O Colexio Rexional de Xordos, situado en Santiago de Compostela, creouse polo Real decreto do 22 de novembro de 1862 a instancia do rector da Universidade de Santiago de Compostela e ó abeiro da Lei de instrucción pública de 1857.

O goberno e maila administración do colexio encomendóuselle a un padroado integrado polos presidentes das catro diputacións de Galicia e baixo a presidencia do rector da universidade, situación que consolidou a orde ministerial do 26 de xuño de 1968, pola que se aprobou o Regulamento do Colexio Rexional de Xordos.

Desde o 1 de decembro de 1986 en que suscribiu o oportuno concerto educativo coa Consellería de Educación e Ordenación Universitaria da Xunta de Galicia, o Colexio Rexional de Xordos de Santiago de Compostela quedou sometido á normativa contida no título IV da Lei orgánica 8/1985, do 3 de xullo, reguladora do dereito á educación.

Configurado o dereito á educación como un dereito de carácter social, reclama dos poderes públicos as accións positivas necesarias para o seu efectivo desfrute.

Por conseguinte, extinguido o padroado que viña rexendo o referido Colexio Rexional de Xordos, a Xunta de Galicia debe asumir integramente a súa titularidade para continuar coa función educativa que ese colexio desempeñaba.

Así, de conformidade co previsto nos artigos 17 da LODE, 36.1º da LOXSE e nos artigos 57.2º e 60 do Real decreto 2377/1985, do 18 de decembro, polo que se aproba o Regulamento de normas básicas sobre concertos educativos, por proposta do conselleiro de Educación e Ordenación Universitaria, logo de deliberación do Consello da Xunta de Galicia na súa reunión do día oito de febreiro de mil novecentos noventa e seis,

DISPOÑO:

Artigo 1.-Créase o Colexio Público de Xordos, con sede en Santiago de Compostela.

Artigo 2.-A Xunta de Galicia asume o persoal adscrito ó antigo Colexio Rexional de Xordos, que é o que se relaciona no anexo I.

Disposición derradeira

Primeira.-Autorízase a Consellería de Educación e Ordenación Universitaria para adopta-las medidas necesarias para a execución do presente decreto.

Segunda.-O presente decreto entrará en vigor o día seguinte ó da súa publicación no DOG.

Santiago de Compostela, oito de febreiro de mil novecentos noventa e seis.

Manuel Fraga Iribarne

Presidente

Juan Piñeiro Permuy

Conselleiro de Educación e Ordenación Universitaria

1011