Un dos obxectivos da Consellería de Industria e Comercio é a promoción e mellora de equipamentos comerciais de uso colectivo e de carácter social mediante a concesión de subvencións ós concellos galegos para a realización destes investimentos. Por todo isto,
DISPOÑO:
Artigo 1º
1. Establécense axudas económicas ós concellos galegos, articuladas para a mellora e modernización de equipamentos comerciais municipais de uso colectivo e de carácter social: mercados retallistas, prazas de abastos e zonas e rúas de uso peonil-comercial, que se realicen durante o presente ano 1996.
As axudas establecidas serán con cargo á aplicación orzamentaria 08.03.521-A 761.0 «Transferencias de capital. Corporacións locais. Equipamentos comerciais de carácter social» e estarán limitadas polos créditos dispoñibles para este fin.
2. A contía de cada subvención non poderá superar, en ningún caso, o 70% do importe do investimento realizado. A suma desta e doutras subvencións concedidas para o mesmo fin non poderá supera-lo 90% do investimento.
Artigo 2º
1. As solicitudes para a obtención destas subvencións deberán dirixirse ós delegados provinciais da Consellería de Industria e Comercio e presentaránse no rexistro destas delegacións ou en calquera das formas previstas no artigo 38 da Lei 30/1992, de 26 de novembro, de réxime xurídico das administracións públicas e do procedemento administrativo común.
2. O prazo de presentación das solicitudes será de 1 mes, contado desde o día seguinte ó da publicación desta orde no Diario Oficial de Galicia.
Artigo 3º
A documentación, que deberá xuntarse por triplicado á solicitude en documentos orixinais ou copias cotexadas polo funcionario habilitado para o efecto, é a seguinte:
a) Instancia segundo o modelo descrito no anexo.
b) Certificación do acordo de aprobación, polo correspondente órgano municipal, do proxecto de
investimento, da solicitude de subvención e do plan de financiamento do proxecto.
c) Memoria na que se xustifique a necesidade do investimento, os obxectivos perseguidos e as datas de comezo e remate previstas. Deberá incluír, ademais, o estado actual do mercado ou zona urbana peonil-comercial con detalle das súas instalacións, antigüidade, capacidade comercial e adecuación ás súas necesidades e funcións.
d) Indicación expresa de se solicitou ou non, ou se ten previsto solicitar, algún tipo de axuda para o mesmo fin e, en caso afirmativo, indicación da contía e organismo do que se solicita.
e) Fotocopia da tarxeta indicativa do código de identificación fiscal do concello.
Artigo 4º
Así mesmo, presentarase a seguinte documentación na forma prevista no artigo anterior nos supostos que se relacionan:
a) No caso de obras xuntarase copia do proxecto da obra realizada por técnico facultativo, visado polo colexio correspondente.
b) No caso de equipamentos, factura pro forma que indique as características e orzamentos dos investimentos que se van realizar.
c) No caso de edificacións e instalacións, título de propiedade ou documentos acreditativos da concesión administrativa do terreo ou inmobles nos que estea previsto realiza-lo investimento.
d) No caso de investimento en rúas ou zonas de uso peonil-comercial, estudio técnico da viabilidade do proxecto.
Artigo 5º
1. Se a solicitude e a documentación anexa non reúnen os requisitos sinalados nos artigos 2, 3 e 4, requiriranse ós concellos solicitantes para que, nun prazo de dez días, emenden os defectos e xunten os documentos preceptivos con indicación de que, no caso de non cumprilo, procederase ó arquivo da solicitude sen ulterior trámite, de conformidade co establecido no artigo 71.1º da Lei 30/1992, do 26 de novembro, de réxime xurídico das administracións públicas e do procedemento administrativo común.
2. As delegacións provinciais respectivas poderán reclamar dos solicitantes a documentación adicional que consideren oportuna.
Artigo 6º
1. Os servicios das delegacións provinciais analizarán as solicitudes de acordo coas prioridades sinaladas no seguinte parágrafo e a importancia social e comercial do equipamento.
2. Terán prioridade para a obtención das subvencións:
a) Os proxectos destinados á adecuación de edificios, instalacións e equipos no caso de mercados
municipais retallistas e de abastos nos municipios con poboación de dereito superior ós 5.000 habitantes.
b) Os proxectos de obras e instalacións de rúas e prazas de uso peonil-comercial, cando estean situadas en núcleos urbanos que teñan gran densidade comercial.
Artigo 7º
1. Os delegados provinciais, á vista dos informes de avaliación, e daqueles outros que sexan de interese, conforme o establecido no Decreto 88/1990, do 15 de febreiro, sobre desconcentración de competencias para a concesión de axudas e subvencións nos delegados provinciais ou territoriais da Xunta de Galicia, dictarán a resolución que proceda, que esgotará a vía administrativa e que lles será notificada ós beneficiarios.
2. A efectividade da devandita resolución queda condicionada a que o interventor municipal certifique no prazo máximo dun mes desde a notificación da dita resolución, a existencia de consignación orzamentaria para a realización do proxecto obxecto da solicitude, concretando a partida e dotación orzamentaria destinada para tal fin.
3. A non notificación da resolución no prazo de tres meses desde a presentación da solicitude determinará a súa desestimación presunta, nos termos sinalados nos artigos 43 e 44 da Lei 30/1992, do 26 de novembro, de réxime xurídico das administracións públicas e do procedemento administrativo común, e no Decreto 268/1994, do 29 de xullo, polo que se aproba a relación de procedementos iniciados a solicitude dos interesados, dos que sexa competente para resolve-la Consellería de Industria e Comercio, e nos que a falta de resolución expresa da Administración produce efectos desestimatorios ou estimatorios.
Artigo 8º
As subvencións concedidas faranse efectivas unha vez presentados por triplicado os documentos que acrediten a realización do investimento ou adquisición dos equipamentos, así como a certificación acreditativa do investimento realizado e serán minoradas proporcionalmente no caso de que o investimento xustificado sexa inferior ó orzado ou anuladas, se é o caso, por incumprimento das condicións sinaladas na resolución. Así mesmo, procederá o reintegro da axuda ou subvención percibida e mailos xuros de demora, nos casos recollidos no parágrafo 5 do artigo 78 da Lei 11/1992, do 7 de outubro, de réxime financieiro e presupostario de Galicia, logo de audiencia ó interesado.
Artigo 9º
1. O libramento da subvención farase nun único pagamento unha vez finalizado e xustificado o investimento.
2. Sen prexuízo do establecido no parágrafo anterior e de conformidade co disposto na Lei 11/1995, do 28 de decembro, de presupostos xerais da Comu
nidade Autónoma de Galicia para 1996, poderase realiza-lo libramento das seguintes formas:
a) Poderán efectuarse pagamentos parciais das subvencións concedidas, con suxeición o establecido no artigo 36. Dous B) da Lei 11/1995, do 28 de decembro, de presupostos xerais da Comunidade Autónoma de Galicia para 1996, e sempre que os devanditos pagamentos non superen o 80% da subvención concedida.
b) Por resolución motivada do delegado provincial poderase autorizar un anticipo de ata o 50% da subvención naqueles casos en que o investimento esixa pagamentos inmediatos, sendo xustificación suficiente para ordena-lo anticipo a certificación do órgano competente da entidade local expresiva dos importes executados na acción subvencionada.
3. En caso de obras, os documentos xustificativos serán os seguintes:
a) Certificación acreditativa da adxudicación que indique o nome do contratista, o importe líquido da adxudicación, e se é o caso a baixa na licitación.
b) Proxecto de obras que serviu de base para a adxudicación.
c) Certificación de obra realizada ou expedida polo técnico facultativo e aprobada polo órgano competente do concello solicitante.
4. As certificacións de obra deberán facerse conforme o proxecto e modificacións autorizadas, se é o caso.
Artigo 10º
Calquera modificación que sexa preciso introducir ó proxecto investidor presentado deberá ser autorizada pola delegación provincial da Consellería de Industria e Comercio, debendo presentar para tal efecto o proxecto reformado aprobado polo órgano competente do concello.
Artigo 11º
Os investimentos deberán estar finalizados e xustificados antes do 30 de novembro de 1996.
Artigo 12º
As solicitudes formuladas ó abeiro da Orde do 6 de marzo de 1995 e ás que non lles foi concedida a subvención peticionada por falta de crédito, poderán ser tidas en conta na presente convocatoria, sempre que así o faga consta-lo interesado.
Artigo 13º
Para todo o non previsto na presente orde, será de aplicación o establecido na Lei 11/1992, do 7 de outubro, de réxime financieiro e presupostario de Galicia, a Lei 11/1995, do 28 de decembro, de presupostos xerais da Comunidade Autónoma de Galicia para 1996, e a Lei 30/1992, de 26 de novembro, de réxime xurídico das administracións públicas e do procedemento administrativo común.
Santiago de Compostela, a 29 de febreiro de 1996.
Antonio Couceiro Méndez
Conselleiro de Industria e Comercio
96-1533