Co obxecto de adapta-la liquidación ó beneficiario á operativa do convenio de mediación ICO-entidades financeiras e de simplifica-la xestión da liquidación ó Igape, é necesario face-las oportunas modificacións na cláusula oitava do convenio de apoio financeiro ós investimentos das pequenas e medianas empresas de Galicia financiado polo Instituto Galego de Promoción Económica (Igape), o Instituto de Crédito Oficial (ICO) e as entidades financeiras.
Visto o exposto e de conformidade coas entidades financeiras asinantes do convenio e en virtude das facultades que teño conferidas,
DISPOÑO
Artigo único.-Modifícase a Resolución do 1 de xuño de 1995 pola que se fai público o contido do convenio de apoio financeiro ós investimentos das pequenas e medianas empresas de Galicia financiado polo Instituto Galego de Promoción Económica (Igape), o Instituto de Crédito Oficial (ICO) e as entidades financeiras, publicado no Diario Oficial de Galicia número 118 bis, do 21 de xuño de 1995 da seguinte maneira:
O texto da cláusula oitava. Liquidación, substitúese pola seguinte redacción:
«Cláusula oitava. Liquidación.
a) Liquidación ó beneficiario.
A liquidación da cota de xuro por parte da entidade financeira ó beneficiario efectuarase, ó igual que as amortizacións, semestralmente, calculándose os xuros en función do capital vivo ou capital disposto.
Para préstamos a xuro fixo, o devengo de xuros será por días comerciais, con liquidacións semestrais que comezarán a computarse desde o primero día 15 inmediato posterior á data de disposición. Por conseguinte o primero período de liquidación de xuros será irregular e igual ou superior a 6 meses polos días que transcorran desde a data de disposición ata o primero día 15.
Para préstamos a tipo de xuro variable, o devengo de xuros será por días naturais, base 365, e a liquidación deles será por períodos semestrais que comezarán a computarse a partir do primero día 15 inmediato posterior á data de disposición. Por conseguinte o primero período de liquidación de xuros será irregular e igual ou superior a 6 meses polos días que transcorran desde a data de disposición ata o primero día 15.
b) Liquidación ó Igape.
A liquidación das subsidiacións por parte da entidade financeira ó Igape efectuarase semestralmente, calculándose sobre o saldo vivo teórico semestral do préstamo, excepto para o período de xustificación do investimento no que a liquidación das subsidiacións se condiciona á xustificación, por parte dos beneficiarios, da realización e pagamento do investimento subvencionable, e de acordo co establecido a continuación:
Primeira ou, se é o caso, única liquidación de xustificación: devengarase cando o investimento xustificado (realizado e pagado) acade unha contía igual ou superior o 50% do investimento subvencionable. Esta liquidación será única cando a dita contía acade o 100%.
Segunda liquidación de xustificación: devengarase cando o investimento subvencionable estea totalmente xustificado.
A entidade financeira, previamente á liquidación da subsidiación, esixirá ós beneficiarios copias compulsadas dos documentos que xustifiquen a realización do investimento subvencionable, así como dos medios utilizados para o seu pagamento, enviando esta documentación ó Igape acompañada dunha certificación bancaria, datada, selada e asinada pola dita entidade, na que se fará constar que se acreditou a realización e pagamento do investimento subvencionable e cumpridos os requisitos para practica-la primera e, se é o caso, segunda liquidación de xustificación.
Para o cálculo dos xuros tomarase como data de inicio da subsidiación o día primeiro do mes seguinte ó da data da certificación bancaria e os puntos subsidiados aplicaranse á cantidade resultante de multiplica-la porcentaxe de financiamento, que figura na resolución de concesión, polo investimento subvencionable xustificado.
O devengo de xuros será por días comerciais para préstamos a tipo de xuro fixo e por días naturais para préstamos a tipo de xuros variable. O primero período de liquidación da subsidiación será irregular e computarase polos días transcorridos desde a data de inicio ata o primero día 15 correspondente segundo o establecido na cláusula oitava a).
O período de xustificación do investimento non poderá ser superior a un ano a partir da data de formalización».
Santiago de Compostela, 7 de setembro 1995.
José Antonio Orza Fernández
Presidente do Instituto Galego de Promoción Económica
95-06349