Para contribuír ó fomento da preparación e adestramento do persoal das administracións públicas da Comunidade Autónoma galega no uso das linguas comunitarias, a Escola Galega de Administración Pública (EGAP) convoca 50 axudas para asistencia a cursos de idiomas conforme as seguintes,
BASES
I.-Solicitantes.
1. Para solicitar estas axudas será necesario reuni-los seguintes requisitos:
a) Estar en situación de servicio activo e ser funcionario de carreira ou contratado laboral fixo da Xunta de Galicia que desenvolva en tódolos casos funcións administrativas. Tamén poderán solicitalas os funcionarios de carreira e contratados laborais fixos, das administracións local, universitaria e parlamentaria de Galicia.
b) Estar matriculado en calquera centro especializado en ensino de idiomas ou poder estalo ata o remate do prazo de presentación de instancias nalgunha das seguintes linguas: inglés, francés, alemán, italiano ou portugués.
c) Que as clases teñan lugar fóra do horario de traballo do solicitante.
II.-Prazo.
2. O prazo de presentación de instancias será de dez días naturais a partir da publicación desta convocatoria no Diario Oficial de Galicia.
III.-Número e contía das axudas.
3. O número máximo de axudas fíxase en 50, distribuídas da seguinte forma: 32 de inglés, 12 de francés, 2 de italiano e 2 de portugués. En caso de que non existan candidatos ou non reúnan os méritos suficientes para un idioma, poderán acumularse a outros.
4. A contía máxima de cada axuda ascenderá a 10.000 ptas., para gastos de matrícula e libros de textos ou de consulta.
IV.-Formalización da solicitude.
5. Utilizarase como modelo da solicitude o que se inclúe ó final desta convocatoria e irá dirixida ó director da EGAP, polígono das Fontinas, s/n, 15703 Santiago de Compostela (A Coruña).
6. As solicitudes presentaranse acompañadas da seguinte documentación:
1º Copia compulsada do DNI ou NIF.
2º Certificación ou resgardo que acredite estar matriculado nun dos centros citados.
3º Comprobante de ter efectuados os pagamentos da matrícula e dos libros. Acreditaranse por separado os gastos de matrícula e os de libros sen supera-la contía máxima.
4º Certificación académica das cualificacións anteriores no idioma para o que se solicita a axuda. Se non fose obxecto de valoración anterior, presentarase certificación académica dos estudios realizados.
5º Currículum vitae.
V.-Proceso de selección.
7. A EGAP aterase ós seguintes criterios de selección:
1º Daráselles preferencia ós solicitantes de cada idioma que máis o utilicen no seu traballo. A relación co posto de traballo acreditarase documentalmente mediante certificación do responsable da unidade directiva de dependencia.
2º Terá preferencia o persoal da Xunta de Galicia sobre o doutras administracións.
3º Teranse en conta as notas obtidas no idioma respectivo en anteriores cursos e o currículum do solicitante.
VI.-Obrigas dos solicitantes.
8. Quedan obrigados a aporta-la dita documentación, así como aqueles datos que a Administración lles pida para as comprobacións que se consideren pertinentes.
VII.-Obrigas dos beneficiarios.
9. A escola poderá esixi-la devolución da axuda recibida nos supostos de inasistencia regular ás clases ou de non presentarse ás probas establecidas polo centro.
10. Só se poderá ser beneficiario dunha axuda.
11. O desfrute desta axuda é incompatible con calquera outro tipo de axuda financiada con fondos públicos para a mesma finalidade.
12. Tampouco poderá desfrutar destas axudas o persoal que sexa seleccionado para asistir a cursos de idiomas organizados pola EGAP.
Santiago de Compostela, 28 de novembro de 1994.
Jaime Rodríguez-Arana Muñoz
Director da Escola Galega de Administración
Pública