Dentro dos programas de actividades que a Academia Galega de Seguridade ten previsto realizar no ano 1996 e conforme as funcións atribuídas pola Lei 4/1992, do 9 de abril, de creación da Academia Galega de Seguridade, a formación dos bombeiros é unha das tarefas encomendadas á devantida academia.
Con base no anterior anúnciase a celebración dun curso práctico sobre primeiros auxilios e excarceración, que deberá desenvolverse conforme as seguintes bases:
Obxectivos.
Dota-lo colectivo de bombeiros de Galicia dos coñecementos necesarios no tema de primeros auxilios e excarceración, co fin de que cando teñan que intervir en situacións de emerxencia
o fagan con total seguridade.
Destinatarios.
O curso vai dirixido ós membros dos corpos de bombeiros da Comunidade Autónoma de Galicia.
Prazas.
O número de prazas ofertadas para este curso é de 40.
Inscrición.
A inscrición dos participantes será totalmente gratuíta.
Solicitudes.
1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo, acompañada dunha fotocopia do DNI e do carné profesional.
2. O prazo para a presentación de instancias rematará o día 2 de setembro de 1996, ás 14 horas.
3. As instancias deberán vir asinadas polo xefe do cadro de persoal e seladas, o que será esto requisito indispensable para ser admitido no curso; o incumprimento deste requisito suporá á non admisión no devandito curso.
4. As instancias deberán enviarse á sede da Academia Galega de Seguridade: rúa de Madrid, 2-4, polígono das Fontiñas, 15703, Santiago de Compostela, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Contido e duración.
O curso terá unha duración de 40 horas lectivas, e nel trataranse, entre outros, os seguintes temas:
a)Primeiros auxilios. Queimaduras.
b) Traumatismos craneoencefálicos e da columna.
c) Traumatismos toraco-abdominais.
d)Fracturas, escordeduras e contusións.
e) Transporte do lesionado.
f) O SOS Galicia. A asistencia de emerxencia na nosa comunidade.
g) Excarceración.
h) Rescate de feridos con helicópteros.
Datas.
O curso terá lugar do 9 ó 13 de setembro de 1996.
O horario será de 10 a 14 horas e de 16 a 20 horas.
Relación de admitidos.
A relación de admitidos publicarase o día 4 de setembro, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.
Lugar.
Na sede da Academia Galega de Seguridade, sita na rúa Madrid 2-4, Polígono das Fontiñas, Santiago de Compostela.
Certificado de asistencia.
Ó remate do curso entregaráselles un certificado de asistencia a aquelas persoas que acrediten a súa participación continuada a el, non podendo supera-las faltas de asistencia un 15% do total da duración de horas lectivas do curso; unha inasistencia superior ó 15%, aínda que sexa xustificada, suporá a non expedición do certificado.
Modificacións.
A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.
Santiago de Compostela, 26 de xuño de 1996.
Juan José Fariñas-Ferro Rodríguez
Director xeral da Academia Galega de Seguridade
5054