Esta dirección xeral, unha vez cumpridos os trámites administrativos correspondentes, resolveu anuncia-lo concurso público para a contratación da dirección técnica, asesoramento e coordinación do servicio público de salvamento e loita contra a contaminación no mar na Comunidade Autónoma de Galicia.

Orzamento de contratación: 28.136.063 ptas.

Prazo de execución: 1 de febreiro de 1995 a 31 de decembro de 1995, prorrogable nos termos expresados no prego de cláusulas administrativas particulares.

Fianza definitiva: 1.125.443 ptas.

Exposición da documentación: o prego de cláusulas administrativas particulares e de especificacións técnicas, que poderán examinarse na Dirección Xeral de Pesca e Industrias Pesqueiras da Consellería de Pesca, Marisqueo e Acuicultura, rúa de Sar nº 75 (Santiago de Compostela), así como nas súas delegacións territoriais durante o prazo de presentación de proposicións e de 9 a 14 horas.

A presentación de proposicións farase no rexistro xeral da Consellería de Pesca, Marisqueo e Acuicultura, en sobres pechados, que indicarán exteriormente o concurso a que se opta e a identificación da empresa.

En caso de optar por calquera dos procedementos previstos no artigo 100 do Regulamento xeral de contratación do Estado, remitirase antes da data e hora de finalización de proposicións unha comunicación en forma de telegrama, télex ou fax á Dirección Xeral de Pesca e Industrias Pesqueiras indicando a súa presentación, e identificando o nome e enderezo da empresa licitante.

Prazo de presentación de proposicións: comezará o día seguinte ó da publicación desta resolución no DOG, e rematará o vixésimo día hábil.

Documentación que presentarán os licitadores: a que se especifique no prego de cláusulas administrativas particulares.

Apertura de proposicións: será realizada pola mesa de contratación ás 11 horas do segundo día hábil contado a partir da data de remate de presentación de proposicións, salvo en caso de que coincidise en sábado, no cal se trasladaría ó inmediato hábil seguinte, na sala de Xuntas da Dirección Xeral de Pesca e Industrias Pesqueiras na rúa de Sar nº 75 (Santiago de Compostela).

Os anuncios e demais gastos que orixine este concurso serán por conta do adxudicatario.

Santiago de Compostela, 13 de xaneiro de 1995.

Samuel Juárez Casado

Director xeral de Pesca e Industrias Pesqueiras