O fenómeno xacobeo constitúe un acto de singular transcendencia no acervo histórico cultural galego.
Co fin de promocionalo e dar a coñecela nosa herdanza folclórica, faise preciso elaborar un programa de actividades culturais que poñan especial énfases na continuidade das tradicións desta terra, mediante a convocatoria de premios, concursos e mostras.
Por todo isto, a Consellería de Cultura, a través da Dirección Xeral de Promoción do Camiño, creada polo Decreto 291/1993 ,de 11 de decembro, e no uso das competencias conferidas polo Decreto 49/1994, de 4 de febreiro, de estructura orgánica da Consellería de Cultura, convoca o V concurso Pelegrín de composicións de panxoliñas ou cantos de Nadal. Para tal fin,
DISPOÑO:
Artigo 1º
A Consellería de Cultural convoca o V concurso Pelegrín de composición de panxoliñas ou cantos de Nadal dacordo coas bases que figuran no anexo da presente orde.
Artigo 2º
O xurado que resolverá o premio terá a seguinte composición:
Presidente: o director xeral de Promoción do Camiño de Santiago, ou persoa en quen delegue.
Vocais: tres persoas de recoñecido prestixio na materia, nomeadas polo conselleiro de Cultura.
Secretario: un representante da Dirección Xeral de Promoción do Camiño de Santiago.
Artigo 3º
O libramento da contía deste premio farase con cargo á aplicación orzamentaria 10.04.121A.640.0 dos presupostos xerais da Comunidade Autónoma de Galicia para 1996.
Disposición adicional
Facúltase o director xeral de Promoción do Camiño de Santiago para que dicte as disposicións oportunas para o adecuado desenvolvemento da presente orde.
Disposición derradeira
A presente orde entrará en vigor ó día seguinte ó da súa publicación no Diario Oficial de Galicia.
Santiago de Compostela, 14 de febreiro de 1996.
Víctor Manuel Vázquez Portomeñe
Conselleiro de Cultura
ANEXO
Bases que rexen a convocatoria do V concurso Pelegrín de composición de panxoliñas ou cantos de Nadal
Primeira.-Poderán optar a este premio tódolos compositores de panxoliñas ou cantos de Nadal inéditos en letra e música, que versen ou garden relación co fenómeno xacobeo.
Segunda.-As composicións terán que cumpri-los seguintes requisitos:
a) Ser de creación propia e inéditas en letra e música.
b) Estar escritas en galego.
c) Estar adaptadas a coral.
d) Ter unha duración mínima de tres minutos e máxima de cinco.
Terceira.-O autor enviará a partitura do canto, antes do 30 de setembro de 1996, á Consellería de Cultura, Dirección Xeral de Promoción do Camiño de Santiago, edificios administrativos San Caetano, bloque 3, 15771 Santiago de Compostela.
Cuarto.-Cada compositor poderá presenta-lo nº de obras que desee. As partituras deberán ser claras, lexibles, sen equívocos nin riscaduras, escritas con tinta negra e coas páxinas numeradas.
Quinta.-As composicións deberán presentarse por triplicado e incluirán ademais, un orixinal das partituras dos diferentes instrumentos e da parte do coro.
Presentaranse nun sobre pechado e cun lema. Noutro sobre pechado incluirase o nome do autor, enderezo, teléfono, copia do DNI, breve currículum vitae e título da obra. Este sobre só se abrirá no caso de que a obra resulte premiada. Os participantes
que presenten varias obras, terán que facelo en sobres separados e con lemas distintos.
Sexta.-Concederanse os seguintes premios:
-Un primeiro premio de 330.000 (trescentas trinta mil) pesetas e trofeo.
-Un segundo premio de 200.000 (duascentas mil) pesetas e placa conmemorativa.
-Un terceiro premio de 135.000 (cento trinta e cinco mil) pesetas e placa conmemorativa.
Sétima.-O premio poderá ser outorgado de forma compartida a dous composicións ou declararse deserto. Do mesmo modo, sempre a xuízo do xurado, poderán concederse ata un máximo de tres mencións honoríficas.
Oitava.-Nun acto que se celebrará nunha localidade dos camiños de Santiago, na segunda quincena de decembro do presente ano, lerase a decisión do xurado e procederase á entrega de premios. Neste acto interpretaranse as obras premiadas nas anteriores edicións.
Novena.-As obras premiadas pasarán a ser propiedade da Consellería de Cultura, quen poderá publicalas e utilizalas dentro dos seus plans de actuación cultural.
Décima.-A participación no presente concurso implica a aceptación das súas bases.
A organización resolverá calquera dúbida que poida xurdir nos aspectos non considerados especificamente nas bases, sen que, en ningún caso, poida haber contradicción co disposto nelas.
9601727
