Conforme os fins atribuídos a este centro nos artigos 3.1º g) da Lei 10/1989, do 10 de xullo, 2.1º h) do Decreto 306/1990, do 24 de maio, e 5 do Decreto 336/1990, do 8 de xuño, faise pública a convocatoria de tres bolsas de biblioteconomía e documentación que se rexerá polas seguintes bases:

Primeira.-Obxecto.

Adxudicación de tres bolsas de biblioteconomía e documentación para a execución de tarefas desa natureza na biblioteca da Escola Galega de Administración Pública.

Segunda.-Dotación.

Cada bolsa consistirá na percepción de 132.857 pesetas mensuais como máximo desde o 1 de xaneiro ata o 31 de decembro de 1996, sen prexuízo de que sexa prorrogada por un período de doce meses, en función do aproveitamento do adxudicatario, das necesidades de asistencia e colaboración nas tarefas encomendadas, e das dispoñibilidades orzamentarias.

Terceira.-Requisitos.

-Ser cidadán/cidadá español/a domiciliado en Galicia.

-Ser titulado/a superior universitario.

Cuarta.-Solicitudes e prazo de presentación.

1. Enviaranse á Escola Galega de Administración Pública, polígono das Fontiñas, rúa de Madrid, nº 4, 15703 Santiago de Compostela, conforme o artigo 38 da Lei 30/1992, do 26 de novembro, segundo o modelo anexo, xunto coa seguinte documentación:

-Fotocopia do DNI ou pasaporte.

-Certificación académica, con detalle das cualificacións obtidas na carreira.

-Declaración expresa de non ter contraída ningunha débeda coa Xunta de Galicia.

-Currículum vitae.

-Memoria descritia das tarefas dun bolseiro na biblioteca nun centro de formación de funcionarios públicos.

-Documentos que acrediten os coñecementos de galego e doutros idiomas, de informática (nivel usuario), especialidade en biblioteconomía e documentación.

Os documentos deberán ser orixinais ou copias cotexadas con eles.

2. O prazo de presentación é de 20 días naturais, contados desde o seguinte ó da publicación desta convocatoria no Diario Oficial de Galicia.

Quinta.-Selección.

Estará a cargo dun tribunal presidido polo secretario xeral da Escola Galega de Administración Pública,

do que formarán parte, como vocal, o xefe de estudios da Escola Galega de Administración Pública. Actuará como secretario o xefe do Servicio de Estudios, Investigación e Publicacións.

O tribunal estudiará, avaliará e relacionará por orde de puntuación os expedientes dos solicitantes admitidos, formados polas solicitudes e documentación xustificativa.

O correspondente tribunal está clasificado na categoría primeira, segundo o artigo 26 do Decreto 299/1990, do 24 de maio.

Na hipotese de que unha persoa renuncie á bolsa, a súa adxudicación recaería automaticamente na que a siga en puntuación, e así sucesivamente.

Sexta.-Obrigas dos bolseiros.

1. Acepta-la bolsa e incorporarse ás tarefas dentro dos dez días naturais, seguintes ó da notificación do outorgamento. De non facelo así, sen causa suficiente a xuízo do director, a Escola Galega de Administración Pública poderá chama-lo seguinte ou seguintes candidatos por orde de puntuación, da relación formada para este efecto polo tribunal.

2. Permanecer asiduamente en horario lectivo, en sesións de mañá e de tarde, nas instalacións que para estudio e investigación ten habilitadas a Escola Galega de Administración Pública, horario que determnará o xefe do Servicio de Estudios, Investigación e Publicacións.

3. Atende-las explicacións e instruccións que dicte o xefe do Servicio de Estudios, Investigación e Publicacións.

4. Presta-la súa colaboración en cantas actividades garde, conexión co obxecto desta convocatoria e que contribúan á realización do fin perseguido por esta.

5. Cubri-los informes ou partes de actividades que lles sexan requiridos.

Sétima.-Dereitos dos bolseiros.

1. A percepción mensual na súa conta corrente, do líquido que resulte de aplicarlle á mensualidade de 132.857 ptas. a retención fiscal que proceda.

2. Os adxudicatarios adquiren exclusivamente a condición de bolseiros, coas obrigas e dereitos propios da mesma conforme a estas bases, sen ningún outro vínculo laboral ou administrativo.

Oitava.-Eficacia da adxudicación.

A eficacia da adxudicación quedará condicionada, por un lado á aprobación polo Consello Rector da Escola Galega de Administración Pública do plan de actividades para o ano 1996 no que figuren estas bolsas e por outro á aprobación e entrada en vigor dos orzamentos da Comunidade Autónoma para o ano 1996.

Santiago de Compostela, 21 de novembro de 1995.

Jaime Rodríguez-Arana Muñoz

Director da Escola Galega de Administración Pública

95-7876