Visto o expediente do convenio colectivo para a empresa Auxiliar Conservera, S.A., da provincia de Pontevedra, que tivo entrada nesta delegación provincial o día 6-7-1995, subscrito en representación da parte económica por unha representación da empresa, e da parte social, polos delegados de persoal, en data 6-7-1995. De conformidade co disposto no artigo 90, 2º y 3º da Lei 8/1980, do 10 de marzo, do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia, en materia de traballo, esta Delegación Provincial de Pontevedra,
ACORDA:
Primeiro.-Ordena-la súa inscrición no libro de Rexistro de Convenios Colectivos de Traballo, desta delegación provincial, e a notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación (SMAC).
Terceiro.-Dispoñe-la súa publicación no BOP e no Diario Oficial de Galicia (DOG).
Vigo, once de xullo de mil novecentos noventa e cinco.
Antonio Coello Bufill
Delegado provincial de Pontevedra
I. Disposicións xerais.
Artigo 1º.-Ámbito de aplicación.
O presente convenio colectivo ten por obxecto regula-las relacións laborais entre Auxiliar Conservera, S.A. e o seu persoal.
Artigo 2º.-Ámbito persoal.
Afecta este convenio a todo o persoal que se encontre prestando servicios actualmente nesta empresa, xa sexa na sección de frío industrial, xa na de fariña de peixe, calquera que sexa a actividade das mencionadas a que se dedique.
Artigo 3º.-Vixencia.
A vixencia do presente convenio será do 1-1-1995 ó 31-12-1995.
Artigo 4º.-Prórroga.
Extinguido o período de vixencia, o convenio entenderase prorrogado de ano en ano, salvo se algunha das partes que o subscriben o denunciase cunha anticipación de tres meses á expiración da súa vixencia ou de calquera das súas prórrogas.
Artigo 5º.-Condicións máis beneficiosas.
A empresa respectará as condicións máis beneficiosas que viñese desfrutando o persoal.
Artigo 6º.-Absorbibilidade.
Terán carácter de absorbibles e compensables en cómputo anual coas condicións aquí establecidas as melloras económicas que por calquera disposición durante a vixencia deste convenio se puidesen establecer.
II. Condicións laborais.
Artigo 7º.-Xornada laboral.
A xornada de traballo para o persoal afectado polo presente convenio será de trinta e nove horas e trinta minutos semanais de traballo efectivo, segundo o seguinte horario:
Factoría de frío industrial:
De luns a xoves de 8 a 16.30 horas con 30 minutos de descanso e o venres de 8 a 16 horas con 30 minutos de descanso, entendéndose os 30 minutos de descanso como tempo non efectivo de traballo. Quedan exentos da xornada expresada o persoal adscrito á sala de máquinas, o cal, por esixencias do servicio, efectuará quendas rotativas establecidas pola empresa de mañá, tarde e noite de 39 horas e 30 minutos efectivos de traballo semanal, cos descansos regulamentarios, por estaren exceptuados do descanso dominical.
Factoría de fariñas:
Quenda de noite: estará composta por un oficial de primeira e un peón, dependendo das necesidades da producción poderíase aumentar un traballador máis de cada categoría, sendo o sistema de funcionamento de forma rotativa entre todo o cadro de persoal adscrito ó dito centro, semanalmente no primeiro caso e quincenalmente no segundo. O horario será de 22 horas a 6.15 horas do día seguinte con 15 minutos de descanso de luns a xoves e os venres o horario será de 22 horas a 5.45 horas do día seguinte, igualmente con 15 minutos de descanso.
O descanso de 15 minutos non será considerado como tempo efectivo de traballo.
O resto do persoal que non traballase na quenda de noite farao no horario de 8 horas a 16.30 horas de luns a xoves e o venres de 8 a 16 horas con 30 minutos de descanso, non sendo considerado este descanso como tempo efectivo de traballo.
O persoal que estea no cadro de persoal o 1-1-1993 e que realice a quenda de noite percibirá, ademais das que a lei lle outorga, un plus que queda establecido en 450 ptas. por noite traballada para o oficial de primeira e 350 ptas. para o peón. A empresa comprométese a soluciona-lo transporte para este persoal que realice a dita quenda.
O persoal de nova contratación na empresa estará sometido á xornada laboral anual e ó horario de traballo que expresamente se pacte no contrato de traballo, podéndose establecer un horario flexible ou calquera outro acomodado ás necesidades empresariais.
O persoal da empresa, tanto da sección de frío industrial como o da sección de fariñas de peixe, comprométese a atender e realizar cos traballadores que fosen necesarios os labores de descarga de camións de peixe fresco e conxelado que, motivados por algún sinistro imprevisible, chegasen á empresa fóra da xornada normal de traballo, sempre e cando a dirección desta o comunicase ó persoal, se fose posible, cunha anticipación mínima de 12 horas.
A empresa coidará por medio dos seus encargados e capataces de distribuí-lo traballo de forma tal que non se prolonguen os períodos de estadía do persoal nas cámaras frigoríficas de conxelación, para o que establecerán quendas rotativas dentro da xornada ou alternaranse as clases de traballo. En ningún caso poderá exceder de 6 horas a permanencia nas ditas cámaras, dándose por concluída a xornada unha vez chegado a ese tope. Cando se traballen períodos menores de 4 horas en cámaras, completarase a xornada normal ata 8 horas fóra delas.
Pasadas as primeiras 4 horas, o tempo que transcorra computarase como dobre para efectos de completa-la xornada.
Artigo 8º.-Licencias retribuídas.
A empresa concederá licencias ós traballadores que a soliciten, tendo en conta os seguintes casos:
a) Casamento do productor: 15 días naturais.
b) Enfermidade grave do cónxuxe, ascendentes ou descendentes e parto da esposa: 5 días.
c) Morte do cónxuxe, ascendentes -incluídos políticos, se conviven baixo o mesmo teito-, descendentes ou irmáns: 5 días.
d) No caso de parentes políticos e de non existir convivencia: 3 días.
e) No caso de desprazamento da propia residencia será o tempo necesario sen dereito a retribución polo exceso dos mencionados días.
f) Por cumprimento dun deber inescusable de carácter público: o tempo que fose necesario.
g) 6 días para asuntos particulares, o desfrute dos cales será disposto pola empresa a solicitude do traballador. No suposto de que o comité e a empresa acorde desfrutar estes seis días coletivamente, o desfrute levarase a cabo deste xeito.
A licencia de cinco días poderase continuar sen dereito a retribución, logo de certificado médico, o cal será esixido cada sete días, sendo o primeiro en modelo oficial e con cargo á empresa e os sucesivos en modelo non oficial con cargo ó traballador.
Artigo 9º.-Permisos.
A empresa poderá concederlle ó persoal permisos non retribuídos sempre que as esixencias do servicio así o permitan e obrigatoriamente no caso b) do artigo anterior, cando exceda logo da oportuna xustificación da dita licencia.
Artigo 10º.-Vacacións.
O descanso anual retribuído para todo o persoal consitirá en 30 días naturais. O período de vacacións retribuirase para cada categoría profesional cos importes que se especifican na táboa salarial anexa e que comprende os conceptos do salario base mensual, antigüidade e plus de asistencia.
Artigo 11º.-Prohibición de carga e descarga.
A empresa obrígase a non utilizar nos labores de carga e descarga que esixan subir a camións ou buque o persoal feminino, así como a cargar a man peso superior a 20 kg respecto ó persoal masculino, o límite máximo de peso a cargar a man será de 35 kg; en ámbolos casos se entende por persoa. Os menores de 18 anos só poderán efectuar labores de carga, descarga e carrexo de pesos non superiores a 8 kg para o persoal feminino e ata 20 para o masculino. No caso de arrastre manual, o peso máximo será de 50 kg cunha distancia non superior a 4 metros.
Artigo 12º.-Salario.
O persoal afectado polo presente convenio percibirá segundo a categoría profesional o salario base mensual que se especifica na tábola salarial anexa. No caso de que o IPC rexistrase o 31 de decembro de 1995 un incremento superior ó 4% respecto á cifra que resultase do dito IPC no 31 de decembro de 1994, efectuarase unha revisión salarial tan pronto como se constate oficialmente a dita circunstancia. Tal incremento aboarase con efectos do 1 de xaneiro de
1995, servindo por conseguinte como base de cálculo para o incremento salarial de 1996.
Artigo 13º.-Gratificacións extraordinarias.
Todo o persoal da empresa percibirá nos meses de xullo e decembro o importe de 30 días de salario base mensual do convenio, máis antigüidade e plus de asistencia, que figura na táboa salarial anexa.
Artigo 14º.-Complementos salariais do posto de traballo.
O persoal afectado por traballos de carácter penoso, perigoso, tóxico ou molesto percibirá por cada día de traballo complementos salariais na contía fixada na táboa salarial anexa. Se o día 1º de cada ano o valor correspondente a este suplemento fose inferior ó resultado de aplica-lo 20% sobre o salario mínimo interprofesional na dita data, percibirase o valor deste complemento na contía así calculada, sen que poida afectarlle calquera outra variación do dito salario mínimo interprofesional que se puidese producir durante o transcurso de cada ano.
As cantidades que resultasen de aplicar este criterio aboaranse con efectos retroactivos unha vez aprobado o convenio colectivo de cada ano. Todo o persoal, excluídos apoderados e técnicos, percibirán unha prima de producción de 15 ptas. por día de traballo efectivo e antes do 15 de xaneiro de cada ano unha contía de 55.000 ptas.
Artigo 15º.-Plus de transporte.
Todo o persoal da empresa percibirá en concepto de plus de transporte a cantidade de 5,10 ou 15 ptas. diarias, segundo resida en Vigo cidade, extrarradio de Vigo e outro concello, sempre e cando o viñese percibindo con anterioridade ó 31 de decembro de 1977.
O persoal que estea no cadro de persoal o 31 de decembro de 1977 e que realice os seus traballos na fábrica de fariñas será trasladado a ela en CHAPELISA con medios adecuados de transporte, percibindo en compensación ó maior tempo investido a cantidade de 40 ptas. diarias.
Artigo 16º.-Antigüidade.
Tódolos traballadores afectados por este convenio desfrutarán de aumentos periódicos por anos de servicio consistentes en trienios-mes ilimitados, segundo o valor establecido na táboa salarial anexa.
Se o primeiro de xaneiro de cada ano o valor trienio-mes fixado na táboa salarial fose inferior ó resultado de aplica-lo 6% sobre o salario mínimo interprofesional que rexese na dita data percibirase o valor do trienio na contía así calculada, sen que lle poida afectar calquera outra variación do salario mínimo interprofesional que se puidese producir durante o transcurso de cada ano.
As cantidades que resultasen de aplicar este criterio aboaranse con efectos retroactivos do día 1 de xaneiro, unha vez se aprobe o convenio cada ano.
Artigo 17º.-Horas extraordinarias.
Aboaranse de acordo coa táboa salarial anexa, aplicándose o criterio para a súa realización previsto no artigo 13 do A.I. de 1983, definíndose especificamente como horas extraordinarias estructurais as derivadas dunha prolongación necesaria da xornada como consecuencia de descargas de peixe conxelado e fresco, así como da entrada da mercadoría en cámara e a súa transformación en fariña.
A petición do traballador, cada hora extra pode ser compensada con hora e media de descanso. O desfrute deste beneficio será previamente establecido entre a empresa e o traballador.
Artigo 18º.-Vinculación á empresa.
Todo traballador que por razón de idade se xubile, cause baixa na empresa a consecuencia de invalidez permanente absoluta ou falecemento e leve nela un mínimo de 5 anos percibirá unha indemnización a tanto global na contía de 30.000 ptas., incrementándose esta noutras 30.000 ptas. por cada ano de servicio, ata un máximo de 130.000 ptas.
Artigo 19º.-Persoal con capacidade diminuída.
A empresa quedará obrigada a incorporar a un posto de traballo adecuado, sen mingua das súas percepcións económicas a todo traballador que quedase incapacitado parcial ou totalmente para o seu traballo habitual como consecuencia de accidente ou enfermidade profesional, sempre que tal posto exista na empresa. No caso de nova creación darase preferencia a este persoal, logo de proba satisfactoria de aptitude.
Artigo 20º.-Complementos prestacións de Seguridade Social.
A empresa complementará os seus traballadores en situación de incapacidade temporal derivada dunha enfermidade común ou accidente non laboral desde o 4º ó 21º día (ambos inclusive) da baixa co 25% do seu salario. Despois do 21º día a empresa aboaralle ós traballadores que continúen nesta situación a diferencia existente entre o seu salario e as prestacións da Seguridade Social ata a percepción do 100% do salario.
Se a incapacidade temporal é por hospitalización, a empresa aboará o100% do salario, desde o primeiro día da baixa.
No caso de accidente laboral, a empresa complementará co 25% as prestacións que lle corresponden ó traballador, calculadas sobre as bases de cotización para accidente, a partir do día da baixa.
Cando por razón de enfermidade o traballador precise a asistencia ó seu consultorio médico en horas coincidentes coa súa xornada laboral, a empresa concederá sen perda de retribución o permiso necesario por un total de ata dezaseis horas anuais máximo, debéndose xustificar este co correspondente volante visado polo médico.
Artigo 21º.-Plus de asistencia.
Establécese un plus de asistencia por un importe mensual de 7.284 ptas. que, divididas entre 22 días
estimados de traballo mensual resulta unha cantidade diaria de 331 ptas. Este plus devengarase na súa integridade se non se faltou ó traballo ningún día durante cada mes.
A falta de puntualidade nun día de traballo que non supere a media hora presupón a perda de 166 ptas. do plus. A reiteración de falta de puntualidade durante unha quincena presupón a perda do plus correspondente a ese mes.
Artigo 22º
No caso de necesitar cubrir algún posto de traballo, terán prioridade os fillos dos productores, sempre que reúnan as condicións esixidas para cubri-lo dito posto.
Artigo 23º
Farase unha revisión médica tódolos anos e para tódolos empregados, a través do gabinete médico da compañía coa cal a empresa ten contratado o seguro de accidentes.
Artigo 24º
O presente convenio foi acordado entre a empresa Auxiliar Conservera, S.A., representada por José María García Fernández, Eladio Liz Freire e Rodolfo Hinrichs Vázquez de Parga, este como asesor, e en representación da parte social os membros do comité de empresa José Luis Díaz Peña, Antonio García Domínguez e José Manuel Antón Otero.
III. Disposicións derradeiras.
1º. Para a interpretación e cumprimento das cláusulas deste convenio colectivo e, en xeral, para atender
cantas cuestións se derivan da súa aplicación, establécese unha comisión paritaria que está integrada polos seguintes membros:
-Tres vocais nomeados pola representación da empresa.
-Tres membros do comité de empresa.
Esta comisión reunirase a petición de calquera das partes, logo de convocatoria, nun prazo de 72 horas.
2º. O comité de empresa, ademais das que a lei lle outorga, terá as seguintes funcións específicas:
a) Denuncia-lo convenio como lexítimo representante dos traballadores.
b) Negociar convenios coa dirección; durante este proceso poderán ser asistidos polos asesores que consideren oportunos, logo de comunicación.
c) Os delegados sindicais gozarán de 15 horas mensuais para os seus labores sindicais. As horas non utilizadas por un ou varios delegados poden ser utilizadas por outros delegados que xa excedesen a súa cota, sempre que non excedan do cómputo total de horas que correspondan á totalidade dos delegados existentes.
d) En caso de celebración de congresos sindicais da central que representan, a empresa poderá autoriza-lo tempo necesario para asistir a eles.
e) A empresa, a petición persoal de cada traballador, descontará da súa nómina o importe mensual da cota sindical, a cal será ingresada na conta que se lle indique na mencionada petición, nos cinco días seguintes á liquidación de haberes.
Táboa salarial de 1995
Artigo 12º Importe día traballo
Artigo 14º 1 trienio mensual
Artigo 16º mensual
Artigo 21ºCategoría Salario base mensual
Complemento salarial
Antigüidade importe
Plus asistencia
Xerente 193.599 8.883 Axudante titulado 171.871 7.615 Xefe administrativo 171.871 7.615 Ofic. 1 administrativo 123.761 5.231 Ofic. 2 administrativo 102.933 4.347 Auxiliar administrativo 96.177 4.347 Encargado 118.479 537 4.838 7.284 Ofic. 1 máquinas 110.342 512 4.636 7.284 Ofic. 1 producción 101.906 485 4.347 7.284 Peón especialista 97.670 485 4.347 7.284 Peón 96.388 485 4.347 7.284 Operaria fabricación 94.286 485 4.347 7.284 Electricista 115.709 537 4.838 7.284
Táboa horas extras
Oficial 1 Peón especialista Peón
Día normal Festivo Día normal Festivo Día normal Festivo
S/ antigüidade 1.306 1.859 1.218 1.745 1.206 1.722 01 trienio 1.345 1.922 1.270 1.809 1.243 1.785 02 trienios 1.381 1.984 1.306 1.872 1.282 1.834 03 trienios 1.432 2.048 1.345 1.922 1.320 1.897 04 trienios 1.470 2.109 1.382 1.984 1.368 1.960 05 trienios 1.520 2.161 1.432 2.035 1.395 2.010
Oficial 1 Peón especialista Peón
Día normal Festivo Día normal Festivo Día normal Festivo
06 trienios 1.557 2.236 1.470 2.103 1.432 2.060 07 trienios 1.596 2.274 1.507 2.148 1.470 2.109 08 trienios 1.633 2.349 1.545 2.199 1.507 2.172 09 trienios 1.670 2.424 1.570 2.248 1.545 2.223 10 trienios 1.709 2.500 1.607 2.298 1.583 2.274
95-5344
