Con data 6 de agosto de 1991, Maximino Romero Lema, Genoveva, Obdulia e Herminia Suárez Romero e María Mercedes e Beatriz Romero Blanco outorgaron ante o notario do Ilustre Colexio da Coruña, con residencia en Vimianzo, Luis Rajoy Brey, escritura pública de doazón, dos terreos sitos en Baio para á construcción do edificio destinado ó instituto de ensino secundario. Conforme os artigos 17.1º da Lei 3/1985, do 12 de abril, do patrimonio da Comunidade Autónoma galega, e 34 do seu regulamento aprobado polo Decreto 50/1989, do 9 de marzo, a adquisición pura e simple de bens a título gratuíto ou lucrativo requirirá decreto do Consello da Xunta de Galicia, por proposta da Consellería de Economía e Facenda. Así mesmo, os artigos 23.1º da mesma lei e 38.1º do regulamento establecen que non se poderán adquirir bens ou dereitos a título lucrativo cando o valor dos gravames, cargas ou afeccións impostos sobre eles exceda o seu valor intrínseco; se ben non se considera carga, gravame, ou afección
os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente ou doador.
Na súa virtude, de conformidade coa proposta da Consellería de Economía e Facenda, feita nos termos nos que Maximino Romero Lema, Genoveva, Obdulia e Herminia Suárez Romero e María Mercedes e Beatriz Romero Blanco, outorgaron a doazón, logo de deliberación do Consello da Xunta de Galicia na súa reunión do día dez de maio de mil novecentos noventa e cinco,
DISPOÑO:
Artigo primeiro.
Acepta-la doazón feita por Maximino Romero Lema, Genoveva, Obdulia e Herminia Suárez Romero e María Mercedes e Beatriz Romero Blanco, dos terreos sitos na parroquia de Baio, termo municipal de Zas (A Coruña) que a continuación se describen:
A) Predio denominado Prado da Torre, dedicado a labradío e herbal, de oitenta e oito áreas e vinte centiáreas, que linda ó norte, con Herminia, Genoveva e Obdulia Suárez Romero; ó sur, con María Mercedes e Beatriz Romero Blanco; ó leste, en liña de cincuenta e sete metros -medida tomada perpendicularmente ós seus lindeiros norte e sur-, co río Grande e ó oeste, en liña, co camiño de nova construcción que conduce ó campo de futbol.
B) Predio denominado Prado da Torre, dedicado a herbal, de vintedúas áreas e cinco centiáreas, que
linda ó norte, con Ramón Francisco Romero Lema, ó sur, Maximino Romero Lema; ó leste, co río Grande e ó oeste, co resto do predio matriz.
C) Predio denominado Prado da Torre, dedicado a herbal, de dezanove áreas e corenta e catro centiáreas, que linda ó norte con Maximino Romero Lema; ó sur, co muro que cerra e separa dos herdeiros de Manuel Caamaño Pazos; ó leste, co río Grande; e ó oeste, co resto do predio matriz.
Artigo segundo.
Os inmobles doados, con todo o que lles é anexo e inherente e libres de toda clase de cargas e gravames, destinaranse á construcción dun edificio onde se instalará un instituto de ensino secundario.
Artigo terceiro.
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e a inscrición do ben no Rexistro da Propiedade a nome da Comunidade Autónoma.
Disposición derradeira.
A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade do presente decreto.
Santiago de Compostela, dez de maio de mil novecentos noventa e cinco.
José Antonio Orza Fernández
Conselleiro de Economía e Facenda
Manuel Fraga Iribarne
Presidente