Para poder realizar unha axeitada planificación en calquera eido da asistencia sanitaria é preciso dispoñer de mecanismos de información que permitan coñece-los recursos de que se dispón e as necesidades da sociedade, encontrándose dentro deste soporte informativo os distintos rexistros.
Neste sentido, a insuficiencia renal é, polas súas
propias características, unba das patoloxías máis susceptibles de utilizar un rexistro de recollida, análise e tratamento de datos, de xeito que permita a realización de estudios clínicos e epidemiolóxicos, a avaliación das necesidades, a planificación de recursos e a valoración da calidade da asistencia nefrolóxica en Galicia.
De acordo co disposto no artigo 33.1º do Estatuto de autonomía de Galicia, e en uso das competencias que me confire a Lei 1/1983, do 22 de febreiro, reguladora da Xunta e do seu presidente,
DISPOÑO:
Artigo lº.-
Créase o Rexistro de Enfermos Renais de Galicia, no que se incluirán os enfermos que sigan tratamento por insuficiencia renal crónica na Comunidade Autónoma de Galicia.
O Rexistro de Enfermos Renais de Galicia quedará adscrito á Dirección Xeral de Organización Sanitaria da Consellería de Sanidade e Servicios Sociais.
Artigo 2º.-
O Rexistro de Enfermos Renais de Galicia terá os obxectivos seguintes:
a) Determina-las características demográficas da poboación afectada.
b) Proporciona-los datos epidemiolóxicos e asistenciais precisos para unha planificación eficaz de atención á insuficiencia renal crónica.
c) Avalia-la eficacia da rede asistencial en relación coa insuficiencia renal crónica, nos seus aspectos sanitario, económico e de xestión.
d) Servir de base para a elaboración de estudios clínicos e epidemiolóxicos.
Artigo 3º.-
Os servicios de nefroloxía dos hospitais públicos dependentes do Servicio Galego de Saúde e dos centros con asistencia concertada de hemodiálise, deberán remitir á Dirección Xeral de Organización Sanitaria a información precisa para o mantemento actualizado do Rexistro de Enfermos Renais de Galicia.
A Consellería de Sanidade e Servicios Sociais garantirá a cofidencialidade dos datos de acordo co establecido na Lei orgánica 5/1992, do 29 de outubro, de regulación do tratamento automatizado dos datos de carácter persoal.
Artigo 4º.-
Constituirase unha Comisión de Control e Seguimento do Rexistro de Enfermos Renais de Galicia, que estará integrada por:
a) En representación da Consellería de Sanidade e Servicios Sociais:
-O director da Oficina de Coordinación de Trasplantes.
-O responsable do Rexistro de Enfermos Renais de Galicia.
b) En representación dos profesionais da asistencia nefrolóxica:
-Os xefes do Servicio de Nefroloxía, ou persoa na que deleguen, dos centros públicos: Complexo Hospitalario Juan Canalejo-Marítimo de Oza, Complexo Hospitalario de Santiago de Compostela, Complexo Hospitalario Xeral-Calde, Complexo Hopitalario Cristal-Piñor, Complexo Hospitalario Xeral-Cíes, Hospital Montecelo e Hospital Mexoeiro.
-Os xefes de Servicio de Nefroloxía, ou persoa na que deleguen, dos centros concertados: Policlínico de Vigo, S.A. e Hospital Provincial de Pontevedra.
Artigo 5º.-
As funcións da Comisión de Control e Seguimento do Rexistro de Enfermos Renais de Galicia serán as seguintes:
a) Garanti-lo cumprimento das normas que se restablezan para a utilización dos datos do rexistro.
b) Estudiar e propoñe-los cambios no deseño, forma de recollida da información e outros puntos de interese que considere oportunos para mante-to rexistro coa máxima actualidade e axilidade.
c) Elaborar informes periódicos sobre a situación da insuficiencia renal crónica en Galicia.
Disposicións derradeiras
Primeira
Facúltase o director xeral de Organización Sanitaria para adopta-las medidas oportunas en relación á execución desta orde.
Segunda
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 7 de febreiro de 1995.
José Manuel Romay Beccaría
Conselleiro de Sanidade e Servicios Sociais
