A institucionalización pola Real Academia Galega, a partir de 1963, do Día das Letras Galegas o 17 de maio, foi sen dúbida un acontecemento que ano tras ano colleu pulo e resonancia na nosa sociedade, de tal xeito que en toda a Comunidade Autónoma galega se proxecta a figura homenaxeada e serve, ó mesmo tempo, para reflexionar sobre Galicia, sobre a súa lingua e sobre a súa cultura.
A Real Academia Galega tomou como punto de partida para a celebración desta efeméride a publicación no ano 1863 de Cantares Gallegos, de Rosalía de Castro.
O Decreto 15/1996, do 12 de xaneiro, declara o ano 1996 como Ano de Xesús Ferro Couselo, unha das personalidades que máis contribuíu ó coñecemento do noso pasado. Creador e impulsor de innumerables iniciativas culturais que abranguen diversos campos, desde os arquivos ata os museos, a arqueoloxía e o mundo editorial, foi un destacado profesor que impartiu o seu maxisterio acompañado da investigación. É un dos máis importantes investigadores sistemáticos da nosa cultura contribuíndo cos seus traballos a dar a coñecer mellor a nosa terra non só en Galicia senón tamén fóra dela.
Os galegos de todo o mundo debémoslle recoñecemento a esta personalidade da nosa cultura, polo que debemos contribuír non só a dar a coñecer na nosa terra a figura deste galego insigne, e a súa obra, senón tamén a anima-los galegos a segui-lo seu exemplo de traballador incansable a prol do seu país.
Por iso, esta consellería,
DISPÓN:
Primeiro.-Durante o mes de maio destacarase en tódolos centros docentes da Comunidade Autónoma galega a importancia que ten para Galicia o Día das Letras Galegas.
Segundo.-O profesorado, de acordo coa liña que estableza o consello escolar de cada centro, programará as actividades escolares que considere oportunas para un mellor coñecemento desta data.
Terceiro.-En calquera caso, cando menos, dedicarase en cada un dos grupos de cada curso unha hora ó desenvolvemento dunha lección ou conferencia-coloquio, adaptada á idade do alumnado, na que se poña de manifesto a importancia que ten para Galicia a nosa lingua, facendo referencia ó persoeiro homenaxeado este ano: Xesús Ferro Couselo.
Santiago de Compostela, 19 de febreiro de 1996.
Juan Piñeiro Permuy
Conselleiro de Educación e Ordenación Universitaria
1666