Mediante a Lei 11/1992, do 7 de outubro, de réxime financeiro e presupostario de Galicia, e a Lei 1/1994, do 30 de marzo, de presupostos xerais da Comunidade Autónoma para 1994, o Parlamento de Galicia autorizou ó Instituto Galego de Promoción Económica (Igape) a concesión de avales. Para o cumprimento de ámbolos dous preceptos dictouse o Decreto 284/1994, do 15 de setembro, de regulación de avales do Igape, marco regulamentario polo que se veu rexendo ata a data a concesión de avales polo dito instituto.
Considerando que as crecentes necesidades de financiamento do sector privado de Galicia aconsellan ampliar e diversifica-lo ámbito de actuación
do Instituto Galego de Promoción Económica en materia de concesión de avales, díctase o presente decreto.
Na súa virtude, por proposta do conselleiro de Economía e Facenda, logo de deliberación do Consello da Xunta de Galicia, na súa reunión do día dez de maio de mil novecentos noventa e cinco,
DISPOÑO:
Artigo único.-Apróbanse as seguintes modificacións nos artigos que se sinalan no Decreto 284/1994; do 15 de setembro, de regulación de avales do Instituto Galego de Promoción Económica:
1. Dáselle nova redacción ó número 4 do artigo 2º.
«4. Igualmente, poderán avalarse as empresas polas operacións ou actividades que resulten de especial interese socio-económico para Galicia, segundo acordo da Comisión Delegada da Xunta de Galicia para Asuntos Económicos».
2. Engádeselle un número 5 ó artigo 2º:
«5. Así mesmo, o Igape poderá reavalar diante das sociedades de garantía recíproca domiciliadas en Galicia e ata o 25% do risco que estas asuman como primeiras avalistas da operación, a aquelas empresas acollidas ós programas de fomento empresarial, que para tal fin se concerten entre o Igape e as ditas sociedades de garantía recíproca».
3. Dáselle nova redacción á letra b) do número 1 do artigo 5º:
«b) Poderán garantir ata o cento por cento do principal dos créditos e demais liñas ou operacións financeiras destinadas a reconversión ou reestructuración de empresas e ata o setenta por cento dos destinados á súa creación ou ampliación. Respecto dos xuros, aplicarase o que se determine no contrato de aval».
54. Engádeselle unha letra i) ó número 1 do artigo 6º:
«i) A proposta de concesión de crédito ou liña de financiamento de que se trate pola entidade ou entidades financeiras ante quen se prestaría a garantía solicitada».
5. Engádeselle un número 3 ó artigo 6º:
«3. Nos supostos a que se refiren os números 4 e 5 do artigo 2º, así como nos avales técnicos ou de similar natureza, o Consello de Dirección do Igape poderá eximi-lo solicitante da presentación daquela parte da documentación prevista no número 1 deste artigo, que non resulte relevante para a concesión da garantía solicitada».
6. Engádeselle un número 3 ó artigo 8º:
«3. Excepcionalmente, o Consello de Dirección do Igape poderá acordar que os avales que se presten ó abeiro do establecido nos números 4 e 5 do artigo 2º non devenguen comisión ningunha».
7. Engádeselle un parágrafo ó artigo 9º:
«Non obstante o anterior, cando se trate de avales concedidos ó abeiro do previsto nos números 4 e 5 do artigo 2º, o Consello da Xunta de Galicia poderá excepciona-la presentación de garantías».
Disposicións derradeiras
Primeira.-O conselleiro de Economía e Facenda poderá dicta-las normas necesarias para a aplicación do disposto neste decreto.
Segunda.-O presente decreto entrará en vigor o día seguinte ó da súa publicación no Diario Oficial de Galicia.
Santiago de Compostela, dez de maio de mil novecentos noventa e cinco.
Manuel Fraga Iribarne
Presidente
José Antonio Orza Fernández
Conselleiro de Economía e Facenda