O proceso iniciado cos acordos autonómicos do 28 de febreiro de 1992 e que culmina coa aprobación da Lei orgánica 9/1992, do 23 de decembro, supuxo a ampliación e equiparación competencial entre as diferentes comunidades autónomas. Sen embargo, algunhas das competencias, que inicialmente se recollen en tódolos estatutos non se inclúen na Lei orgánica 1/1981, do 6 de abril, que aproba o Estatuto de autonomía para Galicia.
No marco dese proceso de ampliación competencial, a introducción dun criterio de racionalización para permitir un funcionamento ordenado e estable do estado autonómico no seu conxunto, xustifica a necesidade de completa-las competencias que a Comunidade Autónoma de Galicia pode exercer equiparándose así ás restantes comunidades autónomas.
Esta ampliación instruméntase por medio da Lei orgánica 16/1995, do 27 de decembro (BOE do 28
de decembro, nº 310), que, utilizando a vía do artigo 150.2º da Constitución, dispón no seu artigo 2.C a transferencia á Comunidade Autónoma de Galicia da competencia exclusiva en materia de transporte marítimo, o exercicio do cal axustarase ó disposto polo Estado nos termo previstos no artigo 149.1.20 do texto constitucional.
De conformidade co Real decreto 581/1982, do 26 de febreiro, a Comisión Mixta de Transferencias, prevista na disposición transitoria cuarta do Estatuto de autonomía, adoptou na súa reunión do 25 de xuño de 1996 o oportuno acordo polo que se concretan as funcións e servicios da Administración do Estado, que deberá ser obxecto de traspaso á Comunidade Autónoma en materia de transporte marítimo, acordo que se plasma no Real decreto 1641/1996, do 5 de xullo (DOG do 31 de xullo, nº 149).
Por canto antecede e en exercicio da potestade autorganizativa que o artigo 27.2º do estatuto recoñece, é polo que por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión de trece de setembro de mil novecentos noventa e seis,
DISPOÑO:
Artigo 1º
Asúmense as competencias transferidas á Comunidade Autónoma por Lei orgánica 16/1995, do 27 de decembro, en materia de transporte marítimo e, por conseguinte, as funcións e servicios que deben ser obxecto de traspaso así como os medios financeiros a eles adscritos, nos termos e condicións especificadas no acordo adoptado pola Comisión Mixta de Competencias, na súa reunión do 25 de xuño de 1996, publicado como anexo do R.D. 1641/1996, do 5 de xullo.
Artigo 2º
As funcións e servicios asumidos de conformidade co disposto no artigo anterior asígnanse á Consellería de Política Territorial, Obras Públicas e Vivenda.
Disposicións derradeiras
1. O conselleiro de Política Territorial, Obras Públicas e Vivenda dictará cantas disposicións sexan precisas para o desenvolvemento e eficacia do establecido no presente decreto.
2. Este decreto entrará en vigor o mesmo día da súa publicación no Diario Oficial de Galicia.
Santiago de Compostela, trece de setembro de mil novecentos noventa e seis.
Manuel Fraga Iribarne
Presidente
Dositeo Rodríguez Rodríguez
Conselleiro da Presidencia e Administración Pública
6727