En virtude do convenio asinado entre a Consellería de Educación e Ordenación Universitaria e o Colexio de Europa en Bruxes, co fin de contribuír á formación de profesionais que se familiaricen coas institucións, o dereito e a economía europeos,
DISPOÑO:
Artigo 1º.-Convócase concurso público para a adxudicación de dúas bolsas destinadas a titulados superiores en dereito ou en ciencias económicas e empresariais para realizar estudios de especialización en temas relacionados coa Unión Europea e o proceso de integración europeo, no Colexio de Europa con sede en Bruxes.
Artigo 2º.-Apróbanse as bases que rexerán esta convocatoria e que se publican como anexo I a esta orde.
Artigo 3º.-A Xunta de Calicia financiará estas bolsas con cargo á partida orzamentaria 07.05.431A.800.00 da Dirección Xeral de Universidades e Investigación para o exercicio de 1995.
Artigo 4º.-A convocatoria, as súas bases e tódolos actos administrativos que se deriven dela poderán ser impugnados polos interesados no prazo e forma previstos na Lei 30/1992, do réxime xurídico das administracións públicas e do procedemento administrativo común.
Artigo 5º.-Para os efectos establecidos no artigo 42.2 da Lei 30/1992, o prazo máximo para resolve-las solicitudes correspondentes ás accións especificadas nesta orde será de seis meses, contados a partir do día seguinte ó da data de peche da respectiva convocatoria. Se no dito prazo non se dictase resolución expresa entenderase que quedan desestimadas as solicitudes presentadas.
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 15 de febreiro de 1995.
Juan Piñeiro Permuy
Conselleiro de Educación e Ordenación
Universitaria
ANEXO I
Bases da convocatoria
1.-Requisitos dos solicitantes.
As bolsas poderán ser solicitadas por aqueles titulados superiores en dereito ou ciencias económicas e empresariais que cumpran os seguintes requisitos:
a) Ter rematados os estudios de licenciatura en xuño de 1989 ou con posterioridade a esta data.
b) Ter coñecementos satisfactorios de galego, inglés e francés.
2.-Duración e contía das bolsas.
A duración das bolsas é a de un curso académico completo (1995-96).
O importe de cada bolsa ascende a un total de 1.650.000 ptas. brutas que se destinará a:
a) Ó pagamento das taxas e estadía que se efectuará en nome do bolseiro pola Consellería de Educación e Ordenación Universitaria directamente ó Colexio de Europa en Bruxes.
b) A cantidade restante ingresaráselles ós bolseiros nun só pagamento, en concepto de axuda institucional para gastos de desprazamento e seguro combinado de accidentes.
3.-Formalización das solicitudes.
As solicitudes, conforme o modelo oficial que se publica como anexo II a esta orde, presentaranse no Rexistro Xeral da Consellería de Educación e Ordenación Universitaria ou en calquera dos centros previstos no artigo 38.4 da Lei 30/1992, de réxime xurídico das administracións públicas e do procedemento administrativo común. As solicitudes deberán ir acompañadas da seguinte documentación:
a) Currículum vitae dos solicitantes cos documentos acreditativos dos méritos alegados.
b) Certificación académica completa que acredite a súa condición de licenciado en dereito ou en ciencias económicas e empresariais, tendo rematados os estudios correspondentes en xuño de 1989 ou en data posterior. No caso de que o solicitante espere acadar esta condición en xuño de 1995 aceptarase tamén a solicitude, pero a concesión da bolsa, se é o caso, farase con carácter condicional, subordinada á presentación da certificación académica que deberá remitírselle á Dirección Xeral de Universidades e Investigación antes do 31 de xullo de 1995.
En todo caso deberá presentar un certificado académico que reflicta os estudios cursados ata o momento e as cualificacións obtidas.
c) Documentos que acrediten un dominio suficiente do galego, inglés e francés. A comisión de selección poderá realiza-las probas que coide oportunas sobre a capacidade de expresión oral e escrita do solicitante.
O prazo de presentación de solicitudes será de 15 días hábiles, a partir do día seguinte ó da publicación da presente orde no Diario Oficial de Galicia.
4.-Valoración e resolución do concurso.
A Dirección Xeral de Universidades e Investigación procederá a nomear unha comisión de selección,
a cal, despois de realizar unha avaliación das solicitudes, elaborará unha relación na que figurarán aqueles candidatos que, ó seu xuízo, reúnen os requisitos mínimos para acceder a estas bolsas.
Unha vez que o Colexio de Europa confirme a selección dalgún dos candidatos propostos (máximo de 2), a Consellería de Educación e Ordenación Universitaria procederá a resolver con carácter definitivo a presente convocatoria mediante orde que se publicará no Diario Oficial de Galicia.
A composición da comisión de selección farase pública con anterioridade á resolución da convocatoria.
A selección realizarase tendo en conta o expediente académico e o currículum presentado polos solicitantes. En caso de empate daráselles prioridade a aqueles solicitantes que realizasen os seus estudios de licenciatura nas universidades galegas.
5.-Obriga dos bolseiros.
a) O bolseiro está obrigado a incorporarse ó centro correspondente ó comezo do curso académico e deberá informar inmediatamente diso á Dirección Xeral de Universidades e Investigación.
b) A Dirección Xeral de Universidades e Investigación poderá, en calquera momento do curso, solicitarlle ó bolseiro un informe sobre as súas actividades. O mesmo poderalles ser solicitado tamén ós responsables do seu programa de estudios. No caso de producirse unha avaliación desfavorable poderá decidirse o cesamento inmediato da axuda e incluso a devolución das cantidades xa pagadas.
c) O bolseiro comprométese a elaborar unha memoria final cun resumo dos estudios realizados así como de tódolos extremos que xulgue convenientes. A dita memoria final entregarase ó remate dos estudios.
d) O desfrute da bolsa é incompatible coa realización de calquera traballo remunerado ou con outra bolsa.
6.-Aceptación da bolsa.
A aceptación da bolsa farase mediante documento asinado polo bolseiro no que se compromete a cumprir todas e cada unha das condicións recollidas nas presentes bases.
7.-Incidencias.
Non se admitirán renuncias ás bolsas concedidas salvo casos excepcionais debidamente xustificados.
O incumprimento por parte dos bolseiros dos compromisos adquiridos conforme as bases da presente convocatoria poderá dar lugar á revogación da axuda concedida e á reclamación das cantidades anticipadas de conformidade co disposto no artigo 78.6 da Lei 11/1992, de réxime financeiro e orzamentario de Galicia.
A Dirección Xeral de Universidades e Investigación resolverá tódalas dúbidas e incidencias que poidan xurdir na aplicación da presente convocatoria.