O artigo 3 da Lei 5/1987, do 27 de maio (DOG nº 103, do 2 de xuño), do Consello Social da Universidade e do Consello Universitario de Galicia, determina a composición do dito Consello Social.

Pola súa banda, os artigos 4 e 9 da referida lei establecen, respectivamente, o procedemento de designación do presidente do Consello Social e a duración do seu mandato e dos demais membros representantes dos intereses sociais, e que será de catro anos, renovable por unha soa vez.

O Decreto 171/1987, do 23 de xullo, nomeou por vez primeira os membros do Consello Social, e no seu artigo 2º nomeábase presidente a Emilio Pérez Nieto. E no artigo 3 do Decreto 93/1992, do 11 de abril, nomeábao para o seu segundo e derradeiro período de mandato.

Procede pois, de acordo co citado artigo 9.1 da mesma lei, a substitución do presidente do Consello Social da Universidade de Santiago de Compostela, e en uso das atribucións conferidas pola Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro, logo de deliberación do Consello da Xunta de Galicia, na súa reunión do día vintetrés de xaneiro de mil novecentos noventa e sete,

DISPOÑO:

Artigo único

Que cese como presidente do Consello Social da Universidade de Santiago de Compostela a Emilio Pérez Nieto, agradecéndolle os servicios prestados.

Disposición derradeira

O presente decreto entrará en vigor o día seguinte ó da súa publicación no Diario Oficial de Galicia.

Santiago de Compostela, vintetrés de xaneiro de mil novecentos noventa e sete.

Manuel Fraga Iribarne

Presidente

Celso Currás Fernández

Conselleiro de Educación e Ordenación Universitaria

562