A Consellería de Cultura, que ten como unha das súas misións máis importantes promove-las actividades culturais, creou o Rexistro Xeral de Iniciativas Culturais, polo Decreto 334/1994, do 8 de setembro, coa finalidade de acoller tódalas propostas de carácter cultural que lle formulen os particulares, asociacións e institucións de carácter cultural, consciente do labor que as asociacións e institucións culturais veñen desenvolvendo desde antigo a través de actividades culturais de gran riqueza e interese e dirixidas ós seus asociados e, nos máis dos casos, ó público en xeral. Estas actividades abranguen os máis diversos campos da cultura como o cine, o teatro afeccionado, a música, a danza e en xeral
as diversas expresións artísticas do ser humano, e mantiveron aceso durante moitos anos o facho da nosa identidade como pobo e aínda o seguen a manter na actualidade. Por outra parte, as máis das asociacións e institucións culturais carecen doutros ingresos como non sexan as escasas aportacións dos seus membros e as axudas que poidan conseguir de administracións públicas, empresas privadas e mesmo de particulares. A Consellería de Cultura quere contribuír ó desenvolvemento das actividades culturais estimulando o asociacionismo cultural, instrumento idóneo da dinamización sociocultural.
Por todo isto,
DISPOÑO:
Artigo 1. En virtude do disposto no artigo 6º do Decreto 334/1994, do 8 de setembro, polo que se crea o Rexistro Xeral de Iniciativas Culturais, con
vócanse subvencións a particulares, asociacións e institucións culturais de Galicia, destinadas á realización daqueles proxectos que resulten preseleccionados pola Consellería de Cultura nos campos de promoción e cooperación cultural, audiovisuais e fotografía, difusión e animación sociocultural, teatro afeccionado, música e danza, con cargo á aplicación orzamentaria 10.02.353.B.480 dos orzamentos xerais da Comunidade Autónoma de Galicia para 1995.
Artigo 2. A contía de cada subvención non poderá supera-la cantidade de 5.000.000 (cinco millóns) de pesetas.
Artigo 3.
3.1. Poderán optar a estas subvencións os particulares, asociacións e institucións culturais legalmente constituídas, sen ánimo de lucro e que realicen a súa actividade en Galicia.
3.2. Quedan excluídas aquelas que anteriormente recibisen algunha outra subvención da Consellería de Cultura e non xustificasen o seu investimento.
Artigo 4. Os solicitantes presentarán o seu proxecto segundo o establecido no artigo 2º.3 do Decreto 334/1994, do 8 de setembro, no Rexistro Xeral de Iniciativas Culturais mediante instancia dirixida ó conselleiro de Cultura segundo o modelo que figura no anexo desta orde, acompañada da seguinte documentación:
-Fotocopia da tarxeta de identificación fiscal.
-Memoria explicativa das actividades que se pretenden realizar indicando o ámbito territorial e social delas, así como a forma de executalas, ben directamente, ben en colaboración coa Administración autonómica, asociacións ou institucións.
-Orzamento de ingresos e gastos da actividade con expresión das axudas solicitadas ou concedidas por parte doutros organismos públicos ou privados.
-Breve memoria das actividades realizadas ata o ano 1994 polo solicitante.
Artigo 5. Recibidas as solicitudes de subvención e demais documentación, inscribiranse no Rexistro Xeral de Iniciativas Culturais, e serán analizadas pola Comisión de Programación e Coordinación de Iniciativas Culturais quen elevará proposta ó conselleiro de Cultura que resolverá, dentro das dispoñibilidades orzamentarias.
Artigo 6. Na valoración de solicitudes, de acordo co previsto no artigo 42 do Decreto 334/1994, do 8 de setembro, teranse en conta os seguintes aspectos:
A) Importancia e interese cultural da correspondente proposta.
B) Novidade ou antecedentes dela.
C) Ámbito territorial e social da proposta, e posible repercusión na imaxe interior e exterior de Galicia ou da súa cultura.
D) Valoración económica da proposta.
E) Conveniencia de asumi-la proposta, con indicación do sistema máis adecuado para desenvolvela,
ben directamente pola Administración ou ben polos propios autores da iniciativa, con ou sen colaboración doutros axentes culturais (asociacións e institucións).
Artigo 7.
7.1. Os beneficiarios das subvencións, unha vez aceptadas estas, quedarán obrigados a destina-los fondos percibidos para o obxecto concreto para o que foron concedidos, debendo comunicar á Dirección Xeral de Cultura o lugar, día e hora da actividade subvencionada, así como comunicar calquera modificación da actividade. A Dirección Xeral de Cultura poderá comprobar, cando o considere conveniente, a execución dos proxectos.
7.2. Unha vez concedida a subvención e aceptada polo solicitante, librarase a cantidade adxudicada, de acordo co establecido na normativa orzamentaria que sexa de aplicación.
7.3. Os beneficiarios da subvención quedarán obrigados a xustifica-las subvencións concedidas, no prazo dos quince días naturais posteriores á realización das actividades e en todo caso antes do 1 de novembro do ano 1995, mediante a aportación, por duplicado, de xustificantes acreditativos de que a actividade foi realizada.
7.4. Os beneficiarios da subvención farán constar en toda a publicidade xerada pola actividade subvencionada que recibiron unha subvención da Consellería de Cultura, Dirección Xeral de Cultura, utilizando a normativa da imaxe corporativa da Xunta de Galicia, cumprindo coa normativa vixente esixida para o depósito legal.
Artigo 8. No caso de que o beneficiario da axuda incumprise algunha das condicións ou obrigas estipuladas, a Consellería de Cultura instruirá expediente sancionador, conforme o previsto na vixente Lei de réxime xurídico das administracións públicas e do procedemento administrativo común e, se procede, anulará os beneficios concedidos e solicitará a devolución das cantidades percibidas, se as houber, segundo o procedemento que establece o Regulamento xeral de recadación.
Artigo 9. A falta de resolución expresa por parte da Administración producirá efectos desestimatorios transcorridos seis meses desde a presentación no Rexistro Xeral de Iniciativas Culturais, podendo o solicitante, a partir desta data, retira-la documentación presentada nun prazo de 30 días naturais. Transcorrido este prazo arquivarase sen máis trámites.
Disposicións derradeiras
Primeira.-Facúltase o director xeral de Cultura para dictar, no ámbito das súas competencias, as resolucións precisas para o desenvolvemento desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 18 de xaneiro de 1995.
Víctor Manuel Vázquez Portomeñe
Conselleiro de Cultura
Sr. Director Xeral de Cultura