Dentro dos programas de actividades que a Academia Galega de Seguridade ten previsto realizar no ano 1996 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración de dous cursos sobre venda ambulante, que deberán desenvolverse conforme ás seguintes bases:

Obxectivos:

Os cursos teñen por obxectivos:

a) Coñece-la regulación xurídica estatal e autonómica sobre venda ambulante: o Real decreto 1010/1985, do 5 de xuño.

b) Coñecer das competencias das comunidades autónomas e das corporacións locais na regulación e control da venda ambulante.

c) Coñece-las intervencións da policía local en relación coa venda ambulante.

Destinatarios:

Os cursos van dirixidos ós membros dos corpos das policías locais de Galicia.

Inscrición:

A inscrición dos participantes será totalmente gratuíta.

Prazas:

O número de prazas que se ofertarán por curso será de 50.

Solicitudes:

1. O persoal que desexe participar nestes cursos deberá presentar, cuberta á máquina ou con letra moi clara, a instancia que figura no anexo, acompañada dunha fotocopia do DNI e do carné profesional.

2. O prazo para a presentación de instancias rematará ás 14 horas nas seguintes datas:

-Vigo: 1 de abril.

-Verín: 24 de abril.

3. As instancias deberán vir asinadas polo xefe do cadro de persoal e seladas, será isto requisito indispensable para ser admitido nos cursos; o incumprimento deste requisito implicará a non admisión ó devandito curso.

4. As instancias deberán enviarse á sede da Academia Galega de Seguridade: Rúa de Madrid, 2-4 Polígono das Fontiñas, 15703, Santiago de Compostela, ou ben poden entregarse en calquera dos lugares

previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contido e duración:

Os cursos celebraránse en sesións de tarde, de luns a venres, e neles trataranse entre outros os seguintes temas:

-Lexislación sobre venda ambulante: regulación xurídica sectorial estatal, regulación de competencias das diferentes administracións públicas.

-Regulación do fenómeno nas ordenanzas muicipais.

-Intervención policial sobre venda ambulante: prácticas de confección de denuncias.

Datas:

Os cursos celebraránse nas seguintes datas:

-Vigo: do 8 ó 12 de abril.

-Verín: do 27 ó 31 de maio.

O horario será de 16 a 20 horas do serán.

Relación de admitidos:

A relación de admitidos publicaráse nas seguintes datas:

-Vigo: 3 de abril.

-Verín: 8 de maio.

Esta relación publicarase no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.

Lugar:

Os cursos desenvolveranse nos concellos de Vigo e Verín, quedando por concreta-lo seu lugar de celebración, que se comunicará previamente xunto coa lista de admitidos.

Certificado de asistencia:

Ó remate de cada curso entregaráselle un certificado de asistencia a aquelas persoas que acrediten a súa participación continuada, non podendo supera-las faltas de asistencia un 15% do total da duración de horas lectivas do curso; unha non asistencia superior ó 15%, aínda que sexa xustificada, suporá a non expedición do certificado.

Modificacións:

A Academia Galega de Seguridade poderá modifica-lo desenvolvemento dos cursos para adaptalos ás necesidades da Administración e ás continxencias que poidan xurdir.

Santiago de Compostela, 12 de marzo de 1996.

Juan José Fariñas-Ferro Rodríguez

Director xeral da Academia Galega de Seguridade

1814