Visto o estatuto da federación e a acta de aprobación da súa asemblea xeral extraordinaria do 24-8-1996.
Visto o informe da Sección de Rexistro de Clubs e Asuntos Xurídicos, a Orde do 28 de xullo de 1995, de desenvolvemento do Decreto 228/1994, do 14 de xullo, regulador das federacións deportivas galegas, a Lei 10/1990, xeral do deporte, e demais normativa aplicable,
RESOLVO:
Ratificar con efectos desde a aprobación da súa asemblea os estatutos aprobados de conformidade co artigo 8 da Orde do 28 de xullo de 1995 e autoriza-la publicación dos estatutos no Diario Oficial de Galicia.
Santiago de Compostela, 8 de outubro de 1996.
Eduardo Lamas Sánchez
Secretario xeral para o Deporte
Federación Galega de Pelota
Capítulo I
Denominación, domicilio social e finalidade
Artigo 1º
A Federación Galega de Pelota é unha entidade de dereito privado que reúne xogadores, técnicos, xuíces, así coma clubs, asociacións, agrupacións e a totalidade de entidades adicadas á práctica da pelota no territorio galego.
Artigo 2º
A Federación Galega de Pelota ten plena personalidade xurídica propia, e absoluta capacidade de obrar para o logro da consecución dos seus fins, sen ánimo de lucro e de acordo co Estatuto de autonomía de Galicia, Lei 10/1990, do 15 de outubro, do deporte, os estatutos da Federación Española de Pelota, o Decreto 228/1994, do 14 de xullo, da Consellería de Presidencia e Administración Pública da Xunta de Galicia e Orde do 28 de xullo de 1995 que a desenvolve, os presentes estatutos, regulamentos e disposicións que no desenvolvemento cotiá se acorden na asemblea e outros órganos de goberno competentes para o efecto da Federación Galega de Pelota.
Artigo 3º
A Federación Galega de Pelota ten o seu domicilio na Coruña, rúa O Birloque, s/n. Complejo Deportivo de Elviña. 15008-A Coruña.
Artigo 4º
É función da Federación Galega de Pelota ordenar, dirixir e planificar tódalas actividades do pelota en Galicia, en coordinación co organismo competente da Xunta de Galicia, e formar parte da Federación Española de Pelota de acordo co Decreto 228/1994, da Xunta de Galicia, en coordinación cos estatutos da Federación Española de Pelota e disposicións que traten das actividades de ámbito español e da FIPA no ámbito internacional.
Artigo 5º
Son competencias da Federación Galega de Pelota:
1. Promociona-lo desenvolvemento e práctica da pelota, regulamentar e coordina-lo aspecto técnico e organiza-los campionatos e competicións da súa xurisdicción.
2. Regula-lo réxime xurídico e disciplinario dos clubs, asociacións, agrupacións, comités e a totalidade das entidades, xogadores, técnicos, xuíces, directivos e, en fin, de todas aquelas persoas que dalgún xeito interveñan na organización e práctica da pelota, cumprindo sempre as disposicións vixentes sobre estes casos.
3. Formar e cualificar a persoal técnico e deportivo especializado.
4. Coordina-las funcións e competencias das delegacións zonais e comarcais.
5. Regula-lo seu réxime disciplinario e velar polo seu cumprimento.
6. Asignar, controlar e fiscaliza-las axudas e subvencións ós seus afiliados.
Artigo 6º
No ámbito internacional, a Federación Galega de Pelota participará en competicións de acordo co que establezan as disposicións vixentes.
Capítulo II
Requisitos para ser membro da Federación Galega de Pelota. Estatuto, dereitos e deberes dos seus afiliados
Sección primeira
Clubs
Artigo 7º
Son clubs de pelota as asociacións con personalidade xurídica e capacidade de obrar que teñan por obxecto o fomento e a práctica da pelota, e estean afiliados á Federación Galega de Pelota.
Para afiliarse á Federación Galega de Pelota o club ou entidade deberán solicitalo por escrito acompañando copia dos seus Estatutos. Tamén deberán afiliarse á Federación Galega de Pelota as asociacións de clubs que poidan crearse e sempre como trámite previo para a asunción de competencias expresamente delegadas pola FGP. Os acordos tomados polas asociacións en uso da dita delegación deberán ser notificados á FGP dentro do prazo dos 10 días seguintes á data da súa adopción.
Tódolos clubs e entidades afiliadas á Federación Galega de Pelota estarán sometidas ás normas e disposicións emanadas desta; contribuirán ó cumprimento das distintas finalidades dunha forma harmónica e activa, baixo os principios democráticos dos presentes estatutos, e participarán na distintas actividades.
Artigo 8º
Son dereitos dos clubs os seguintes:
a) Intervir na elección dos órganos de goberno e representación da Federación Galega de Pelota.
b) Participar cos seus equipos nas competicións oficiais que lles correspondan pola súa categoría, nos termos e observando os requisitos que establezan as bases de competición correspondentes.
c) Concertar e participar en encontros amigables con outros clubs federados ou estranxeiros, en datas compatibles para as competicións oficiais, coa previa autorización, segundo o caso, da Federación Galega de Pelo
ta, Federación Española de Pelota e incluso, se fose necesario, do Ministerio de Asuntos Exteriores.
d) Asistir e intervir nas reunións dos órganos federativos que lles correspondan consonte as normas vixentes.
e) Optar ás axudas económicas que estableza a Federación Galega de Pelota para os clubs, na medida e ocasión que determinen as correspondentes normas.
f) Asociarse para o cumprimento dos seus fins.
g) Fusionarse cos requisitos que regulamentariamente poidan establecerse no desenvolvemento dos presentes estatutos.
h) Tódolos demais que a Federación Galega de Pelota estableza en cada caso.
Artigo 9º
Son obrigas dos clubs, as seguintes:
a) Participar cos seus equipos nas competicións oficiais que lles correspondan pola súa categoría, nos termos e observando os requisitos que regulamentariamente se determinen, así como os que estableza a Federación Galega de Pelota, debendo fixa-la súa cancha oficial de xogo no ámbito territorial da Comunidade Autónoma de Galicia.
b) Cumpri-los estatutos, regulamentos e demais normas da Federación Galega de Pelota, así coma os seus propios estatutos.
c) Poñer a disposición da Federación Galega de Pelota os seus campos de xogo cando sexan precisos a dito organismo.
d) Contribuír ó sostemento económico da Federación Galega de Pelota, na medida en que lles corresponda, aboando as correspondentes cotas, dereitos e compensacións económicas que se determinen.
e) Aboa-los dereitos de arbitraxe que segundo as normas federativas lles correspondan, así como liquidar dentro de cada temporada as débedas contraídas coas federacións galega ou delegacións Zonal, cos seus xogadores, ou técnicos, e con outros clubs no transcurso da competición.
f) Mante-la disciplina deportiva evitando situacións de violencia ou animosidade con outros membros ou estamentos da pelota.
g) Atender e contestar coa maior dilixencia as comunicacións que reciban dos organismos federativos, e auxiliar a estes mediante a facilitación de cantos datos precisen.
h) Non impedi-la asistencia dos seus xogadores e técnicos ás seleccións autonómicas e ás actividades federativas de perfeccionamento técnico.
i) Coidar da máis perfecta formación deportiva dos seus xogadores, proporcionándolle-los medios precisos para iso, e garantindo a súa efectiva e plena actividade deportiva.
j) Dispor para os encontros oficiais dunha cancha de xogo que cumpra os requisitos regulamentarios.
k) Recoñecer para tódolos efectos as tarxetas de identidade expedidas pola Federación Galega de Pelota.
l) Facilita-la entrada gratuíta nas súas instalacións deportivas ós membros do equipo contrario en posesión da correspondente licencia federativa.
m) Comunicarlle á Federación Galega de Pelota as modificacións estatutarias, o nomeamento ou cesamento de directivos ou administradores, e os acordos de fusión, escisión ou disolución nos prazos establecidos.
n) Presenta-la documentación e demais requisitos que sexan necesarios para formaliza-la inscrición de cada equipo, segundo o establecido nas normas específicas para as competicións da Federación Galega de Pelota.
Artigo 10º
Regulamentariamente, en desenvolvemento dos presentes estatutos, determinarase o modo e forma no que se exercitarán e cumprirán os dereitos e deberes que quedan relacionados, así como o atinente á clasificación dos clubs por categorías, cambios de residencia deles, fusións ou baixas.
Sección segunda
Xogadores
Artigo 11º
Para os efectos dos presentes estatutos son xogadores aquelas persoas naturais que practican a pelota nun club ou independente afiliado á Federación Galega de Pelota e subscriben a licencia regulamentaria. Coa sinatura da mencionada licencia, queda vinculado ó seu club ou federación e suxeito á disciplina da federación, quedando toda a organización desta última ó seu servicio.
Os xogadores contribuirán ó cumprimento das distintas finalidades dunha maneira activa e harmónica sobre os principios democráticos dos presentes estatutos, e participarán nas distintas actividades.
Artigo 12º
Para poder subscribir unha licencia coma xogador deberanse cumpri-los seguintes requisitos:
a) Ser español.
b) Non ter compromiso vixente con ningún outro club, ou ser independente.
c) Ter condición de afeccionado, segundo o establecido pola FEP.
A condición de ser español poderá ser dispensada pola Federación Galega de Pelota, con carácter excepcional, de forma permanente ou temporal, nos seguintes casos:
a) Cando un xogador teña que actuar en competicións amigables.
b) Ou cando un xogador só vaia actuar en competicións internacionais de clubs, para as que a regulamentación FIP admite a súa inscrición, ou
c) Cando o xogador vaia actuar en competicións organizadas pola Federación Galega de Pelota, nas que a asemblea desta federación teña dispensado expresamente esta condición.
Artigo 13º
O xogador ten os seguintes dereitos:
a) Liberdade para subscribir licencia, respectando os dereitos adquiridos.
b) Participar en cantas probas, cursos, fases de preparación, seleccións ou outro tipo de cocentración, sexa convocado pola Federación Galega de Pelota
c) participar nas eleccións ós organos de goberno e representación da Federación Galega de Pelota.
d) Consideración da súa actividade deportiva.
e) Recibir material deportivo para a práctica do pelota.
f) Recibir atención sanitaria gratuíta e axeitada no caso de lesión deportiva, ben por atención directa do seu club, federación ou a través de concertos, voluntarios ou obrigatorios, que neles teñan coa Mutualidade Xeral Deportiva ou outra entidade pública ou privada.
g) Participar nas sesións de adestramento e nos encontros do seu equipo, agás decisión disciplinaria.
Artigo 14º
O xogador ten as seguintes obrigas:
a) Someterse á disciplina do seu club ou federación, sempre e cando se axusten ó disposto no ordenamento xurídico e participar nos adestramentos e encontros do seu equipo ou federación.
b) Non intervir en actividades deportivas con equipo distinto do seu sen autorización do club o federación.
c) Utilizar, coidar e cando sexa requirido para iso, devolve-lo material deportivo que o club o federación lle entregese para tal fin.
d) Asistir ás probas e cursos ós que sexa convocado pola Federación Galega de Pelota.
e) Participar nas seleccións galegas.
Artigo 15º
Así mesmo, os xogadores de pelota poderán asociarse para a defensa dos seus intereses relacionados con pelota, nos termos que establece, ou poida estabecer, a normativa vixente.
Tales asociacións poderán exercer por delegación, competencias da Federación Galega de Pelota, para o cal deberán afiliarse a ela. Os acordos tomados polas asociacións en uso de dita delegación, deberán ser notificados á Federación Galega de Pelota dentro do prazo de dez días seguintes á data da súa adopción.
Artigo 16º
Regulamentariamente, no desenvolvemento dos presentes estatutos, determinarase o xeito e forma no que se exercitarán e cumprirán os dereitos e deberes que quedan relacionados, así como as materias atinentes á relación entre clubs e xogadores, categorías destos, licencias, categorías, baixas e cambios.
Sección terceira
Técnicos
Artigo 17º
Son técnicos as persoas naturais con título recoñecido pola Federación Galega de Pelota, dedicadas ó ensino, preparación e dirección técnica da pelota, tanto a nivel de clubs como da propia federación.
Os títulos de técnicos serán expedidos polo organismo competente.
Todolos técnicos inscritos estarán sometidos ás normas e disposicións da Federación Galega de Pelota, contribuirán ó comprimento das distintas finalidades dunha maneira activa e harmónica sobre os principios democráticos dos presentes estatutos, e participarán nas distintas actividades.
Artigo 18º
Para actuar á fronte dun equipo o técnico, ademais de ter ó título correspondente, deberá estar en posesión da licencia anual, expedida pola Federación Galega de Pelota, que o vinculará a un ou varios equipos determinados.
Artigo 19º
O técnico ten os seguintes dereitos:
a) Liberdade para subscribir licencia, de acordo coas normas establecidas e con respecto ós dereitos adquiridos.
b) Participar na elección dos órganos de goberno e representación da Federación Galega de Pelota.
c) Asistir ás probas e cursos de preparación ós que sexa convocado pola Federación Galega de Pelota, sen prexuízo das obrigacións para co seu club.
d) Recibi-las prestacións da mutualidade nos casos de cobertura previstos.
e) Recibi-lo material deportivo preciso para a súa actividade.
f) Ó cumprimento das estipulacións pactadas co seu club.
Artigo 20º
O técnico ten as seguintes obrigas:
a) Someterse á disciplina das entidades deportivas ás que se atope vinculado por licencia.
b) Non intervir en actividades deportivas con equipo distinto ó seu, sen autorización do club ou federación.
c) Empregar, coidar e cando sexa necesario para iso, devolve-lo material deportivo que o club ou federación lle teña facilitado.
d) Asistir ás probas e cursos ós que sexa convocado pola federación.
Artigo 21º
Os técnicos de pelota poderán asociarse para a defensa dos seus intereses relacionados coa pelota nos termos que establece, ou poida establecer, a normativa vixente.
Tales asociacións poderán exercer por delegación, competencias da Federación Galega de Pelota, para o cal deberán afiliarse a ela. Os acordos tomados polas asociacións en uso de dita delegación, deberán ser notificados á Federación Galega de Pelota dentro do prazo de dez días seguintes á data da súa adopción.
Artigo 22º
Regulamentariamente, no desenvolvemento dos presentes estatutos, determinarase o xeito e forma no que se exercitarán e cumprirán os dereitos e deberes que quedan relacionados, así como as materias atinentes a categorías, titulacións, licencias, cambios, altas e baixas.
Sección cuarta
Xuíces
Artigo 23º
Son xuíces as persoas naturais que, tendo subscrito a correspondente licencia federativa, coidan do comprimento das regras oficiais de xogo e demais normas de aplicación perante os encontros, ostentando a máxima autoridade dentro do terreo de xogo.
Tódolos xuíces inscritos no comité Galego de Xuíces estarán sometidos ás normas e disposicións da Federación Galega de Pelota, contribuirán ó cumprimento das distintas finalidades dunha maneira activa e harmónica sobre os principios democráticos dos presentes estatutos, e participarán nas distintas actividades.
Artigo 24º
Para que un xuíz poida subscribir licencia federativa deberá reuni-los seguintes requisitos:
a) Ser español. Este requisito poderá ser dispensado pola Federación Galega de Pelota para determinados supostos.
b) Ter máis de catorce anos.
c) Posuír título oficial de xuíz recoñecido pola Federación Galega de Pelota.
d) Non ser xogador ou técnico, nin ostentar outra condición dentro da pelota de modo activo. En certas competicións autonómicas e nacionais, poderase dispensar da incompatibilidade de ser xogador por acordo da Xunta Directiva da Federación Galega de Pelota.
Artigo 25º
Son dereitos dos xuíces:
a) Asistir ás probas e cursos de perfeccionamento ou divulgación ós que sexa convocado pola Federación Galega de Pelota.
b) Recibi-las prestacións da mutualidade nos casos de cobertura previstos.
c) Percibi-las cantidades que se establezan nas bases de competición.
d) Ser clasificado nunha das categorías que se establezan pola Federación Galega de Pelota, a través do comité galego de xuíces.
e) Participar na elección de órganos de goberno e representación da Federación Galega de Pelota.
Artigo 26º
Son obrigas dos xuíces:
a) Someterse á disciplina da Federación Galega de Pelota, á do comité galego de xuíces e ás dos seus comités zonais.
b) Non intervir en actividades deportivas relacionadas coa pelota sen autorización da Federación Galega de Pelota.
c) Asistir ás probas e cursos ós que sexa convocado pola Federación Galega de Pelota.
d) Retirar semanalmente as designacións dos encontros, darse por informados delas, segundo as normas do comité galego ou dos comités zonais.
e) Asistir e exercer as súas funcións nos encontros deportivos para os que sexan designados. Para que esta obrigación quede dispensada, os colexiados deberán xustifica-la súa indispoñibilidade debidamente e coa antelación prevista nas normas do comité galego e dos seus comités zonais.
f) Coñece-las regras do xogo e regulamentos da Federación Galega de Pelota.
Artigo 27º
Regulamentariamente, en desenvolvemento dos presentes estatutos, determinarase o modo e forma no que se exercitarán os dereitos e deberes que quedan relacionados, así como as materias atinentes a titulación, licencias e clasificación por categorías.
Sección quinta
Outros colectivos
Artigo 28º
Regulamentariamente, en desenvolvemento dos presentes estatutos, regularanse as figuras de:
a) Directivos das delegacións zonais e comité galego de xuíces.
b) Delegado de equipo, á que se asimilarán os directivos, médicos, directores deportivos, preparadores físicos ou encargados de material e a do delegado de campo ou botillero.
Capítulo III
Ámbito xurisdiccional
Artigo 29º
Estarán sometidos á disciplina da Federación Galega de Pelota, tódolos seus directivos e funcionarios, tódalas delegacións zonais ou delegacións comarcais, os xogadores, técnicos, xuíces, delegados de equipo e asimilados, delegados de campo ou botilleros, clubs, asociacións ou agrupacións, comités, e, en xeral, toda persoa ou entidade que teña relación coa práctica da pelota.
Cando actúen en actividades de ámbito español ou internacional, estarán sometidos ó que determinen os estatutos, regulamentos, bases, normas e disposicións da Federación Española de Pelota o da FIP, segundo corresponda.
Artigo 30º
Os organismos e entidades dependentes da Federación Galega de Pelota rexeranse polas súas propias normas e regulamentos, subordinadas a este estatuto e ó resto das disposicións federativas vixentes, limitando a súa total competencia ó ambito que ten asignado. Todas estas normas e regulamentos serán propostos pola xunta directiva da Federación Galega de Pelota á asemblea xeral para a súa aprobación, sendo dados a coñecer ós organismos superiores para a súa homologación.
Capítulo IV
Organización territorial
Artigo 31º
A Federación Galega de Pelota ten plena xurisdicción no territorio da Comunidade Autónoma de Galicia.
Artigo 32º
A Federación Galega de Pelota poderá estructurarse territorialmente en delegacións zonais, comarcais, etc., segundo o determine a asemblea xeral.
Para unha mellor organización e cumplimento dos seus fins, a asemblea xeral, de acordo co sentir e as posibilidades de cada zona, poderá dividi-lo territorio galego nas demarcacións que sexan necesarias.
Artigo 33º
Tamén se poderán crear unidades de ámbito xeográfico inferior, denominadas delegacións comarcais, dependentes das delegacións zonais, para mellor desenvolvemento e promoción do pelota en cada zona, sempre por acordo da xunta directiva da Federación Galega de Pelota, por proposta de cada delegacións zonal, pero mantendo os actuais e sempre que con iso se consiga unha maior organización das competicións.
Artigo 34º
As delegacións zonais e, se é o caso, as delegacións comarcais, axustarán a súa actividade ás normas dictadas pola Federación Galega de Pelota a través dos órganos que corresponda, e directamente do seu presidente.
Artigo 35º
Os titulares das delegacións zonais serán nombrados e destituídos polo presidente da federación galega, de acordo co artigo 51º dos presentes estatutos.
A composición do equipo directivo da delegación zonal ou delegación comarcal, así coma as competencias deles, serán de libre facultade do titular da delegación zonal ou delegación comarcal, o cal dará conta ó presidente da federación galega.
Título II
Órganos de goberno e representación
Capítulo primeiro
Normas xerais
Artigo 36º
Son órganos de goberno e representación da Federación Galega de Pelota, a asemblea xeral e o presidente.
No seo da asemblea xeral constituirase unha comisión delegada de asistencia á mesma.
Artigo 37º
Serán órganos efectivos da federación galega, o presidente, a asemblea xeral e a comisión delegada no ámbito das súas respectivas competencias.
Os membros dos demais órganos e comités serán designados e revogados libremente polo presidente, coas excepcións previstas nos presentes estatutos.
O nomeamento ou renovación dos órganos de goberno e representación, dos órganos complementarios, e dos comités que poidan crearse dentro da federación, deberán ser comunicados a tódolos membros da asemblea xeral e á Secretaría Xeral para o Deporte, nun prazo máximo de 15 días a partir da data de nomeamento.
Os órganos de goberno e representación reuniranse na forma e termos establecidos nestes estatutos, os seus acordos, agás disposición expresa en contrario, adoptaranse por maioría simple; en caso de empate o presidente terá voto de calidade. Os acordos poderán ser
impugnados de conformidade co disposto na lexislación aplicable e nos presentes estatutos.
A responsabilidade dos membros dos órganos da Federación Galega de Pelota no exercicio das súas funcións será esixida no ámbito disciplinario de conformidade co disposto no Real decreto 1591/1992, do 23 de decembro, e nos ámbitos civil e penal, de acordo coa lexislación xeral de aplicación.
Son requisitos xerais para ser membro de calquera órgano da Federación Galega de Pelota, os seguintes:
a) Te-la condición de cidadán de Galicia, segundo o disposto no artigo 3 da Lei orgánica 1/1981, do 6 de abril, do Estatuto de autonomía de Galicia.
b) Ser maior de idade e estar en pleno uso dos seus dereitos civís.
c) Non estar suxeito a corrección disciplinaria de carácter deportivo que supoña inhabilitación.
d) Non ter sido condenado mediante sentencia penal firme que levase anexa pena principal ou accesoria de inhabilitación absoluta para cargo público.
e) Non estar incurso en causa ningunha de incompatibilidade establecida legal ou estatutariamente.
f) Reuni-los requisitos específicos propios de cada estamento deportivo.
Capítulo segundo
A asemblea xeral
Sección primeira
Natureza, composición, nomeamento e cesamento
Artigo 38º
A asemblea xeral é o órgano superior de goberno e representación da Federación Galega de Pelota.
Artigo 39º
A asemblea xeral estará contituída polo presidente da federación galega e por representantes dos clubs, entidades deportivas, deportistas, técnicos e xuíces.
Os clubs e entidades deportivas non poderán ser membros da asemblea xeral se, no momento da convocatoria de eleccións non figuran inscritos no Rexistro Xeral de Clubs, Federacións e Entidades Deportivas da Xunta de Galicia.
Os compoñentes da xunta directiva, por esa soa consideración, poderán asistir ás reunións da asemblea, con voz, pero sen dereito a voto.
Artigo 40º
A asemblea xeral estará integrada como máximo por vintecinco (25) membros, e a representación de estamentos responderá as seguintes proporcións:
-Clubs e entidades deportivas: 67% correspondendo 17 membros como máximo.
-Deportistas: 20%, correspondendo 5 membros como máximo.
-Adestradores-técnicos: 5% correspondendo 1 membro como máximo.
-Xuíces: 5% correspondendo 1 membro como máximo.
-Outros colectivos: 3% correspondendo 1 membro como máximo.
Artigo 41º
A convocatoria de eleccións deberá indicar expresamente o número de membros da asemblea xeral e de cada un dos seus estamentos.
Artigo 42º
Os membros da asemblea xeral e da comisión delegada cesarán polas seguintes causas:
a) Defunción.
b) Disolución do club ou entidade á que representen.
c) Expiración do mandato para o que foron elixidos.
d) Renuncia ou demisión.
e) Estar incurso de causa de ilexitimidade ou incompatibilidade legal ou estatutaria.
f) Sanción disciplinaria imposta en forma regulamentaria que implique o cesamento no cargo que ostenta.
g) Perda dos requisitos polos que foron elixidos no seu respectivo estamento.
Artigo 43º
As vacantes que se produzan na asemblea xeral antes das seguintes eleccións xerais a ela serán cubertas, dentro de cada estamento e de forma sucesiva, polos candidatos que non proceso electoral obtivesen maior número de votos despois dos que resultaron electos e, a falta destes, mediante a realización de elecccións parciais, sempre que, neste último caso, as vacantes superen o 25% dos membros da asemblea.
Os elixidos para ocupa-las vacantes a que se refire o apartado anterior ostentarán o seu mandato polo tempo que falte para a celebración das seguintes eleccións xerais.
Sección segunda
Réxime de funcionamento
Artigo 44º.-Competencias.
A asemblea xeral en canto órgano máximo de goberno e representación da Federación Galega de Pelota, pode adoptar calquera acordo ou decisión sobre ela, con sometemento ás regras de competencia e procedemento. Especialmente son competencias da asemblea xeral as seguintes:
1. Modifica-los presentes estatutos e aproba-los regulamentos que sexan necesarios para o desenvolvemento e organización da federación.
2. Elixir, mediante sufraxio libre, igual, directo e secreto, ó presidente e á comisión delegada da federación galega, así como o cesamento e a moción de censura ó presidente
3. Aproba-lo balance, as contas, orzamentos e memorias que teñen que formalizarse seguindo as disposicións vixentes.
4. Resolve-las propostas que, en forma, sexan presentadas á asemblea.
5. Aproba-los programas e calendarios deportivos anuais a desenvolver pola federación galega así como as bases e regulamentos que rexerán as competicións.
6. Aproba-la creación de órganos territoriais da federación galega.
7. Aproba-lo regulamento de eleccións á asemblea, presidente e comisión delegada da federación galega.
8. Aprobación do Regulamento de disciplina deportiva.
9. Calquera outra competencia da federación galega que non esté expresamente atribuída polos presentes estatutos a outro órgano.
Artigo 45º
As reunións da asemblea xeral axustaranse ó seguinte réxime:
a) A asemblea xeral reunirase unha vez ó ano, necesariamente antes de comeza-la nova temporada deportiva, en sesión ordinaria para os fins da súa competencia e, como mínimo para a aprobación do novo orzamento e liquidación do anterior, aprobación do calendario deportivo e das bases e regulamentos que rexerán a competición, e para a aprobación da memoria de actividades anuais.
A asemblea xeral será convocada polo presidente da federación galega a iniciativa propia ou por instancia razoada da cuarta parte dos seus membros cun mínimo de trinta días naturais de antelación á data da súa celebración, no taboleiro de novas da federación galega, así coma nas delegacións zonais e, se é o caso, delegacións comarcais, debendo incluír necesariamente os puntos da orde do día que se van tratar. En todo caso, notificarase individualmente a cada un dos membros da asemblea por calquera método que permita ter constancia da data de recepción dela, cunha antelación mínima de 48 horas; a notificación efectuarase ás direccións que consten na federación galega 30 días antes da data de convocatoria.
Os defectos formais na convocatoria non darán lugar a nulidade da asemblea sempre e cando os seus membros recibisen a convocatoria coa orde do día no prazo establecido.
En todo caso, a asemblea será válida, sen necesidade de ningún outro requisito, sempre e cando concorran a ela a totalidade dos seus membros.
b) As demais reunións da asemblea xeral terán carácter extraordinario e serán convocadas polo presidente, ou a proposta de alomenos o 25% de membros da asemblea, cos mesmos requisitos previstos para a asemblea ordinaria. Presentada a solicitude de convocatoria por un número de membros suficiente, o presidente deberá convocala necesariamente no prazo de dez días naturais seguintes. Desde a convocatoria ata a data de celebración da asemblea non poderán transcorrer máis de vinte días naturais. Na solicitude deberán indicarse os puntos que comporán a orde do día. A convocatoria non poderá conter ningún outro punto distinto ós da solicitude.
c) A asemblea quedará validamente constituída cando concorran en primeira convocatoria a metade máis un dos seus membros, ou en segunda convocatoria, que terá lugar media hora máis tarde, calquera que sexa o número de membros asistentes.
d) A asemblea xeral será presidida polo presidente da Federación Galega de Pelota ou quen lle substitúa, e actuará coma secretario o que o sexa da federación galega. Os acordos adoptaranse por maioría simple. No caso de empate será decisorio o voto do presidente. Non obstante o anteriormente exposto, cando se trate de decisións sobre a compra ou alleamento de bens inmobles, ou operacións económicas que supoñan un 25% máis do orzamento anual da federación galega, así coma a modificación dos presentes estatutos, será necesaria a maioría das dúas terceiras partes dos seus membros
Para os efectos de cómputo de quórums e maiorías, cando estes se conformen cun número inexacto de asembleístas, computaranse sempre por exceso e con referencia ó número daqueles efectivamente existentes como membros da asemblea, descontadas as vacantes.
Artigo 46º
Non será admisible en modo ningún para a formación de vontade dos órganos colexiados da federación galega nin para o establecemento de seu quórum, o voto por correo nin a delegación de voto; sendo polo tanto necesaria a presencia física dos seus membros. Exceptúanse as eleccións dos membros da asemblea xeral, se así se aprobase no Regulamento electoral.
Con carácter excepcional o voto dos clubs e entidades deportivas poderá exercelo o seu presidente, ou a persoa na que el delegue, sempre e cando esta última non sexa membro da asemblea xeral.
Ninguén poderá ostentar na asemblea xeral máis dunha delegación de voto.
Artigo 47º
As votacións no seo da asemblea realizaranse na forma e orde que estableza a presidencia, sendo esta a que decidirá se serán ordinarias, nominais ou segredas. Se polo menos o 25% dos asistentes solicita unha modalidade determinada, a forma de votación decidirase por maioría simple dos membros da asemblea xeral.
Artigo 48º
De tódolos acordos adoptados en asemblea xeral ou comisión delegada, levantarase acta polo secretario delas, especificando o nome das persoas intervenientes e demais circunstancias que se consideren oportunas, contido dos acordos adoptados, resultados das votacións e, se é o caso, os votos particulares contrarios o acordo adoptado.
Os votos contrarios ó acordo adoptado ou as abstencións motivadas eximirán ós que os emitan de calquera responsabilidade derivada de tales acordos.
Artigo 49º
Os acordos da asemblea xeral e da comisión delegada serán vinculantes e de obrigatorio cumplimento para a totalidade de órganos, persoas e entidades que integran
a federación galega, e terán forza executiva a partir da data de adopción.
Capítulo terceiro
Comisión delegada
Artigo 50º
No seo da asemblea xeral deberá constituírse unha comisión delegada que terá carácter electivo e será un órgano de goberno e representación da federación.
A comisión delegada será elixida pola asemblea xeral na primeira reunión que se celebre despois da súa constitución, mediante o sufraxio entre os membros dela, o seu mandato coincidirá co da asemblea xeral.
O número de membros da comisión delegada será o 15% dos membros da asemblea xeral. O número non será inferior a 5 nin superior a 15.
O presidente da federación convocará a comisión delegada, que se reunirá como mínimo cada 4 meses para os fins das súas competencias e, alomenos, para realiza-lo seguimento da xestión deportiva e económica da federación.
Son competencias da comisión delegada:
a) A elaboración dun informe previo á aprobación dos orzamentos.
b) A modificación dos calendarios deportivos.
c) A modificación dos orzamentos e dos regulamentos.
d) O seguimento da xestión económica e deportiva da federación.
As modificacións non poderán excede-los límites e criterios que a propia asemblea xeral estableza.
Por proposta dos temas que se van tratar na comisión corresponde exclusivamente ó presidente ou ós dous tercios dos seus integrantes.
Capítulo cuarto
Presidente
Artigo 51º
O presidente da Federación Galega de Pelota é o órgano executivo dela. Ostenta a súa representación legal, convoca e preside os órganos de goberno e representación, executando os seus acordos. Outorga os poderes de representación e administración que sexan precisos e ostenta a dirección superior da administración federativa. O presidente da federación galega nomeará e destituirá os membros dos órganos xurisdiccionais da federación galega así coma os presidentes da delegacións zonais e comité galego de xuíces.
Artigo 52º
A duración do cargo de presidente será de catro anos.
No caso de que, excepcionalmente, fique vacante a presidencia antes de que transcorra o prazo para o que foi elixido, considerarase demisionaria toda a xunta directiva, constituíndose a comisión delegada en comisión xestora, presidida polo membro de maior idade. Convocará á asemblea xeral, e esta acordará unha nova elección de presidente para cubri-la vacante polo tempo
que falte ata a terminación do prazo correspondente ó mandato ordinario. Se a vacante se produce por prosperar unha moción de censura, haberá que aterse ó disposto no artigo 55 destes estatutos.
Artigo 53º
O desempeño do cargo de presidente será incompatible coas seguintes actividades:
a) Ocupación de cargos directivos noutras federacións deportivas; exceptúase a federación española da mesma modalidade deportiva.
b) Desenvolvemento de actividades ou desempeño de cargos en clubs ou entidades deportivas integradas na federación galega.
c) A persoa que resulte elixida como presidente da federación galega deberá cesar en todo tipo de actividades directas no deporte do pelota e no ámbito territorial da federación.
Non existirá incompatibilidade, en ningún caso, coa práctica activa da pelota.
Artigo 54º
O presidente cesará por:
a) Transcurso do mandato para o cal foi elixido.
b) Demisión.
c) Incapacidade física ou psíquica para continuar no exercicio do seu cargo.
d) Aprobación dunha moción de censura pola asemblea xeral.
e) Por incorrer nunha causa de ilexitimidade ou incompatibilidade. Neste último caso dispoñerá dun prazo dun mes para cesar no posto que resulte incompatible co de presidente.
Artigo 55º
A moción de censura ó presidente poderá ser presentada polos membros da asemblea xeral que constituian alomenos un 25% dela, mediante escrito presentado no rexistro xeral da Federación Galega de Pelota. Na dita petición deberán solicitar do presidente a convocatoria dunha asemblea xeral extraordinaria coa dita moción como único punto da orde do día, así como propoñer un candidato alternativo á presidencia.
En caso de prospera-la moción de censura, que se votará nun sistema de dobre volta, debendo acada-la maioría absoluta dos membros que compoñen a asemblea na primeira volta, ou a maioría simple de asistentes na segunda, celebradas cunha hora de diferencia, o candidato quedará investido, con mandato polo prazo que reste para concluí-lo período ordinario.
Para a convocatoria da asemblea xeral extraordinaria, haberá que aterse ó disposto no artigo 45º dos presentes. A sesión da asemblea xeral na que se debata a moción de censura estará presidida polo membro de maior idade. Non será válido o voto por correo nin a asistencia por representación.
Se a moción de censura non prosperase, non poderá presentarse outra nova ata transcorrido un ano desde a presentación desta.
Título III
Órganos complementarios ós de goberno e representación
Artigo 56º
Son órganos complementarios dos de goberno e representación da federación, para asistir ó presidente:
a) A xunta directiva.
b) O secretario xeral.
c) O tesoureiro.
Artigo 57º
1. A xunta directiva é o órgano colexiado a quen corresponde a xestión e administración da federación galega, así como a execución e cumprimento dos acordos da asemblea. O número de membros non poderá ser inferior a 5 nin superior a 15. Os membros da xunta directiva serán nomeados e revogados libremente polo presidente.
O presidente elixirá entre os membros da súa xunta directiva un máximo de dous vicepresidentes, que o serán tamén da federación, os cales substituirán o presidente por delegación, imposibilidade física ou ausencia temporal; un secretario, que á súa vez o será da federación, así coma un tesoureiro. Tales cargos, baseados na confianza, poderán ser removidos polo presidente cando o considere oportuno.
Serán membros natos da xunta directiva da federación, agás renuncia expresa, os presidentes das federacións zonais, en que se estructura a federación galega, e comité galego de xuíces.
Os membros da xunta directiva que non o sexan da asemblea xeral terán acceso a ela, con voz pero sen voto.
Tódolos cargos son honoríficos e, en caso de establecerse algunha compensación económica a favor dos membros da xunta directiva, deberá ser expresamente acordada pola asemblea xeral e constar dunha forma diferenciada no orzamento xeral. En ningún caso a compensación económica poderá ser satisfeita con cargo ás subvencións públicas que reciba a federación galega.
2. O presidente da federación nomeará un secretario, o cal exercerá as funcións de fedatario e asesor, e, máis especificamente:
a) Levantar actas das sesións dos órganos de goberno e representación da federación, con indicación de asistentes, temas tratados, o resultado das votacións, e, se é o caso, os votos particulares contrarios ó acordo adoptado.
b) Expedi-las certificacións oportunas das actas dos órganos de goberno e representación.
c) Remitir á Secretaría Xeral para o Deporte as actas da asemblea xeral e da comisión delegada, no prazo de 15 días desde a data de celebración, así coma as convocatorias delas.
d) Proporcionará toda a información necesaria ós órganos de goberno e representación da federación, para o bo desenvolvemento das súas misións. Preparará a memoria anual das actividades realizadas e levará os libros de actas, rexistro de entradas e saídas e rexistro de clubs e entidades afiliadas.
e) Cantas outras funcións lle poden ser encomendadas polos estatutos e regulamentos da federación e lle sexan delegadas polo presidente.
3. O tesoureiro da federación galega é o órgano de administración dela.
Como funcións propias exercerá as seguintes:
a) Levar e controlar a contabilidade da federación galega así coma os libros contables, segundo a lexislación vixente.
b) Cobrar e pagar todo o relacionado coa federación.
c) Regulamenta-lo aspecto económico e realiza-la inspección económica de tódolos órganos da federación.
d) Propo-la adquisición dos bens necesarios.
e) Informar da situación dos asuntos pendentes e propo-las medidas que considere necesarias.
f) Confecciona-lo balance de contas e orzamemtos anuais para a súa presentación na asemblea xeral.
g) Elaborar e presentar informes á comisión delegada sobre o estado contable da federación.
h) Supervisará os pagamentos e toda clase de documentos bancarios.
Artigo 58º
Para ser membro da xunta directiva non será preciso formar parte da asemblea xeral.
Artigo 59º
Os membros da xunta directiva cesarán polas seguintes causas:
a) Vacancia na presidencia da federación, sen prexuízo da súa conversión en comisión xestora nos casos previstos nos estatutos.
b) Demisión.
c) Incapacidade física ou psíquica para continuar no exercicio do cargo.
d) Por incorrise en causa de ilexitimidade ou incompatibilidade.
e) Demitidos directamente polo presidente.
Artigo 60º
A xunta directiva, como órgano colaborador do presidente non terá competencias propias, e exercerá por delegación aquelas que lle encomende o presidente, que poderá revogar en calquera momento.
Artigo 61º
Os asuntos ordinarios de trámite serán despachados polo presidente e o secretario.
Título IV
Órganos técnicos e asesores
Capítulo primeiro
Comités en xeral
Artigo 62º
A Federación Galega de Pelota poderá crear, logo de aprobación pola asemblea xeral, cantos comités técnicos precise, ademais dos seguintes:
a) Comité de disciplina deportiva: comité de competición e comité de apelación.
b) Comité de xuíces.
c) Comité de relacións exteriores.
d) Comité de actividades.
e) Comité técnico.
f) Comité de promoción.
Tódolos presidentes dos comités serán nomeados polo presidente da federación galega, de entre os membros da xunta directiva. O secretario intervirá como secretario de tódolos comités, sen voz e sen voto, agás que fose membro deles.
Os comités rexeranse polos seus respectivos regulamentos internos e, se é o caso, pola normativa nacional unificada e emanada da Federación Española de Pelota, pola lexislación aplicable e polo disposto nos presentes estatutos.
Capítulo segundo
Comités de competición
Artigo 63º
O comité galego de competición estará integrado por un xuíz único que será auxiliado por un secretario pertenecente á secretaría da federación galega. O xuíz único será o encargado de coñecer e resolve-los casos, segundo as súas competencias, que son as seguintes:
1) Resolver en primeira instancia.
a) As reclamacións e incidencias que teñan lugar con motivo das competicións de carácter galego ou das fases clasificatorias para acceso ás fases finais nacionais das distintas categorías.
b) As cuestións disciplinarias que se susciten en relación coas persoas sometidas á disciplina da federación galega. Cando se trate de cuestións que afecten a un ou varios membros da xunta directiva da Federación Galega de Pelota, o comité precisará autorización previa do presidente para incoa-lo expediente.
c) Os litixios que se susciten entre xogadores e clubs con motivo da subscrición e expedición de licencias, cando se refiran ás categorías territoriais galegas que, se é o caso, se considerarán como materia disciplinaria cando se aprecie inobservancia das normas, o cal será obxecto da sanción correspondente.
Artigo 64º
Serán seccións do comité galego de competición para tódolos efectos, os comités de competición das delegacións zonais. Os membros destas seccións serán nomeados polo presidente da federación zonal correspondente.
Serán competencia dos comités zonais de competición a resolución en primeira instancia das reclamacións e incidencias que teñan lugar con motivo das competicións das distintas categorías que se desenvolvan dentro do ámbito zonal correspondente.
Capítulo terceiro
Comité galego de apelación
Artigo 65º
O comité galego de apelación da Federación Galega de Pelota estará integrado por tres membros, que serán auxiliados por un secretario pertencente á secretaría da federación galega. O comité será o encargado de coñecer e resolve-los casos que se lle formulen, segundo a súa competencia.
Artigo 66º
É competencia do comité de apelación o coñecemento e resolución de tódolos recursos interpostos contra as resolucións dictadas polos comités zonais de competición ou polo comité galego de competición.
Artigo 67º
Regulamentariamente, e no ámbito das súas competencias, a federación galega desenvolverá o réxime disciplinario, definindo as faltas e sancións establecendo o procedemento que hai que seguir en cada caso, de conformidade coa legalidade vixente na materia. Constituirá falta, que se sancionará de acordo co réxime disciplinario vixente, toda infracción das normas contidas nos presentes estatutos, no Regulamento xeral e en calquera disposición de carácter deportivo que o sinale.
Artigo 68º
As resolucións dictadas polo comité de apelación da Federación Galega de Pelota en relación coas resolucións adoptadas polos comités zonais de competición ou o comité galego de competición poderán se recorridas no prazo de quince días hábiles, a partir da súa notificación, ante o comité galego de disciplina deportiva da Xunta de Galicia, de acordo en cada caso, coa normativa vixente.
Artigo 69º
As resolucións dictadas polo comité galego de competición poderán ser recorridas ante o comité galego de apelación na forma que regulamentariamente se estableza.
As resolucions dictadas polo comité galego de apelación contra resolucións adoptadas polo comité galego de competición poderán ser recorridas ante o comité galego de disciplina deportiva da Xunta de Galicia, na forma que regulamentariamente se estableza.
Capítulo cuarto
Comité de xuíces
Artigo 70º
O comité galego de xuíces é o órgano técnico subordinado á disciplina da Federación Galega de Pelota, que se ten que coidar da captación, ensino e organización dos xuíces e técnicos arbitrais no ámbito galego.
O comité galego de xuíces adoptará a estructura territorial da Federación Galega de Pelota.
Artigo 71º
Serán funcións deste comité:
a) Establece-los niveis de formación de xuíces.
b) Clasificar tecnicamente ós xuíces, en función de criterios prefixados pola asemblea xeral, propoñendo á xunta directiva a adscrición ás categorías correspondentes. Estas clasificacións seranlle comunicadas á asemblea xeral.
c) Propo-los candidatos a xuíces de categorías nacionais.
d) Propor á xunta directiva as normas administrativas que regulan a arbitraxe, para a súa posterior aprobación pola asemblea xeral.
e) Designa-los colexiados nas competicións oficiais de ámbito galego.
f) Colaborar cos órganos competentes da federación.
Artigo 72º
A efectos funcionais, o comité galego de xuíces de Pelota dependerá do comité técnico de xuíces da Federación Española de Pelota, co fin de ter unha estreita unidade orientativa ó servicio da arbitraxe.
Capítulo quinto
Comité de relacións exteriores
Artigo 73º
O comité de relacións exteriores terá como función fundamental a organización e dirección das seleccións galegas, así como as relacións nacionais e internacionais.
Capítulo sexto
Comité de actividades
Artigo 74º
O comité de actividades terá ó seu cargo o estudio, organización, supervisión, dirección e control das competicións.
Capítulo séptimo
Comité técnico
Artigo 75º
O comité técnico terá como función fundamental a planificación, confección, desenvolvemento dos programas relacionados coa pelota, coas escolas de xogadores, adestradores e xuíces, así como aquelas cuestións técnicas que sexan necesarias, como os «clinics», cursos superiores, concentracións, perfeccionamento de xogadores, adestradores e xuíces e tódalas demais cuestións técnicas que sexan necesarias. O presidente da Federación Galega de Pelota poderá nomear un director técnico deste comité, que será un cargo retribuído, se é necesario, e estará ás ordes directas do presidente de dito comité.
Capítulo oitavo
Comité de promoción
Artigo 76º
O comité de promoción terá como función fundamental a promoción do pelota, a proposta de creación de delegacións zonáis, escolas de pelota, guías locais e zonais, así coma de tódalas categorías que poidan crearse, dentro da orientación educativa preceptiva, o asesoramento para a instalación de novas pistas polideportivas, todas aquelas cuestións que sexan propias, como as campañas de captación e divulgación do pelota.
Artigo 77º
Regulamentariamente poderá regularse o funcionamento, composición e competencias dos distintos comités.
Título V
Réxime electoral
Capítulo primeiro
Os censos
Artigo 78º
Compoñerán os censos correspondentes a cada estamento electoral tódolos membros da Federación Galega de Pelota que reúnan os requisitos establecidos para cada estamento nos presentes estatutos e no Regulamento electoral.
Capítulo segundo
Regulamento electoral
Artigo 79º
Os procesos electorais desenvolveranse conforme o Regulamento electoral que deberá ser aprobado pola asemblea xeral, por proposta do presidente e regulará as seguintes cuestións:
1. Número de membros da asemblea xeral.
2. Calendario electoral.
3. Censo electoral.
4. Composición, competencias e funcionamento da xunta electoral.
5. Requisitos para presentación e proclamación de candidatos a presidente e a membros da asemblea xeral non poderá ser inferior a dez días.
6. Procedemento de resolución de conflictos, impugnacións e reclamacións, así como de recursos electorais.
7. Composición, competencia, funcionamento e localización das mesas electorais.
8. Elección de presidente.
9. Elección da comisión delegada.
O Regulamento electoral deberá ser ratificado pola Secretaría Xeral para o Deporte.
Capítulo terceiro
A comisión xestora
Artigo 80º
Acordada a convocatoria de eleccións pola asemblea xeral e aprobado o Regulamento electoral, o presidente procederá no prazo sinalado nel á convocatoria de eleccións á asemblea xeral. A partir deste momento, a xunta directiva e o presidente constituiranse en comisión xestora, e someterán o Regulamento electoral a ratificación pola Secretaría Xeral para o Deporte.
A comisión xestora garantirá a máxima difusión e publicidade das convocatorias de eleccións á asemblea xeral e a presidente, así como do Regulamento electoral cas medidas previstas nas disposicións federativas a través dun medio que permita asegura-la a recepción da dita notificación.
O Regulamento electoral deberá ser exposto en cada circunscrición electoral o mesmo día da convocatoria.
A comisión xestora administrará a federación galega e convocará e realizará novas eleccións no prazo máximo
de tres meses no caso de que non se presentase ningunha candidatura ou non fose válida ningunha das presentadas.
Capítulo cuarto
Circunscricións electorais
Artigo 81º
A circunscrición será única con ámbito de todo o territorio da Federación Galega de Pelota.
Capítulo quinto
Xunta electoral
Artigo 82º
A xunta electoral estará composta por tres membros titulares e tres suplentes, elixidos por elección libre, directa e secreta, de entre as persoas que non sendo candidatas formaran parte da asemblea anterior. Inmediatamente quedará constituída a xunta electoral, exercendo como presidente dela o membro de máis idade dos elixidos, e como secretario, o que o sexa da federación, con voz pero sen voto.
A xunta electoral terá as seguintes funcións:
a) Homologación do censo electoral, resolvendo as cuestións e queixas que se formulen sobre el mesmo en relación coa súa formación ou rectificación.
b) Resolución das queixas, reclamacións e recursos que se presenten con motivo dos diferentes actos electorais.
c) A admisión e proclamación de candidaturas.
d) A proclamación dos resultados electorais.
e) A corrección das infraccións que, eventualmente, se produzan no proceso electoral.
f) Aqueloutras que se deduzan das súa propia natureza ou se lle atribúan pola normativa vixente.
A xunta electoral tomará as súas decisións, que serán executivas, por maioría simple. Unha vez finalizada a votación e o reconto dela, levantará a correspondente acta, que remitirá á Secretaría Xeral para o Deporte nun prazo máximo de tres días.
Unha vez concluído o proceso electoral da asemblea xeral, do presidente da federación e da comisión delegada, a xunta electoral disolverase.
Capítulo sesto
Mesas electorais
Artigo 83º
Para a elección dos distintos estamentos da asemblea xeral do presidente e da comisión delegada, constituirase unha ou varias mesas electorais, de acordo co establecido no Regulamento electoral. Os membros destas mesas non poderán ser candidatos, axustándose no seu funcionamento ás normas que se establezan no Regulamento electoral.
Capítulo sétimo
Recursos
Artigo 84º
As reclamacións e impugnacións que se presenten contra calquera acto electoral dirixiranse á xunta electoral e, contra o que ésta resolva caberá recurso ante o comité galego de disciplina deportiva. Así mesmo caberá recurso ante o comité galego de disciplina deportiva contra tódolos actos, acordos ou resolucións da xunta electoral ou de calquera outro órgano ou membro da federación en materia electoral.
Capítulo oitavo
Eleccions á asemblea xeral
Artigo 85º
1. Os membros da asemblea xeral serán elexidos cada catro anos coincidindo cos Xogos Olímpicos de Inverno, mediante sufraxio libre, secreto, igual e directo entre e polos compoñentes dos distintos estamentos da federación.
2. As eleccións á asemblea xeral serán acordadas por ela, que aprobará a convocatoria con tódolos requisitos que se establezan no Regulamento electoral que así mesmo se aprobe.
3. Acordada pola asemblea xeral a convocatoria de eleccións, o acordo será formalmente executado polo presidente da federación, o cal a asinará.
4. Desde a convocatoria para a celebración desta asemblea xeral, a xunta directiva e o presidente da federación constituiranse en comisión xestora, de acordo co xa previsto nestes estatutos.
Artigo 86º
Para ser candidato a membro da asemblea xeral requirese o cumplimento dos requisitos establecidos con carácter xeral no artigo 37º parágrafo último destes estatutos e os establecidos para ser elector que se indican nos artigos 88º a 90º dos presentes estatutos, referentes á antigüidade.
Os requisitos para ser electores ou elixibles deberán cumprirse no día en que se publique a convocatoria de eleccións.
Artigo 87º
As eleccións á asemblea xeral realizaranse para cada un dos postos correspondentes ós estamentos integrantes dela, de acordo co previsto nos presentes estatutos.
Artigo 88º
Os representantes dos clubs e entidades deportivas na asemblea xeral serán elexidos por entre os representantes dos correspondentes a cada circunscrición electoral dos que integren o censo de entidades deportivas inscritas no rexistro público da federación e no Rexistro de Clubs, Federacións e Asociacións Deportivas da Xunta de Galicia, no momento da convocatoria de eleccións, estivesen igualmente inscritos durante a temporada deportiva anterior, sempre que tivesen participado en competicións ou actividades de carácter oficial organizadas pola federación galega ou pola Federación Española de Pelota.
Artigo 89º
Os representantes dos deportistas na asemblea xeral serán elixidos entre os maiores de 18 anos correspondentes a cada circunscrición electoral dos que teñan licencia en vigor expedida pola Federación Galega de Pelota no momento da convocatoria de eleccións, e a tivesen tamén, alomenos durante a tempada anterior, sempre que participasen en competicións ou actividades de carácter oficial organizadas pola federación galega ou pola Federación Española de Pelota.
Artigo 90º
Os representantes dos técnicos-adestradores e do colectivo de xuíces na asemblea xeral serán elixidos entre os maiores de 18 anos, por e entre os pertencentes a cada estamento calquera que sexa a súa categoría, de entre os que teñan licencia en vigor no momento da convocatoria de eleccións, e que tamén as tivesen, como mínimo, na temporada deportiva inmediatamente anterior, nas mesmas condicións que as establecidas nos dous artigos anteriores.
Capítulo noveno
Elección de presidente
Artigo 91º
Unha vez concluídas as eleccións á asemblea xeral, o presidente da comisión xestora, logo de acordo dela, procederá inmediatamente á convocatoria da dita asemblea para elixi-lo presidente e a comisión delegada da federación galega.
O presidente será elixido por un período de catro anos, coincidindo con anos nos que se celebren Xogos Olímpicos de Inverno, pola asemblea xeral, mediante sufraxio, libre, directo, igual e secreto por tódolos membros da dita asemblea xeral, logo de presentación e aceptación das candidaturas correspondentes, que deberán estar avaladas alomenos polo 10% dos membros da asemblea xeral. Os candidatos a presidente poderán non ser membros da asemblea xeral.
Artigo 92º
Será elixido presidente o candidato que obteña a maioría absoluta dos votos emitidos. No caso de que ningún candidato acade esa maioría procederase a unha segunda votación entre os dous candidatos máis votados, resultando elixido o que obteña a maioría dos votos.
No suposto de que se presentara un só candidato, non se efectuará votación, sendo proclamado presidente o único candidato pola Secretaría Xeral para o Deporte da Xunta de Galicia.
Artigo 93º
Para poder ser candidato a presidente da Federación Galega de Pelota deberán reunirse os seguintes requisitos:
a) Te-la condición de cidadán de Galicia, segundo o disposto en cada momento polo Estatuto de autonomía de Galicia.
b) Ser maior de idade e estar en pleno uso dos dereitos civís.
c) Non estar incurso en ningunha sanción deportiva inhabilitante, dictada polos órganos disciplinarios da
Federación Galega de Pelota ou polo comité Galego de Disciplina Deportiva.
d) Non ter sido condenado mediante sentencia xudicial firme que leve anexa pena principal ou accesoria de inhabilitación absoluta ou especial para o desempeño de cargos públicos.
Artigo 94º
A votación será libre, igual, secreta e directa, non se admitirá o voto por correo, nin por delegación de persoas físicas.
Capítulo décimo
Elección da comisión delegada
Artigo 95º
Na mesma asemblea xeral convocada para a elección do presidente, e unha vez realizada esta, procederase á elección dos membros da comisión delegada da asemblea xeral.
A comisión delegada estará composta por 5 membros, ademais de polo presidente da federación galega.
Os membros da comisión delegada serán elixidos por e entre os integrantes da asemblea xeral.
Serán elixidos membros da comisión delegada aqueles que obteñan maior número de votos ata cubri-lo número de membros correspondentes á comisión delegada.
Título VI
Réxime económico
Artigo 96º
A Federación Galega de Pelota terá un réxime de administración, orzamento e patrimonio propio, e gozará de plena autonomía.
O orzamento de ingresos e gastos anual realizarase de acordo co principio de caixa única.
O tesoureiro someterá á asemblea xeral ordinaria un balance da situación e as contas de ingresos e gastos, memoria económica, así como o orzamento para a temporada seguinte. Balance e orzamento que deberá ser notificado á Secretaría Xeral para o Deporte.
Agás autorización expresa da Secretaría Xeral para o Deporte, non poderá aprobarse un orzamento deficitario.
Tampouco poderán repartirse beneficios entre os membros da federación galega.
Artigo 97º
A Federación Galega de Pelota elaborará unha memoria na que analizará fielmente a súa actividade económica, a súa axeitada actuación orzamentaria, o cumprimento dos seus obxectivos e os proxectos que se van desenvolver, e informará separadamente dos seguintes aspectos:
1. Diferenciación entre ingresos e achegas, segundo a seguinte división:
a) Subvencións públicas.
b) Subvencións, donativos ou achegas privadas.
c) Ventas activos.
d) Ingresos procedentes de competicións organizadas.
e) Ingresos para servicios prestados pola federación, permisos, licencias, inscricións, afiliacións, fichas e outros que se establezan, logo de aprobación pola asemblea.
f) Ingresos financeiros.
2. Tamén constará o destino da totalidade de recursos, distinguindo como mínimo os seguintes grupos de custo ou investimentos:
a) Administración da federación.
b) Dirección e servicios da directiva, incluíndo viaxes.
c) Competicións.
d) Axudas a clubs e entidades.
e) Axudas para actos deportivos.
f) Construccións e outros inmobilizados.
g) Formación de deportistas e técnicos.
h) Deportes de elite profesional.
i) Xuíces.
j) Órganos disciplinarios.
k) Mantemento de delegacións zonais.
3. O importe das obrigas de pagamento que sexa necesario satisfacer noutros exercicios que non estea previstos no balance.
4. O importe das garantías e os avais comprometidos.
5. A liquidación do orzamento, que explique as variacións en relación co orzamento aprobado na asemblea xeral anterior.
Artigo 98º
As contas anuais e os orzamentos deberán estar no domicilio social da federación galega cunha antelación mínima de 15 días á data de celebración da asemblea xeral, a disposición das persoas, clubs ou entidades con dereito a voto nela, das cales poderán pedir copia que lles será entregada antes da celebración da asemblea.
Artigo 99º
Constitúen os ingresos da Federación Galega de Pelota os seguintes:
a) As subvencións que poida recibir do Estado, Xunta de Galicia, Federación Española de Pelota, diputacións, concellos ou calquera outras entidades públicas ou privadas.
b) Os ingresos obtidos por afiliacións, inscricións, fichas, licencias, servicios e outros ingresos que se establezan, logo de aprobación polos órganos correspondentes.
c) A participación que se poida fixar nos ingresos de toda orde que teñan as asociacións, agrupacións, clubs e resto de entidades, logo de aprobación pola asemblea xeral.
d) O importe das sancións e multas que se produzan a consecuencia das competicións que a federación organice, e con ocasión do exercicio da potestade disciplinaria.
e) O beneficio que se obteña por calquera concepto e se produza en actos, encontros e competicións que se organicen.
f) Os donativos, subvencións e outros ingresos que se deriven do exercicio da actividade propia da federación.
g) Os préstamos ou créditos que se lle concedan.
h) Os procedentes de calquera actividade legal que a título lucrativo ou por explotación ou arrendamento dos seus bens se produzan en favor da federación.
Artigo 100º
A totalidade de ingresos e do patrimonio da Federación Galega de Pelota deberán ser destinados á consecución dos fins propios do seu obxecto social, e, en particular á promoción e ensino do pelota.
Artigo 101º
En consonancia co disposto no artigo 57.3º anterior, a xestión económica ordinaria da federación correrá por conta do tesoureiro, baixo a dirección do presidente, coidando das operacións de cobramentos e pagamentos. Autorizará coa súa sinatura, mancomunada ca do presidente, ou coa do vicepresidente autorizado, tódolos documentos de movementos de fondos. Será responsable da levanza e custodia dos libros contables. Formulará balances que, anualmente, deberán presentarse á asemblea xeral para a súa aprobación.
No suposto de ausencia do tesoureiro, será o presidente da Federación Galega de Pelota o responsable do exercicio das funcións propias daquel, as cáles poderá delegar na persoa que estime oportuno.
Artigo 102º
O exercicio económico comeza o día 1 de xaneiro e remata o 31 de decembro.
Título VII
Réxime documental
Artigo 103º
A Federación Galega de Pelota levará como mínimo os seguintes libros, debidamente dilixenciados:
a) Libro rexistro de entrada e saída de documentos e comunicacións oficiais.
b) Libro rexistro de clubs, no que constará a denominación destes, domicilio social, e número de inscrición no rexistro de Clubs, Federacións e Entidades Deportivas da Xunta de Galicia.
c) Libros de actas que consignarán as reunións que celebren tódolos órganos colexiados da federación, tanto de goberno e representación como complementarios e técnicos.
d) Libros de contabilidade.
e) Libro inventario de bens mobles e inmobles.
f) Rexistro de membros da asemblea xeral e da comisión delegada, no que deberán consta-los nomes dos titulares ou representantes legais e os domicilios para citacións e comunicacións.
Artigo 104º
En consonancia co previsto no artigo 57.2º anterior, o réxime documental da Federación Galega de Pelota estará a cargo do secretario, ó cal lle corresponde a custodia dos libros da federación, levantar actas das reunións dos órganos colexiados e, unha vez aprobadas, asinadas co visto e prace do presidente, expedir certificacións, remiti-las certificacións e acordos que procedan á Secretaría Xeral para o Deporte e, en xeral, prepara-la resolución e despacho de tódolos asuntos.
En caso de ausencia ou imposibilidade física do propio secretario, as súas funcións serán desempeñadas polo propio presidente da federación galega, ou por persoa en quen este delegue.
Título VIII
Da modificación de estatutos e da disolución da Federación Galega de Pelota
Artigo 105º
Os estatutos da Federación Galega de Pelota soamente poderán ser modificados pola asemblea xeral e de acordo co establecido neles.
Artigo 106º
A proposta de modificación dos estatutos deberá ser acordada polo presidente ou pola comisión delegada da Federación Galega de Pelota nomeándose de seguido por ela unha comisión técnica que realice os traballos necesarios para presentar ante a asemblea os novos textos, totais ou parciais, que se someterán a aprobación.
Aprobada a reforma de estatutos pola asemblea xeral, deberá ser ratificada pola Secretaría Xeral para o Deporte.
Artigo 107º
A Federación Galega de Pelota extinguirase polas seguintes causas:
a) Por acordo da maioría de dous tercios de membros da asemblea xeral, referendado, por maioría absoluta, por tódolos membros da Federación Galega de Pelota a través de votación libre, igual, directa e secreta.
b) Polas demais causas que determinen as leis.
Unha vez producida a liquidación, o patrimonio neto destinarase ós fins de carácter deportivo que determine a Secretaría Xeral para o Deporte da Xunta de Galicia.
Disposición transitoria
Primeira.-A norma sinalada no parágrafo segundo, do artigo 39 anterior, terá con carácter obrigatorio e imperativo para tódolos clubs e entidades deportivas, polo que se abre un prazo dun ano a partir da aprobación destes estatutos para que se inscriban no Rexistro Xeral de Clubs, Federacións e Entidades Deportivas da Xunta de Galicia, tódolos clubs e entidades deportivas que estaban rexistrados soamente na Federación Galega de
Pelota, podendo ser mentres tanto membros da axamblea xeral.
Disposición adicional
Primeira.-En todo o previsto nos presentes estatutos e namentres non se confeccionen os regulamentos e normas de carácter xeral, por analoxía seguirase o disposto polo Estatuto da Federación Española de Pelota e na Orde do 28 de xullo de 1995, da Consellería da Presidencia e Administración Pública da Xunta de Galicia, que desenvolve o Decreto 228/1994, do 14 de xullo, regulador das federacións deportivas galegas.
Disposición derrogatoria e final
Os presentes estatutos, unha vez aprobados pola asemblea xeral da Federación Galega de Pelota, entrarán en vigor o mesmo día da súa sanción pola Secretaría Xeral para o Deporte da Xunta de Galicia: quedando desde entón derrogada toda norma que se opoña ó disposto neles, e en particular os estatutos aprobados en data, así como Regulamento xeral de desenvolvementos deles.
9723
