O Pleno do Concello de Vilagarcía de Arousa, en sesións celebradas o 29 de xuño e 19 de setembro de 1996, acorda cederlle gratuitamente ó Servicio Galego de Saúde a titularidade do predio denominado Estromil, propiedade do concello e sito en Ande-Rubiáns, para a construcción do Hospital Comarcal do Salnes.

Conforme o artigo 17.1º da Lei 3/1985, do 12 de abril, do patrimonio da Comunidade Autónoma, requírese decreto do Consello da Xunta de Galicia, para a adquisición de bens a título gratuíto. Por outra banda, o artigo 23.1º da mesma lei establece que non se poderán adquirir bens ou dereitos a título lucrativo cando o valor dos gravames cargas ou afeccións impostos sobre estes exceda o seu valor intrínseco, se ben non se consideran cargas, gravame ou afección ós investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente.

En cumprimento do disposto na Lei 3/1985, do 12 de abril, do patrimonio da Comunidade Autónoma, de conformidade coa proposta do conselleiro de Sanidade e Servicios Sociais e presidente do Servicio Galego de Saúde e coas condicións estipuladas nos acordos do Pleno do Concello de datas 29 de xuño e 19 de setembro de 1996, logo de deliberación do Consello da Xunta de Galicia na súa reunión do día dezasete de outubro de mil novecentos noventa e seis,

DISPOÑO:

Artigo 1º

1. Acéptase a cesión a título gratuíto, feita polo Concello de Vilagarcía de Arousa a favor do Servicio Galego de Saúde, para a construcción do Hospital Comarcal do Salnés.

2. O predio cedido denominado Estromil, ten unha superficie de 22.298 m e está sito en Ande-Rubiáns, concello de Vilagarcía de Arousa, e os seus lindes son seguintes:

-O norte: camiño.

-O sur: terreos dos herdeiros de Joquín Caamaño Fuentes e María González Cascallar.

-O leste: máis terreos dos mesmos propietarios no municipio de Vilanova de Arousa.

-O oeste: terreos de Manuel Crespo Magariños.

Artigo 2º

O inmoble cédese libre de cargas e destinarase á construcción do Hospital Comarcal do Salnés. Así mesmo, como garantía do cumprimento deste fin, o Concello de Vilagarcía de Arousa asumirá as responsabilidades que se deriven pola conclusión do expediente expropiatorio.

Artigo 3º

O Servicio Galego de Saúde a través do seu órgano competente procederá á formalización da aceptación no correspondente documento público, e á inscrición do inmoble no Rexistro da Propiedade o seu nome, integrándose no seu patrimonio propio.

Disposición derradeira

O Servicio Galego de Saúde, a través do seu órgano competente levará a cabo os trámites necesarios para a efectividade de canto se dispón neste decreto.

Santiago de Compostela, dezasete de outubro de mil novecentos noventa e seis.

Manuel Fraga Iribarne

Presidente

José María Hernández Cochón

Conselleiro de Sanidade e Servicios Sociais e presidente do Servicio Galego de Saúde

6001