O artigo 2, punto 4, do Decreto 327/91, do 4 de outubro, de avaliación dos efectos ambientais para Galicia (DOG nº 199, do 15 de outubro), dispón que
o órgano ambiental someterá o estudio de efectos ambientais ó trámite de información pública, durante quince días hábiles, mediante anuncio no Diario Oficial de Galicia. Na súa virtude,
RESOLVO:
Primeiro.-Someter a información pública, no prazo de quince días hábiles, contando a partir da publicación da presente resolución, o estudio de efectos ambientais do proxecto desvío do leito do regato Batán, termo municipal de Carral (A Coruña), motivada polo vertido de terras das obras de mellora do firme e plataforma da estrada N-550, tramo Alvedro-Ordes.
Segundo.-Para os devanditos efectos informativos, porase a disposisición dos administrados, exemplares nas seguintes dependencias:
* Secretaría Xeral da Comisión Galega do Medio Ambiente.
* Delegación Provincial da Consellería da Presidencia e Administración Pública (Comisión Provincial de Medio Ambiente) da provincia da Coruña.
* Concello de Carral.
Terceiro.-As alegacións formularanse durante o dito prazo de quince días.
Cuarto.-Unha vez rematado o mencionado prazo, remitirase o expediente coas correspondentes alegacións á Secretaría Xeral da Comisión Galega do Medio Ambiente.
Santiago de Compostela, 1 de decembro de 1995.
José Luis Aboal García-Tuñón
Secretario xeral da Comisión Galega do Medio Ambiente
95-07842