Dentro dos programas de actividades que a Academia Galega de Seguridade ten previsto realizar no ano 1996 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración de dous cursos sobre «atestados e investigación de accidentes de tráfico», que deberán desenvolverse conforme ás seguintes bases:

Obxectivos:

Os cursos teñen por obxectivo principal da-los coñecementos necesarios en materia de atestados en accidentes de tráfico, para que os policías poidan desenvolve-lo seu labor, tal e como require a autoridade xudicial.

Destinatarios:

Os cursos van dirixidos ós membros dos corpos das policías locais de Galicia.

Inscrición:

A inscrición dos participantes será totalmente gratuíta.

Prazas:

O número de prazas que se ofertarán por curso será de 40.

Solicitudes:

1. O persoal que desexe participar nestes cursos deberá presentar cuberta a máquina ou con letra moi clara, a instancia que figura no anexo, acompañada dunha fotocopia do DNI, e do carné profesional.

2. O prazo para a presentación de instancias rematará nas seguintes datas, ás 14 horas:

-Pontevedra: 1 de abril.

-Ferrol: 10 de abril.

3. As instancias deberán vir asinadas polo xefe do cadro de persoal e seladas, será isto requisito indispensable para ser admitido nos cursos; o incumprimento deste requisito levará consigo á non admisión ó devandito curso.

4. As instancias deberán enviarse á sede da Academia Galega de Seguridade: Rúa de Madrid, 2-4, Polígono das Fontiñas, 15703, Santiago de Compos

tela, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contido e duración:

Os cursos celebraranse en sesións de tarde, de luns a venres, e neles trataranse, entre outros, os seguintes temas:

a) Competencias da policía local en materia de accidentes de tráfico.

b) Concepto e clases de accidentes de tráfico.

c) Investigación de accidentes de tráfico.

d) Planificación da investigación.

e) Croquis e informes técnicos.

f) Resolución de diversos casos prácticos.

g) Alcoholemia en relación cos accidentes de tráfico.

Datas:

Os cursos celebraranse nas seguintes datas:

-Pontevedra: do 8 ó 12 de abril.

-Ferrol: do 22 ó 26 de abril.

O horario será de 16 a 20 horas do serán.

Relación de admitidos:

A relación de admitidos publicarase nas seguintes datas:

-Pontevedra: 2 de abril.

-Ferrol: o día 16 de abril.

Esta relación publicarase no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.

Lugar:

Os cursos desenvolveranse nas cidades de Pontevedra e Ferrol, queda por determina-lo lugar de celebración, que se comunicará previamente xunto coa lista de admitidos.

Certificado de asistencia:

Ó remate dos cursos entregaráselle un certificado de asistencia, a aquelas persoas que acrediten a súa participación continuada nel, non podendo supera-las faltas de asistencia un 15% do total da duración de horas lectivas do curso; unha non asistencia superior ó 15%, aínda que sexa xustificada, implicará á non expedición do certificado.

Modificacións:

A Academia Galega de Seguridade poderá modificá-lo desenvolvemento dos cursos para adaptalos ás necesidades da Administración e ás continxencias que poidan xurdir.

Santiago de Compostela, 12 de marzo de 1996

Juan José Fariñas-Ferro Rodríguez

Director xeral da Academia Galega de Seguridade

2213