O Pleno Municipal, na sesión celebrada o día 25 de xuño de 1996, adoptou o seguinte acordo, en réxime de competencia delegada polo artigo 2 da Lei 7/1995, do 29 de xuño, de delegación e distribución de comnpetencias en materia de urbanismo:
Aprobar, con carácter definitivo, un documento redactado polos servicios técnicos municipais polo que se introducen modificacións puntuais no Plan Xeral de Ordenación urbana nos seguintes aspectos:
a) Definición do concepto de semisoto e modificación puntual do punto 6.2.21 das ordenanzas do PXOU derivada da introducción deste concepto.
b) Modificación do punto 8 nas ordenanzas 2 e 3, introducindo unha posibilidade excepcional de situa-las edificacións a máis distancia da aliñación mediante a tramitación dun estudio de detalle.
c) Modificación do ámbito da U.A. 63 e cambio da súa cualificación.
d) Reaxuste dunha vía existente no PXOU e a súa conexión ó sistema xeral coa creación dunha nova vía a través dunha unidade de execución que se delimita como U.E.-1 da zona de Vilaboa.
e) Incorporación da vía, denominado r/ Eduardo Blanco Amor, en As Brañas.
f) Incorporación da vía denominado r/ Mosteiro de Sobrado, en Acea de Ma.
Seguidamente publícase o texto das modificacións introducidas na normativa do PXOU.
-Punto 6.2.21.
Engádese un apartado 7 co seguinte texto:
«7.-Excepcionalmente nas ordenanzas nas que se prevexa o uso de vivenda unifamiliar con configuracións do terreo nas que a vía á que se dá fronte a parcela que está por enriba da mesma e puidese
aparecer semisotos, permitirase a construcción destes coas seguintes condicións:
a) Non poderán exceder de 3 m na súa fachada posterior ou laterais, medidos desde a rasante do terreo en contacto coa edificación ata a parte superiro do forxado do teito do semisoto.
Neste suposto e para efectos da forma de medición de alturas establecidas nos puntos 1 e 2 deste artigo, non se considerará como planta a de semisoto, permitíndose supera-la altura máxima establecida en metros pola ordenanza correspondente en 3 m, neste caso non será de aplicación o disposto no número 3 deste artigo.
b) En ningún caso se permitirán remodelacións do terreo que supoñan a elevación da plataforma de asento da edificación, nin as tendentes a favorece-la aparición de semisoto.»
-Punto 10.2. Ordenanza nº 2. Residencial extensiva.
Engádese un novo parágrafo ó apartado 8 co seguinte texto:
«Excepcionalmente e mediante a tramitación dun estudio de detalle poderán situarse as edificacións a máis distancia da establecida no parágrafo anterior».
-Punto 10.3. Ordenanza nº 3. De asentamento disperso.
Engádese nun novo parágrafo ó apartado 8 co seguinte texto:
«Excepcionalmente e mediante a tramitación dun estudio de detalle poderán situarse as edificacións a máis distancia da establecida no parágrafo anterior.»
A eficacia e entrada en vigor das modificacións aprobadas producirase na forma establecida no artigo 8 d), parágrafo 2º da Lei 7/1995 anteriormente citada.
O acordo adoptado esgota a vía administrativa sendo directamente impugnable ante a xurisdicción contencioso-administrativa de conformidade coa súa lexislación reguladora.
Culleredo, 27 de xuño de 1996.
Julio Sacristán de Diego
Alcalde
Números de teléfono do Diario Oficial de Galicia
Teléfonos: 544268 - 544270
Fax: 544272 - 544273