Dentro das actividades que vai realiza-la EGAP en 1996 e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse dous cursos sobre medio ambiente e saúde que deberán desenvolverse segundo as seguintes bases:
Obxectivos:
Integración da dimensión ambiental na formación de técnicos, profesionais, e persoal ó servicio da Administración local e autonómica galega que desenvolvan a súa actividade nas áreas de medio ambiente e saúde, coa finalidade de mellora-la xestión ambiental e poder contribuír á protección ambiental e a saúde da nosa comunidade.
Destinatarios:
Responsables políticos e técnicos da Administración local e autonómica, así como profesionais libres que desenvolvan a súa actividade en áreas relacionadas co medio ambiente e a saúde.
Desenvolvemento:
-Duración: 36 horas
-Horario: xoves e venres pola tarde, e sábado pola mañá.
-Lugares e datas: Ferrol, do 22 de febreiro ó 9 de marzo.
-Vigo: do 23 de maio ó 8 de xuño.
Dereitos de inscrición:
Fíxanse en 20.000 ptas. Establécense as seguintes bonificacións:
O 50% para o persoal ó servicio da Administración pública que desenvolva tarefas relacionadas directamente coa materia obxecto do curso.
O 25% para o resto dos solicitantes que pertenzan á Administración pública.
O aboamento efectuarase mediante cheque nominativo ou transferencia á conta corrente da EGAP da Caixa Galicia na oficina de organismos de Santiago de Compostela, conta restrinxida nº 2091-0388311000520. O xustificante do pagamento deberase xuntar á solicitude.
Os dereitos de inscrición, unha vez ingresados, unicamente se lles reintegrarán ós interesados se estes, cunha antelación mínima de cinco días con respecto á data de inicio da actividade, manifestan por escrito a súa renuncia a participar nela.
Prazo:
O prazo de inscrición no curso finaliza o día 5 de febreiro para o curso de Ferrol, e o día 6 de maio para o curso de Vigo.
Tramitación de solicitudes:
As solicitudes irán dirixidas ó director da Escola Galega de Administración Pública, Polígono das Fontiñas, R/ Madrid, 2-4, 15703 Santiago de Compostela, segundo o modelo que figura como anexo a esta convocatoria, e presentarase no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, xuntando en todo caso resgardo do ingreso e certificación expedida polo órgano competente na que conste a condición de estar prestando servicios na Administración, no caso de ter dereito a bonificación.
Número de prazas: 40
Selección:
Serán seleccionadas con base os seguintes criterios:
1. Que exista unha relación directa entre as tarefas que realiza o solicitante no desempeño do seu posto de traballo e a materia obxecto do curso.
2. Ter realizado un menor número de cursos relacionados con contidos temáticos do curso que se solicita durante os últimos cinco anos.
3. O menor número de cursos realizados en escolas ou institutos de Administración pública (excepto os cursos de galego).
4. A antigüidade, e como tal entenderase a data de ingreso na Administración pública.
As prazas restantes adxudicaranse por rigorosa orde de entrada no rexistro sempre que se teñan acreditados tódolos requisitos para a inscrición no momento de presentación da solicitude.
A admisión ou non admisión ó curso comunicaráselles directamente ós interesados a partir do día 12 de febreiro.
Inscricións fóra de prazo:
Só se admitirán se quedasen prazas baleiras e sempre que se cumpran os requisitos xerais antes indicados.
Modificacións:
A EGAP reserva para si a facultade de interpretar e resolve-las incidencias que puidesen xurdir no desenvolvemento dos cursos, así como a de cancelalos se o escaso número de solicitudes non xustificase a súa realización.
Certificado de asistencia:
Outorgaráselles certificado de asistencia ós alumnos que participen con regularidade nos cursos programados cando a súa inasistencia non sexa igual ou superior ó 15% das horas lectivas programadas. A superación deste límite, sexa cal sexa a causa, imposibilitará a expedición do certificado e dará lugar á baixa con perda de tódolos dereitos.
Profesorado:
Estará integrado por expertos nos sectores de medio ambiente e saúde pertencentes á Administración autonómica e á empresa, así como por profesores das universidades galegas.
Contido:
Contaminación atmosférica. Ruído ambiental. Planificación hidrolóxica: a Lei de costas. Contaminación das augas: control sanitario. Depuración de augas residuais. Residuos sólidos urbanos. Instrumentos de xestión ambiental. Competencias municipais en materia de medio ambiente. Espacios protexidos.
A efectividade desta convocatoria e do custo que se proxecta queda condicionada á existencia de crédito adecuado e suficiente.
Santiago de Compostela, 22 de decembro de 1995.
Xaime Rodríguez-Arana Muñoz
Director da Escola Galega de Administración Pública
96-0089