A Escola Galega de Administración Pública, en colaboración coa Inspección Xeral de Servicios da Consellería de Presidencia e Administración Pública organiza unhas xornadas de estudio sobre a avaliación do rendemento na Xunta de Galicia, que terán lugar nas seguintes localidades e datas: A Coruña, o 13 de decembro; Lugo, o 20 de decembro; Ourense, o 14 de decembro; Pontevedra, o 5 de decembro e Vigo, o 21 de decembro.
Obxecto: proporcionarlles ós empregados públicos da Xunta de Galicia o coñecemento das bases, fundamento, obxectivos e metodoloxía do programa de avaliación do rendemento das unidades e centros da Administración autonómica que se vai poñer en práctica inminentemente, de xeito que a Xunta de Galicia poida contar con maiores elementos de xuízo na súa implantación.
Contido: analizaranse principalmente estes temas:
-Avaliación do rendemento na Xunta de Galicia.
-O artigo 63 bis da Lei da función pública de Galicia.
-Metodoloxía do proceso de avaliación e resultados da súa aplicación con carácter experimental.
Destinatarios: empregados públicos da Xunta de Galicia.
Desenvolvemento e duración: as xornadas celebraranse nos lugares e datas sinaladas, en sesións de mañá, desde as 10.30 ata as 14 horas.
Inscrición:
-Prazo: remata ós 10 días naturais contados desde o seguinte ó da publicación no DOG desta resolución.
-Lugar de presentación: no rexistro xeral da EGAP (polígono das Fontiñas, rúa de Madrid, 2-4, 15703, Santiago de Compostela). Tfno. 57 08 00. Telefax nº 57 15 40 ou segundo do disposto na Ley 30/1992, de 26 de novembro, do réxime xurídico das administracións públicas e do procedemento administrativo común.
-Forma: as solicitudes de inscrición faranse por escrito, no modelo oficial que figura ó final destas bases. Serán rexeitadas todas aquelas peticións que non reúnan o dito requisito.
As peticións de admisión poderanse enviar por correo ordinario ou por telefax ó número (981) 57 15 40.
-Inscrición fóra de prazo: só se admitirán de quedaren prazas baleiras, coa condición de que se cumpran os requisitos xerais antes indicados.
-A lista de admitidos expoñerase no taboleiro de anuncios da EGAP 24 horas despois do remate do prazo de presentación de solicitudes.
Certificación de asistencia: entregaráselles ó remate destas xornadas a aqueles asistentes que concorresen asiduamente a elas, e expresarase neste documento a natureza da actividade e as datas da súa realización.
Santiago de Compostela, 16 de novembro de 1995.
Jaime Rodríguez-Arana Muñoz
Director da Escola Galega de Administración Pública
95-7441