Dentro dos programas de actividades que a Academia Galega de Seguridade ten previsto realizar no ano 1996 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dun curso sobre problemática en municipios turísticos, que deberá desenvolverse conforme as seguintes bases:
Obxectivos.
O curso ten por obxectivo principal da-los coñecementos necesarios en materia turística, para que os policías poidan atallar e resolve-los posibles problemas que se lles poidan presentar en época estival.
Destinatarios.
O curso vai dirixido ós membros dos corpos das policías locais de Galicia.
Inscrición.
A inscrición dos participantes será totalmente gratuíta.
Prazas.
O número de prazas que se ofertarán neste curso será de 40.
Solicitudes.
1. O persoal que desexe participar neste curso deberá presentar cuberta á máquina ou con letra moi clara, a instancia que figura no anexo, acompañada dunha fotocopia do DNI, e do carné profesional.
2. O prazo para a presentación de instancias rematará o día 30 de maio, ás 14 horas.
3. As instancias deberán vir asinadas polo xefe do cadro de persoal, ou polo concelleiro de tráfico e seladas, será isto requisito indispensable para ser admitido no curso; o incumprimento deste requisito suporá a non admisión no devandito curso.
4. As instancias deberán enviarse á sede da Academia Galega de Seguridade: rúa de Madrid, 2-4,
polígono das Fontiñas, 15703, Santiago de Compostela, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Contido e duración.
O curso celebrarase en sesións de tarde, de luns a venres, e nel trataranse, entre outros, os seguintes temas:
a) Tráfico: regulación, concentracións, párking, retirada e inmobilizacións de vehículos.
b) Alcoholemia: controis, a nova regulación.
c) Hostelería: reclamacións por distintas cuestións, prezos abusivos, mala calidade, medidas territoriais.
d) Extranxeiros: non residentes, identificación, detención, menores, denuncias por tráfico.
e) Movidas nocturnas: horarios de peche dos locais, ruídos no exterior deles, altercados e alteracións da orde, tráfico de drogas, consumo de alcohol por menores, venda de tabaco e acceso a locais.
f) Venda ambulante: venda, ruídos.
Datas.
O curso celebraráse en datas do 17 ó 21 de xuño, en horario de 16 a 20 horas do serán.
Realción de admitidos.
A relación de admitidos publicarase o día 6 de xuño, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.
Lugar.
O curso desenvolveráse no concello de Foz, quedando por determina-lo lugar de celebración, que se comunicará previamente xunto coa lista de admitidos.
Certificado de asistencia.
Ó remate do curso entregaráselles un certificado de asistencia a aquelas persoas que acrediten a súa participación continuada a el. Non poderán supera-las faltas de asistencia un 15% do total da duración de horas lectivas do curso; unha inasistencia superior ó 15%, aínda que sexa xustificada, implicará a non expedición do certificado.
Modificacións.
A Academia Galega de Seguridade poderá modificá-lo desenvolvemento do curso para adaptalo ás necesidades da Administración e ás continxencias que poidan xurdir.
Santiago de Compostela, 18 de abril de 1996
Juan José Fariñas-Ferro Rodríguez
Director xeral da Academia Galega de Seguridade
3470
