O Consello da Unión Europea e os representantes dos gobernos dos estados membros reunidos no seo do Consello, adoptaron o 23 de xullo de 1996 unha resolución na que se establecen os obxectivos que
deberá te-lo Ano Europeo contra o Racismo (1997), a raíz dunha proposta de decisión do Consello pola que se declara 1997 ano europeo contra o racismo.
No punto 5 desta resolución, invítanse ós estados membros a crear un comité nacional de coordinación ou un organismo administrativo equivalente, representativo do conxunto de organismos activos na loita contra o racismo, a xenofobia, o antisemitismo e a intolerencia.
En consecuencia, o Ministerio de Traballo e Asuntos Sociais creou polo R.D. 137/1997, do 31 de xaneiro, o comité español para o ano europeo contra o racismo 1997 (BOE nº 28, do 1-21997). Entre as funcións deste comité, recollidas no artigo 2 do devandito R.D., está a de apoia-la creación de comités rexionais e propicia-la relación con outros comités nacionais.
Na súa virtude, por proposta da Consellería de Familia, Muller e Xuventude, o Consello da Xunta de Galicia na súa reunión do día seis de marzo de mil novecentos noventa e sete adoptou o acordo que a seguir se transcribe, do que se ordena a súa publicación no Diario Oficial de Galicia:
Primeiro.-Créase a comisión galega para o ano europeo contra o racismo 1997.
Segundo.-Esta comisión funcionará en pleno e en comisión permanente.
Terceiro.-O pleno da comisión galega estará presidido pola conselleira de Familia, Muller e Xuventude, actuando como vicepresidente 1º o director xeral de Xuventude e como vicepresidente 2º o presidente do Consello da Xuventude de Galicia.
Serán vocais da devandita Comisión un representante de cada unha das consellerías e secretarías xerais dependentes da Presidencia. Ademais:
- Os presidentes das deputacións provinciais ou membros en quen deleguen.
-3 representantes da Federación Galega de Municipios e Provincias.
-5 representantes de asociacións xuvenís representadas no Consello da Xuventude de Galicia.
-5 representantes de asociacións e organizacións non gubernamentais especializadas na loita contra o racismo ou representantes dos colectivos máis afectados.
-2 representantes das escolas de tempo libre.
Os vocais serán designados pola presidenta por proposta das distintas consellerías, administración públicas e entidades e organizacións a quen representan.
Os representantes da Administración autonómica deberán posuír, polo menos, a categoría de director xeral, sen prexuízo de que poidan delega-la súa representación nun subdirector xeral. Actuará como secretario, con voz pero sen voto, un funcionario da Dirección Xeral de Xuventude.
Cuarto.-A comisión permanente estará presidida pola conselleira de Familia, Muller e Xuventude e actuará como vicepresidente 1º o director xeral de Xuventude e como vicepresidente 2º o presidente do Consello da Xuventude de Galicia.
Os vocais serán designados polo Pleno de entre os seus membros coa seguinte composición:
-5 representantes da Administración autonómica.
-1 representante da Federación Galega de Municipios e Provincias.
-3 representantes de asociacións xuvenís representadas no Consello da Xuventude de Galicia.
-3 representantes de asociacións e organizacións non gobernamentais especializadas na loita contra o racismo ou representantes dos colectivos máis afectados.
-1 representante de escolas de tempo libre.
O secretario do pleno exercerá, así mesmo, como secretario da comisión permanente.
Quinto.-A comisión terá as seguintes funcións:
a) Difundi-los obxectivos do ano europeo contra o racismo de acordo coas orientacións sinaladas pola Resolución do 23 de xullo de 1996, do Consello da Unión Europea.
b) Asumi-la responsabilidade desta campaña a nivel autonómico.
c) Coordina-las actividades autonómicas e locais e asegura-la articulación entre os niveis locais, autonómicos e nacional da campaña.
d) Estimula-la participación das organizacións non gobernamentais, entidades e administracións públicas na realización de proxectos tendentes á consecución e celebración do ano europeo contra o racismo.
e) Impulsar e apoia-la creación de comisións locais.
Sexto.-O pleno reunirase dúas veces durante 1997 con carácter ordinario e excepcionalmente tantas veces como sexa convocado polo seu presidente a iniciativa propia ou por proposta de, polo menos, unha terceira parte dos vocais.
A comisión permanente, por petición do seu presidente, reunirase cantas veces sexa necesario para o desenvolvemento dos acordos e o seguimento da programación das actuacións.
Sétimo.-No non previsto no presente acordo, o funcionamento desta comisión acomodarase ás normas contidas na Lei 30/1992, do 26 de novembro, de réxime xurídico das administracións públicas e do procedemento administrativo común, sobre órganos colexiados.
Oitavo.-A comisión disolverase no ano 1998, unha vez elaborada a memoria de actuacións do ano europeo contra o racismo.
Noveno.-O presente acordo terá efectos desde o mesmo día da súa publicación no Diario Oficial de Galicia.
Santiago de Compostela, 6 de marzo de 1997.
Manuela López Besteiro
Conselleira de Familia, Muller e Xuventude
2312