Mediante Resolución do 28 de decembro de 1994 o director xeral do Instituto Galego da Vivenda e Solo acordou cede-lo local nº 1, planta baixa e entreplanta sito na rúa Illas Canarias de Lugo ó Servicio Galego de Saúde, para a construcción dun centro de saúde.
Conforme o artigo 17.1 da Lei 3/1985, do 12 de abril do patrimonio da Comunidade Autónoma, requírese decreto do consello da Xunta de Galicia, para a adquisición de bens a título gratuíto. Por outra banda, o artigo 23.1 da mesma lei establece que non se poderán adquirir bens ou dereitos a título lucrativo cando o valor dos gravames cargas ou afeccións impostos sobre estes exceda o seu valor intrínseco, se ben non se consideran cargas, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente.
En cumprimento do disposto na Lei 3/1985, do 12 de abril, do patrimonio da Comunidade Autónoma, de conformidade coa proposta do conselleiro de Sanidade e Servicios Sociais e presidente do Servicio Galego de Saúde e coas condiciós estipuladas na resolución do 28 de decembro de 1994 do Instituto Galego da Vivenda e Solo, logo de deliberación do Consello da Xunta de Galicia na súa reunión do vintecatro de febreiro de mil novecentos noventa e cinco,
DISPOÑO:
Artigo primeiro.-
1. Acéptase a cesión a título gratuíto dun inmoble, propiedade do Instituto Galego da Vivenda e Solo, feita a favor do Servicio Galego de Saúde para a construcción dun centro de saúde.
2. O inmoble cedido é o local nº 1, planta baixa e entreplanta de 903,60 m e 1.245,84 m respectivamente, comunicado interiormente entre si con escaleiras e ascensor propios, do edificio ou bloque, con fronte á rúa Illas Canarias e rúa de nova apertura na cidade de Lugo.
As demais características e lindeiros son os que constan na escritura de obra nova e división horizontal outorgada o 15 de xullo de 1994, ó tomo 1.149, libro 710, e folio 55, predio nº 70.623.
3. O local obxecto de cesión atópase inscrito no Rexistro da Propiedade nº 1 de Lugo a favor do Instituto Galego da Vivenda e Solo, por título de división horizontal, no tomo 1.149, libro 710, folio 55, predio nº 70.623, inscrición primeira.
Artigo segundo.-
O inmoble cédese libre de cargas e destinarase á construcción dun centro de saúde.
Artigo terceiro.-
O Servicio Galego de Saúde a través do seu órgano competente procederá á formalización da aceptación no correspondente documento público, inscribíndose no Rexistro da Propiedade o seu nome e integrándose no seu patrimonio propio.
Disposición derradeira
O Servicio Galego de Saúde, a través do seu órgano competente levará a cabo os trámites necesarios para a efectividade de canto se dispón neste decreto.
Santiago de Compostela, vintecatro de febreiro de rnil novecentos noventa e cinco.
Manuel Fraga Iribarne
Presidente
José Manuel Romay Beccaría
Conselleiro de Sanidade e Servicios Sociais e
Presidente do SERGAS