Maila a importancia que o mar ten en Galicia, existe un gran descoñecemento na sociedade galega do que realmente representa o sector marítimo-pesqueiro para a nosa Comunidade Autónoma, sendo este distanciamento moito maior no interior e nas zonas rurais. É de interese, co fin de lograr unha maior conciencia da poboación sobre o que o mar significa para Galicia, programar actividades destinadas a dar a coñecer esta realidade tan importante e próxima a nós, sobre todo os mozos en idade escolar. En consecuencia, esta consellería,
DISPÓN:
Artigo 1º.-Obxecto.
Convocar un programa de visitas didácticas para escolares de ensinanzas primaria e secundaria, que se rexirá pola presente orde.
Artigo 2º.-Destinatarios.
Poderán solicita-la súa participación no programa os centros escolares públicos de ensinanzas primaria e secundaria, de toda a Comunidade Autónoma galega.
O número máximo de centros participantes fíxase en 80.
Na visita poderán participar un máximo de 50 alumnos por centro, acompañados dun mínimo de 3 e un máximo de 5 profesores e/ou titores.
Para os centros de ensino primario os alumnos deberán ser de sexto curso.
Artigo 3º.-Finalidade.
O programa consistirá nunha visita en embarcación á Ría de Arousa, con saída e finalización desde o porto que oportunamente se comunique.
Os desprazamentos desde a orixe ó punto de saída, visitas adicionais por terra, do punto de finalización á orixe, así como as comidas, serán por conta dos solicitantes.
Artigo 4º.-Datas de realización.
As visitas realizaranse entre os días 22 de abril e o 30 de maio de 1997, excluídos sábados, domingos e festivos.
Artigo 5º.-Solicitudes.
Presentaranse segundo modelo do anexo I, no rexistro xeral da Consellería de Pesca, Marisqueo e Acuicultura (edificio administrativo San Caetano,
s/n. Santiago de Compostela) antes do vixésimo día hábil seguinte á publicación desta orde, á que se xuntará acta do acordo de aprobación polo consello escolar do centro da realización da actividade e autorización escrita dos pais dos alumnos, cando estes sexan menores de idade.
As solicitudes acompañaranse dunha memoria sucinta dos motivos polos que se solicita a viaxe, así como a relación con actividades ou programas educativos que se estean realizando ou vaian realizarse no centro. En tal caso poderase xunta-la información documental que se considere de interese.
Artigo 6º.-Selección.
A Dirección Xeral de Formación Pesqueira e Investigación seleccionará os centros participantes entre as solicitudes presentadas, tendo en conta a adecuación da visita ás actividades pedagóxicas realizadas no centro, o contorno social no que se sitúa e se o centro ten realizado esta visita en anos anteriores.
A concesión ou denegación desta seralles comunicada por escrito ós centros solicitantes.
Disposición derradeira
Facúltase a Dirección Xeral de Formación Pesqueira e Investigación, para dictar cantas normas sexan precisas para o cumprimento da presente orde.
Santiago de Compostela, 7 de marzo de 1997.
Juan Caamaño Cebreiro
Conselleiro de Pesca, Marisqueo e Acuicultura
Sra. Directora xeral de Formación Pesqueira e Investigación
97-1148