Dentro dos programas de actividades que a Academia Galega de Seguridade ten previsto realizar no ano 1996 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración de 2 cursos sobre dereito administrativo policial básico, que deberán desenvolverse conforme as seguintes bases:

Obxectivos:

Os cursos teñen por obxectivos inicia-lo policía no estudio do dereito administrativo policial e dotalo dunha formación teórico-práctica que lle sexa útil no desempeño posterior do seu labor profesional.

Destinatarios:

Os cursos van dirixidos ós membros dos corpos das policías locais de Galicia, e membros da Unidade do C.N.P. adscrita á Comunidade Autónoma de Galicia.

Inscrición:

A inscrición dos participantes será totalmente gratuíta.

Prazas:

O número de prazas que se ofertarán para cada curso será de 40.

Solicitudes:

1. O persoal que desexe participar nestes cursos deberá presentar, cuberta á máquina ou con letra moi clara, a instancia que figura no anexo, acompañada dunha fotocopia do DNI e do carné profesional.

2. O prazo para a presentación de instancias rematará ás 14 horas, nas seguintes datas.

-A Coruña: o día 11 de abril.

-Ferrol: o día 15 de maio.

3. As instancias deberán vir asinadas polo xefe do cadro de persoal e seladas, será isto requisito indispensable para ser admitido nos cursos; o incumprimento deste requisito suporá á non admisión no devandito curso.

4. As instancias deberán enviarse á sede da Academia Galega de Seguridade: rúa de Madrid, 2-4 Polígono das Fontiñas, 15703, Santiago de Compostela, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contido e duración:

Os cursos celebraranse en sesións de tarde, de luns a venres, e neles trataranse, entre outros, os seguintes temas:

a) Actos e procedementos administrativos.

b) Actos e espectáculos pùblicos.

c) Armas e explosivos.

d) Lei de seguridade cidadán.

Datas:

Os cursos celebraranse nas seguintes datas:

-A Coruña: do 22 ó 26 de abril.

-Ferrol: do 3 ó 7 de xuño.

O horario será de 16 a 20 horas do serán.

Relación de admitidos:

A relación de admitidos publicaráse nas seguintes datas:

-A Coruña: o día 16 de abril.

-Ferrol: o día 21 de maio.

Esta relación publicarase no taboleiro de anuncios da Academia Galega de Seguridade, ou ben poden

confirma-la súa asistencia chamando ó teléfono (981) 56 34 00.

Lugar:

Os cursos desenvolveranse nas cidades da Coruña e Ferrol, quedando por concreta-lo seu lugar de celebración, que se comunicará previamente xunto coa lista de admitidos.

Certificado de asistencia:

Ó remate dos cursos entregaráselle un certificado de asistencia a aquelas persoas que acrediten a súa participación continuada a ela, non podendo supera-las faltas de asistencia un 15% do total da duración de horas lectivas do curso; unha non asistencia superior ó 15%, aínda que sexa xustificada, suporá a non expedición do certificado.

Modificacións:

A Academia Galega de Seguridade poderá modifica-lo desenvolvemento dos cursos para adapta-los ás necesidades da Administración e ás continxencias que poidan xurdir.

Santiago de Compostela, 13 de marzo de 1996.

Juan José Fariñas-Ferro Rodríguez

Director xeral da Academia Galega de Seguridade

2310