O Concello de Ribadeo (Lugo), en sesión celebrada o día 5 de decembro de 1994, aprobou os proxectos de mellora do contorno na praia do Cargadeiro e do parque etnográfico das ruínas do Cargadeiro e na mesma sesión acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
O concello remitiu a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Relacións Laborais o día 10 de febreiro de 1995, baixo o número 1187.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Calidade Medioambiental e Urbanismo da Consellería de Política Territorial, Obras Públicas e Vivenda emitiu informes favorables. Os ditos informes tiveron entrada no rexistro xeral da Consellería de Xustiza, Interior e Relacións Laborais os días 3 de marzo de 1995 e 22 de marzo de 1995 baixo os números 2051 e 2651, respectivamente.
Considérase necesaria a declaración de urxente ocupación dos bens e dereitos precisos para a realización das obras dos proxectos técnicos sinalados, polo compromiso existente co Servicio de Costas de Lugo para que este organismo execute a obra da área recreativa do Cargadeiro que ten unha vixencia limitada imposta por costas por esixencia orzamentaria, e de non cumpri-lo concello coa súa parte de aporta-los terreos necesarios de forma inminente perderíase a obra por cancela-la consignación orzamentaria para este fin, e porque é a única vía posible para que o Concello de Ribadeo poida cumprir co seu compromiso de aportar de forma inmediata tódolos terreos afectados e deste xeito non perde-la construcción da área recreativa e a adquisición vía expropiatoria polo procedemento de urxencia.
A competencia para a declaración da urxente ocupación corresponde ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude e por proposta do conselleiro de Xustiza, Interior e Relacións Laborais, logo de deliberación do Consello da Xunta de Galicia na súa reunión do día vinte de abril de mil novecentos noventa e cinco,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Ribadeo (Lugo), para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras dos proxectos de mellora do contorno na praia do Cargadeiro e do parque etnográfico das ruínas do Cargadeiro.
Santiago de Compostela, vinte de abril de mil novecentos noventa e cinco.
Manuel Fraga Iribarne
Presidente
Juan Miguel Diz Guedes
Conselleiro de Xustiza, Interior e Relacións Laborais