A Consellería de Xustiza, Interior e Relacións Laborais no marco da súa liña de colaboración coa Administración local para contribuír a mellora-la calidade da vida local, e pretendendo estimular ó mesmo tempo a participación nestes cometidos das asociacións de veciños, regula por medio da presente orde, os requisitos e o procedemento que se seguirá para a concesión de axudas económicas destinadas á realización de obras e equipamentos locais, que redunden na mellora da vida local. Por todo isto,

DISPOÑO:

Artigo 1º.

Establécense subvencións ás asociacións de veciños de Galicia, destinadas á realización das obras e equipamentos locais (bens non consumibles) que sexan necesarios para garanti-la mellora da vida local.

Estas subvencións faranse efectivas con cargo á aplicación orzamentaria 13.02.780, programa 123.A, dos orzamentos xerais da Comunidade Autónoma de Galicia para 1995, ata un límite de sesenta millóns de pesetas (60.000.000).

Artigo 2º.

A axuda económica que se conceda poderá acada-lo 100% do total do orzamento presentado.

A contía de cada subvención non poderá excede-la cantidade de un millón de pesetas (1.000.000 ptas.).

Artigo 3º.

1. Os que dexesen acollarse ós beneficios desta orde elevarán petición, por medio de instancia dirixida ó conselleiro de Xustiza, Interior e Relacións Laborais, segundo modelo que figura como anexo desta orde, e presentarana no rexistro xeral das delegacións provinciais da Consellería de Xustiza, Interior e Relacións Laborais, no da Consellería de Xustiza, Interior e Relacións Laborais ou por calquera outro dos medios a que se refire o artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común, no prazo de 30 días naturais, contados a partir do seguinte ó da publicación desta orde no Diario Oficial de Galicia.

2. A asociación de veciños peticionaria xuntará á solicitude a seguinte documentación:

a) Fotocopia da tarxeta de identificación fiscal da asociación.

b) Memoria explicativa das obras que se pretenden realizar e da súa necesidade.

c) Orzamento detallado.

O defecto na solicitude seralles notificado ós interesados pola correspondente delegación provincial desta consellería, e daráselles un prazo de dez días para emenda-los erros ou omisións. Transcorrido o dito prazo, se non se producise a dita emenda, as peticións serán arquivadas sen máis trámite na correspondente delegación provincial da Consellería de Xustiza, Interior e Relacións Laborais.

Artigo 4º.

Recibidas as solicitudes de subvención e a súa documentación, serán analizadas polos servicios competentes das delegacións provinciais da Consellería de Xustiza, Interior e Relacións Laborais, e os delegados provinciais elevaranlle o correspondente informe ó director xeral de Xustiza e Interior. Visto o informe o director xeral

de Xustiza e Interior elevará proposta ó conselleiro de Xustiza, Interior e Relacións Laborais quen resolverá.

A resolución notificaráselles a tódolos beneficiarios da subvención, por calquera medio que permita ter constancia da recepción polo interesado ou o seu representante, así como da data, a identidade e o contido da resolución. No caso de que, transcorridos tres meses desde o remate do prazo de presentación de solicitudes, non se comunicará a concesión da subvención, entenderase desestimada.

Artigo 5º.

Na valoración das solicitudes presentadas polas asociacións de veciños teranse en conta os seguintes aspectos:

a) Importancia e interese da obra que se vai realizar.

b) Carencia de medios económicos e imposibilidade ou probada dificultade de obter canles de financiamento por outros medios.

c) A poboación e extensión do termo municipal.

d) Proxección social das obras propostas.

Artigo 6º.

1. Os beneficiarios das subvencións, unha vez aceptadas estas, quedarán obrigados a destina-los fondos percibidos ó obxecto concreto para o que foron concedidos. As delegacións provinciais da Consellería de Xustiza, Interior e Relacións Laborais poderán comprobar, cando o consideren conveniente, a execución dos proxectos subvencionados.

2. Os beneficiarios da subvención presentarán facturas orixinais por triplicado nas delegacións provinciais correspondentes antes do 15 de setembro de 1995, inescusablemente. As delegacións provinciais, de atopalas conformes, remitirannas á Dirección Xeral de Xustiza e Interior que proporá o libramento de fondos.

Artigo 7º.

No caso de que o beneficiario da axuda incumprise algunha das condicións ou obrigas estipuladas, a Consellería de Xustiza, Interior e Relacións Laborais instruirá expediente sancionador, conforme o previsto na vixente Lei 30/1992, do 26 de novembro, de réxime xurídico das administracións públicas e do procedemento administrativo común, e se procede, anulará os beneficios concedidos e, conforme o disposto no artigo 78.6 da Lei 11/1992, do 7 de outubro, solicitará a devolución das cantidades percibidas, se as houbese, xunto cos intereses de demora adebedados polas mesmas, segundo o procedemento que establece o Regulamento xeral de recadación.

Disposicións derradeiras

Primeira.-Facúltase o director xeral de Xustiza e Interior para dictar, no ámbito das súas competencias, as resolucións precisas para o desenvolvemento desta orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Composlela, 10 de xaneiro de 1995.

Juan Miguel Diz Guedes

Conselleiro de Xustiza, Interior e Relacións

Laborais

Director Xeral de Xustiza e Interior.

Delegado Provincial da Consellería de Xustiza, Interior e Relacións Laborais na Coruña.

Delegado Provincial da Consellería de Xustiza, Interior e Relacións Laborais en Lugo.

Delegado Provincial da Consellería de Xustiza, Interior e Relacións Laborais en Ourense.

Delegado Provincial da Consellería de Xustiza, Interior e Relacións Laborais en Pontevedra.