura, Gandería e Montes.
Artigo 6º
As melloras aprobadas deberán estar realizadas antes do 31 de outubro de 1997. O beneficiario comunicará esta circunstancia, antes da citada data, nas oficinas da Consellería de Agricultura, Gandería e Montes xuntando as facturas e xustificantes do investimento, para que, feitas as comprobacións oportunas, proceda a delegación provincial a efectua-la correspondente proposta de pagamento. No caso de que, por causa xustificada, o beneficiario non realizase os investimentos no devandito prazo, a Consellería de Agricultura, Gandería e Montes, a solicitude do mesmo, poderá conce-la correspondente prórroga para a execución das melloras.
Artigo 7º
No exercicio de 1997 este programa financiarase con cargo ó concepto orzamentario 09.03.614-A.776.0 «Reestructuración e reconversión do viñedo» dotado con 40.000.000 de ptas., dos orzamentos xerais da Comunidade Autónoma de Galicia para 1997.
Disposición transitoria
As solicitudes formuladas ó amparo da Orde do 18-4-1996 «Axudas para a reestructuración do viñedo en Galicia», ás que non lle foi concedida a subvención solicitada, serán tidas en conta na presente convocatoria, salvo indicación do interesado en sentido contrario. A tramitación dos expedientes continuará desde o trámite no que se encontrase ó termo do exercicio anterior.
Disposicións derradeiras
Primeira.-Facúltase o director xeral de Producción Agropecuaria e Industrias Agroalimentarias para dicta-las normas precisas para a aplicación da presente orde.
Segunda.-A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 11 de marzo de 1997.
Tomás Pérez Vidal
Conselleiro de Agricultura, Gandería e Montes
2685
