De conformidade co establecido no artigo 3 do Decreto 148/1991, do 2 de maio, polo que se establecen os órganos de dirección e colexiados nos hospitais da Comunidade Autónoma de Galicia, dependentes da Consellería e Sanidade e Servicios Sociais e xestionados polo Servicio Galego de Saúde e polo que se determinan as funcións destes, e no artigo único do Decreto 143/1992, do 5 de xuño, e no exercicio das competencias atribuídas no artigo 4 letra o) da Lei 1/1989, do 2 de febreiro, de creación do Servicio Galego de Saúde, modificada pola Lei 8/1991, do 23 de xullo,

ORDENO:

Primeiro.-Anunica-la convocatoria para cubrir, polo sistema de libre designación, os postos de traballo de director xerente do Hospital Comarcal de Valdeorras e de director de xestión do Hospital da Costa en Burela. O réxime xurídico aplicable será o previsto no Decreto 143/1992, do 5 de xuño.

Segundo.-Poderán concorrer a ela os interesados que reúnan os requisitos sinalados no artigo 3 do Decreto 148/1991, do 2 de maio, ou no artigo único do Decreto 143/1992, do 5 de xuño.

Terceiro.-Os aspirantes deberán presentar xunto coa solicitude un currículum vitae e xustificar mediante certificación ou copia compulsada os méritos nel alegados, ademais dos requisitos esixidos na normativa á que se fai referencia no apartado anterior.

Cuarto.-As ditas solicitudes poderanse presentar no rexistro xeral da Consellería de Sanidade e Servicios Sociais, nos das súas delegacións provinciais, nos das direccións provinciais do Sergas, ou en calquera das oficinas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, no prazo de quince días hábiles, contados a partir do seguinte ó da súa publicación no Diario Oficial de Galicia.

Quinto.-Os aspirantes que resulten seleccionados deberán tomar posesión nos prazos sinalados no artigo 14 do Decreto 93/1991, do 20 de marzo.

No suposto de que obteña destino un aspirante pertencente a outras administracións públicas, o seu cesamento deberá levarse a cabo de acorde coa lexislación da súa Administración de procedencia e quedarán na situación que proceda, de acorde coas súas normas específicas.

A aquel funiconario de carreira da Administración do Estado que resulte seleccionado seralle de aplicación o disposto no parágrafo segundo do artigo 22 do Real decreto 28/1990, do 15 de febreiro (BOE nº 14, do 16 de febreiro), requiríndose, en consecuencia, o informe favorable do departamento en que presta os seus servicios. De non emitirse o dito informe no prazo de quince días, este considerarase favorable.

Así mesmo, no suposto de resultar seleccionada algunha persoa que teña a condición de persoal estatutario do sistema nacional de saúde en propiedade, será declarada polo organismo competente na situación de excedencia especial en activo, prevista no artigo 13 de Estatuto de persoal sanitario non facultativo das institucións sanitarias da Seguridade Social, aprobado por Orde do 5 de xullo de 1971, tamén aplicable ó persoal non sanitario, de conformidade co establecido no artigo 34.3º da Lei 4/1990, do 29 de xuño, de presupostos xerais do Estado para 1990.

Sexto.-A resolución desta convocatoria farase pública no Diario Oficial de Galicia e poderase declarar deserto algún ou ámbolos dous postos de traballo convocados, de considerarse oportuno.

Sétimo.-Contra a presente orde, que esgota a vía administrativa, poderase interpoñer recurso contencioso-administrativo, previsto na Lei reguladora da xurisdicción contencioso-administrativa, do 27 de decembro de 1956, perante o Tribunal Superior de Xustiza de Galicia, no prazo de dous meses a partir do día seguinte ó da súa publicación, logo de comunicarllo a esta consellería, segundo o previsto no artigo 110.3º da Lei 30/1992 do 26 de novembro, de réxime xurídico das administracións públicas e do procedemento administrativo común.

Santiago de Compostela, 7 de abril de 1995.

José Manuel Romay Beccaría

Conselleiro de Sanidade e Servicios Sociais