Dentro do programa de actividades que a Academia Galega de Seguridade ten previsto realizar no ano 1995, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dun curso básico de capacitación para policías locais, segundo o provisto no artigo 23 da Lei 3/1992, do 23 de marzo, de coordinación das policías locais, que deberá desenvolverse conforme as seguintes bases:

Obxectivos: o curso ten por obxectivos dota-los policías dunha formación teórico-práctica que complemente os coñecementos adquiridos na súa preparación das correspondentes probas de oposición, que os capacite para o posterior desempeño da súa actividade profesional.

Destinatarios: o curso vai dirixido a todas aquelas persoas que superaron recentemente as correspondentes probas de acceso á categoría de garda da policía local dos diferentes concellos de Galicia.

Inscrición: a inscrición dos participantes será totalmente gratuíta, e deberase comunicar, antes do 20 de outubro de 1995 para efectua-la correspondente reserva de praza.

Prazas: sen límite.

Solicitudes:

1. Os concellos que se atopen nesta situación deberán remitir un escrito á Academia Galega de Seguridade no que soliciten a participación no curso, no que figure a lista de persoas que superaron as correspondentes probas de oposición á categoría de garda da policía local e os datos persoais das persoas incluídas na lista referidos ás probas de oposición, para efectua-la correspondente reserva de praza para a realización do devandito curso.

2. O prazo para a remisión de escritos rematará o día 20 de outubro.

3. Os escritos deberán enviarse á sede da Academia Galega de Seguridade: Rúa de Madrid, 2-4 Polígono das Fontiñas 15703, Santiago de Compostela.

Contido e duración: o curso celebrarase na sede da Academia Galega de Seguridade en sesións de mañá e tarde, de luns a venres, e nel trataranse entre outras as seguintes materias:

-Área xurídica.

Dereito constitucional.

Dereito procesual-penal.

Dereito administrativo policial.

Dereito penal.

Dereito estatutario.

-Área humanística.

Ética e función policial.

Psicoloxía.

Técnicas asistenciais de urxencia.

Protección civil.

-Área técnica policial.

Normativa sobre seguridade vial.

Investigación de accidentes de tráfico.

Intervención e prevención policial.

Policía científica.

-Área operativa policial.

Defensa persoal policial.

Educación física.

Tiro policial.

O curso terá unha duración de seis meses, catro de formación teórica na sede da Academia Galega de Seguridade e dous de prácticas nos respectivos concellos de procedencia.

Datas: o curso principiará o vindeiro día 3 de novembro de 1995.

O horario será de 9.30 a 20 horas.

Desenvolvemento do curso: os alumnos da Academia Galega de Seguridade durante o seu período de permanencia na academia rexeranse polo Regulamento de réxime interior desta, publicado no DOG do 28-7-1995, nº 144.

Certificado: para obte-lo correspondente diploma será requisito indispensable superar tanto a fase de formación teórica, onde o alumno ten que superar tódalas materias que figuren no programa, como a fase de prácticas.

Modificacións: a Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.

Santiago de Compostela, 20 de setembro de 1995.

Juan José Fariñas-Ferro Rodríguez

Director xeral da Academia Galega de Seguridade