A Orde do 23 de outubro de 1991 (BOE do 31 de outubro), pola que se establecen os requisitos e o procedemento para a concesión dos premios extraordinarios de bacharelato, establece no seu apartado décimo primeiro que as comunidades autónomas con plenas competencias en materia educativa poderán convocar premios extraordinarios de bacharelato nos seus ámbitos territoriais.
Na súa virtude, a Dirección Xeral de Ordenación Educativa e Centros,
RESOLVEU:
Primeiro.-Convócanse os premios extraordinarios de bacharelato correspondentes ó curso 1994-1995 de acordo coa Orde do 23 de outubro de 1991.
Segundo.-Poderá concederse en cada provincia da Comunidade Autónoma de Galicia un premio extraordinario por cada 1.000 alumnos ou fracción superior a 500 matriculados en terceiro curso de bacharelato unificado polivalente ou no primeiro curso de calquera modalidade do bacharelato experimental, no curso académico inmediatamente anterior a aquel no que se celebren as probas. Nas provincias nas que o número de alumnos matriculados nos cursos indicados sexa inferior a 500 poderá concederse un premio extraordinario.
Para os efectos previstos no parágrafo anterior teranse en conta tanto os alumnos de centros públicos como privados e os matriculados na modalidade de ensino a distancia.
Terceiro.-Poderán optar ó premio extraordinario de bacharelato os alumnos que obteñan como nota media das cualificacións dos tres cursos de bacharelato unificado e polivalente ou nos tres primeiros cursos do plan experimental da reforma de ensinanzas medias 8,50 puntos ou máis.
Para obte-la nota media teranse en conta tódalas disciplinas dos tres cursos tanto comúns, como optativas, sacando calquera outra que o alumnado cursase voluntariamente; asignaránselles ás cualificacións o seguinte valor numérico:
a) Bacharelato unificado e polivalente:
Suficiente: 5,50 puntos.
Ben: 6,50 puntos.
Notable: 7,50 puntos.
Sobresaliente: 9,00 puntos.
b) Plan experimental da reforma de ensinanzas medias:
Suficiente: 5,50 puntos.
Notable: 7,50 puntos.
Sobresaliente: 9,00 puntos.
Cuarto.-Os alumnos que, reunindo os requisitos, desexen optar ó premio extraordinario, deberán inscribirse no instituto de bacharelato no que se encontre o seu expediente académico no prazo de vinte días naturais contados a partir da publicación da presente resolución no Diario Oficial de Galicia.
Quinto.
1. Os alumnos e os secretarios dos respectivos centros deberán cubri-los modelos de inscrición e de certificación que se inclúen como anexo I e anexo II á presente convocatoria.
2. Rematado o prazo de inscrición, os secretarios dos institutos de bacharelato remitiranlle á Inspección Educativa da delegación provincial correspondente da Consellería de Educación e Ordenación Universitaria, os modelos de inscrición que estean no seu poder, nun prazo máximo de dez días naturais.
Sexto.-As probas celebraranse o día 11 de xaneiro de 1996, nos locais que determinen as delegacións provinciais da Consellería de Educación e Ordenación Universitaria, debendo comunicárllelo coa suficiente antelación a tódolos centros de bacharelato da provincia.
As probas terán dúas partes:
Na primeira parte os alumnos realizarán:
1. Redacción sobre un tema de carácter xeral, histórico ou literario.
2. Idioma moderno:
-Exercicios de comprensión e expresión partindo dun texto e de situacións da vida cotiá.
-Exercicios para transformar e completar frases.
Na segunda parte:
Os alumnos deberán elixir unha das seguintes opcións e responder ás cuestións propostas:
Opción A: proba de matemáticas.
Opción B: proba de latín.
Opción C: proba de historia de España.
Sétimo.-O tribunal estará constituído por funcionarios que exerzan a función inspectora en materia de educación e mais por profesores de ensino secundario de centros de bacharelato especializados nas diversas materias que compoñen a proba, designados pola Dirección Xeral de Ordenación Educativa e Centros.
Oitavo.-Os exercicios serán cualificados de acordo co baremo seguinte:
-Exercicios da primeira parte:
1. De cero a cinco puntos.
2. De cero a cinco puntos.
-Exercicios da segunda parte:
De cero a diez puntos.
A puntuación definitiva será a suma total de cada unha das cualificacións obtidas. Concederáselles premio extraordinario ós alumnos que alcancen 16 puntos ou máis na citada suma ata un número igual ou inferior ó que resulte da aplicación do apartado segundo desta resolución. En caso de empate terá preferencia o alumno con mellor expediente académico.
Noveno.-Os alumnos que obteñan premio extraordianrio de bacharelato poderán optar ó Premio Nacional de Bacharelato.
Décimo.-O presidente do tribunal atenderá as reclamacións que lles formulen os interesados ou os seus representantes legais no prazo de 10 días hábiles a partir do seguinte á publicación das cualificacións.
Contra a resolución do presidente poderase presentar unha nova reclamación perante a Dirección Xeral de Ordenanción Educativa e Centros da Consellería de Educación e Ordenación Universitaria.
Décimo primeiro.-O secretario do tribunal redactará acta por quintuplicado, que será asinada por tódolos compoñentes. O orixinal quedará arquivado na Inspección Central e as copias seranlle remitidas á Dirección Xeral de Ordenación Educativa e Centros da Consellería de Educación e Ordenación Universitaria e ós rectorados das universidades da Comunidade Autónoma galega.
A inspección remitiralles unha fotocopia certificada da acta ós centros públicos e privados dos que houbese alumnos participantes nas probas e estampará a oportuna dilixencia nos libros de cualificación dos alumnos premiados.
Santiago de Compostela, 5 de outubro de 1995.
Luis Framil Álvarez
Director xeral de Ordenación Educativa e Centros
95-6925
