Visto o expediente de recoñecemento de interese galego e a inscrición no Rexistro de Fundacións de Interese Galego da fundación Paco González.
Supostos de feito:
Primeiro.-O 21 de xullo de 1995 solicitouse o recoñecemento de interese galego e a inscrición no Rexistro de Fundacións de Interese Galego da fundación Paco González por medio de escrito presentado por Francisco González Fernández, en representación da fundación.
Segundo.-A fundación constitúese en escritura pública, outorgada en Vigo o día 19 de xuño de 1995, ante o notario José-Luis Lorenzo Areán, co número mil trescentos oitenta e oito do seu protocolo, por Francisco González Fernández, Hortensia González Fernández e María del Mar Fernández Reboreda, sendo rectificada e complementada por outra do 30 de outubro perante o mesmo notario e co número dous mil catrocentos dazasete do seu protocolo, intervindo todos no seu propio nome e debidamente acreditados.
Terceiro.-A comisión integrada polos secretarios xerais de tódalas consellerías elevoulle ó conselleiro da Presidencia e Administración Pública a proposta de clasificación como cultural da fundación Paco González, dado o seu obxecto e finalidade, polo que, cumpríndose os requisitos esixidos na Lei 7/1983, do 22 de xuño, e na Lei 11/1991, do 8 de novembro, de reforma da lei anterior, de réxime das fundacións de interese galego, e segundo establece o artigo 32.1º e 2º do Decreto 248/1992, do 18 de xuño, polo que se aproba o Regulamento de organización e funcionamento do protectorado das fundacións de interese galego, correspóndelle a execución das facultades inherentes a aquel á Consellería de Cultura.
Cuarto.-Á vista da proposta da comisión de secretarios xerais, pola orde da Consellería da Presidencia e Administración Pública, do 14 de decembro de 1995 (DOG do 26 de decembro) clasificouse como cultural a Fundación Paco González, tendo en conta o disposto no artigo 32.3º.a) do Regulamento de organización e funcionamento do protectorado das fundacións de interese galego.
Quinto.-Segundo consta no artigo 4 dos seus estatutos, son fins da fundación o fomento da danza española e calquera outro que teña por obxecto a promoción e desenvolvemento desta arte en Galicia, o nivel profesional do sector da danza no seu nivel cultural e, en xeral, a elevación da calidade de vida e do nivel socioeconómico.
Sexto.-Na escritura pública pola que se constitúe a fundación, nos estatutos e na restante documentación que figura no expediente constan, entre outros, os seguintes puntos: acreditación da personalidade dos fundadores, dotación inicial da fundación, estatutos nos que consta a denominación
da fundación como fundación Paco González, capacidade xurídica, enderezo e obxecto.
O padroado da fundación está integrado polos seguintes membros:
Presidente: Francisco González Fernández.
Vicepresidente: Hortensia González Fernández.
Secretaria: María del Mar Fernández Reboreda.
Fundamentos de dereito:
Primeiro.-O artigo 34 da Constitución española recoñece o dereito de fundación para fins de interese xeral, de acordo coa lei. O artigo 27.26º do Estatuto de autonomía para Galicia atribúelle a esta comunidade competencia exclusiva sobre o réxime das fundacións de interese galego.
Segundo.-Conforme o artigo 32.3º a) do Regulamento de organización e funcionamento do protectorado das fundacións de interese galego, así como o artigo 1 do Decreto 12/1990, é competencia desta consellería a declaración de interese galego e a inscrición no Rexistro de Fundacións de Interese Galego da fundación Paco González, dado o seu obxecto, coincidente coas competencias desenvolvidas pola Consellería de Cultura, asumindo as funcións que en canto a protectorado lle corresponden á Xunta de Galicia.
Terceiro.-Ó amparo do disposto no artigo 7.5º da Lei 7/1983, do 22 de xuño, á realización da finalidade fundacional débense destinar, cando menos, o oitenta por cento das rendas que obteña a fundación e dos outros ingresos que non formen parte da dotación da fundación.
Cuarto.-A Lei 11/1991, do 8 de novembro, dálle nova redacción ó artigo 21.2º da Lei 7/1983, establecendo a obriga de, por unha banda, formular e presenta-lo orzamento de ingresos e gastos ó protectorado con anterioridade ó inicio do excercicio económico e, por outra, a de efectuar un inventario-balance, pechado na data da finalización do exercicio, unha memoria das actividades realizadas ó longo do ano e de xestión económica do patrimonio, así como a liquidación do orzamento de ingresos e gastos do ano anterior, que deberán presentárselle o protectorado no prazo de seis meses desde a data do peche do exercicio.
Este conxunto de obrigas débense entender asumidas pola fundación, aínda que non se recollan expresamente nos seus estatutos.
Quinto.-Á vista do exposto pódense entender substancialmente cumpridos os requisitos legais e regulamentarios para a declaración de interese galego e a súa inscrición no Rexistro de Fundacións da Sección de Fundacións da Consellería de Cultura segundo se desprende dos artigos 5, 6, 7, 8, 11.1º e 18 da Lei 7/1983, en relación cos artigos 2, 3, 4, 5 e 33 do Decreto 248/1992.
Por todo isto,
DISPOÑO:
Primeiro.-Recoñecer e declarar de interese galego a fundación Paco González.
Segundo.-Ordena-la súa inscrición no Rexistro de Fundacións de Interese Galego, Sección de Fundacións da Consellería de Cultura.
Terceiro.-Aproba-los seus estatutos e a formación do seu órgano de goberno.
Cuarto.-A dita fundación queda sometida ó disposto no resto da normativa de xeral aplicación, en especial, á obrigación de lles da-la publicidade suficiente ás súas actividades e á ausencia de ánimo de lucro na prestación dos seus servicios, quedando obrigada a renderlle-las contas anualmente ó protectorado e a xustificar, a través dunha memoria anual, o cumprimento das cargas fundacionais, así como a presenta-lo proxecto de orzamento antes do último mes do exercicio económico anterior a aquel para o que se formula, debendo solicita-las preceptivas autorizacións do protectorado cando sexan necesarias.
Santiago de Compostela, 15 de xaneiro de 1996.
Víctor Manuel Vázquez Portomeñe
Conselleiro de Cultura
646