Unha vez aprobado o Programa anual de actividades para o ano 2024 da Academia Galega de Seguridade Pública (Agasp) polo Consello Reitor o 31 de xaneiro de 2024 e de acordo co establecido no artigo 9.2.b) da Lei 1/2007, do 15 de xaneiro, da Agasp, convócanse os cursos de formación continua dirixidos aos/ás policías locais de Galicia, correspondentes ao segundo semestre do ano 2024, cuxas bases e características se especifican nos anexos desta resolución.
A Estrada, 27 de agosto de 2024
Santiago Villanueva Álvarez
Director xeral da Academia Galega de Seguridade Pública
ANEXO I
Bases
Primeira. Destinatarios/as
Poderán participar nos cursos convocados por esta resolución os/as policías locais de Galicia e demais persoal da seguridade pública que traballa nesta comunidade autónoma (da Garda Civil, da Policía Nacional e da Unidade da Policía Autonómica) que se encontre en situación de servizo activo ou excedencia por coidado de familiares.
A baixa laboral por incapacidade temporal impide a participación nas accións formativas convocadas polo que, de se producir esta situación, os/as interesados/as deberán comunicarllo á Agasp de maneira inmediata. No caso de non facelo, serán penalizados coa non participación en accións formativas da Agasp durante un ano, contado desde o día seguinte a aquel en que se teña coñecemento do feito, e no caso de estar a realizar efectivamente un curso, non se emitirá diploma deste.
Será revisable a admisión de persoas en baixa laboral por incapacidade temporal cando esta se deba a un accidente de traballo recoñecido como tal e a asistencia ao curso non interfira na recuperación.
Con carácter xeral, reservarase o 20 % das prazas convocadas para persoal das forzas e corpos de seguridade do Estado que traballen en Galicia, e poderá ser superada a devandita porcentaxe no suposto de quedaren prazas vacantes.
Así mesmo, en caso de haber prazas vacantes, poderá acceder aos cursos convocados a través desta resolución o persoal dependente da Axencia Galega de Emerxencias e do Centro Integrado de Atención ás Emerxencias-112 Galicia.
Se as solicitudes para participar nun curso non superan as 10 persoas, a Agasp reserva para si a facultade de anular a actividade formativa.
Segunda. Solicitudes
1. O persoal que desexe participar nos cursos convocados nesta resolución deberá cubrir o formulario de matrícula telemática dispoñible na páxina web da Agasp (htpp://agasp.xunta.es). Non se admitirá ningunha outra forma ou modelo de solicitude.
É preciso que todas as persoas que desexen participar en cursos da Agasp manteñan actualizados os seus datos persoais, especialmente a conta de correo electrónico e o teléfono móbil, co obxecto de posibles comunicacións. No suposto de non seren correctos ou exactos os ditos datos, a Agasp non é responsable dos posibles prexuízos causados aos/as interesados/as.
2. A falsidade ou ocultación de datos esenciais para a selección das persoas solicitantes dará lugar á exclusión automática do curso solicitado, así como á imposibilidade de participar en ningún outro curso durante o prazo dun ano, computado desde o momento en que se detecte o feito.
3. Serán excluídas automaticamente aquelas solicitudes que non teñan cubertos correctamente todos os datos para realizar a selección do alumnado, non se axusten ao modelo normativizado ou sexan presentadas fóra de prazo.
4. No caso de atoparse nalgún dos supostos que a continuación se indican, o/a solicitante deberá remitirlle á Agasp, no mesmo prazo establecido para o envío da solicitude de inscrición, a certificación orixinal ou fotocopia legalizada que acredite tal situación (non será preciso se tal documentación xa consta en poder da Agasp; neste caso deberá comunicalo na propia solicitude):
a) Profesionais que estean gozando ou gozasen nos dous últimos anos dunha licenza de maternidade, dun permiso de paternidade, dunha redución de xornada ou dunha excedencia por coidado de familiares.
5. Cando o curso para o cal presenta a solicitude requira a presentación de documentación complementaria co obxecto de acreditar circunstancias específicas de acordo cos criterios de selección, deberá remitir tal documentación por correo electrónico (formacion.agasp@xunta.gal) ou segundo o establecido no artigo 16.4 da Lei 39/2015, do 1 de outubro, do procedemento administrativo común das administracións públicas.
6. O prazo de presentación de solicitudes será desde as 8.00 horas do día seguinte ao da publicación desta resolución no DOG ata as 14.00 horas do día 15 de setembro de 2024.
7. O número máximo de cursos que se poden solicitar nesta convocatoria limítase a 5.
No caso de que unha mesma persoa presente máis solicitudes das permitidas, a Agasp de xeito automático elixirá as primeiras cinco accións formativas solicitadas.
8. Non está permitida a realización de cursos que teñan simultaneidade de horarios nunha ou varias sesións presenciais. Cando o alumnado teña coñecemento de que foi seleccionado para un curso que teña coincidencia horaria con outro en que xa foi seleccionado debe renunciar a un deles. No caso de que se comprobe con posterioridade a realización simultánea de varias actividades, non se expedirá certificación de ningunha delas e o/a alumno/a non poderá participar noutros cursos durante un ano desde que se detecte este feito.
A previsión contida neste punto número 8 inclúe as clases de telepresenza dos cursos convocados na modalidade de teleformación deste organismo.
Terceira. Criterios xerais de selección
Os criterios xerais de selección son os que a continuación se indican, sen prexuízo de que para cursos específicos se requiran outros diferentes, o cal se indicará na ficha de cada acción formativa concreta.
1. Menor número de cursos realizados na Agasp nos dous últimos anos.
2. Por orde de inscrición.
Terán preferencia na selección as persoas candidatas que estean gozando ou gozasen nos dous últimos anos dunha licenza de maternidade, dun permiso de paternidade, dunha redución da xornada ou dunha excedencia para o coidado de familiares, sempre que cumpran os requisitos obxectivos para ser destinatarias do curso.
Ademais, de conformidade co establecido no artigo 37.bis da Lei 7/2004, para a igualdade de homes e mulleres, nos cursos, xornadas ou outras actividades formativas organizadas ou financiadas pola Administración pública galega reservarase un 50 % das prazas para mulleres que reúnan os requisitos exixidos na convocatoria.
Cuarta. Admisión
1. A Agasp publicará na súa páxina web a relación de persoas seleccionadas para participar en cada curso, así como un número adecuado de reservas, polo menos 5 días antes do inicio de cada curso.
O alumnado seleccionado será informado da súa selección a través do correo electrónico e da mensaxaría telefónica.
A Agasp reserva para si o dereito de solicitarlles aos concellos de procedencia todos aqueles datos que considere necesarios para a adecuada realización da selección.
2. O alumnado seleccionado só poderá renunciar ao curso por causas de forza maior suficientemente xustificadas ou necesidades do servizo, sempre que se acredite documentalmente o feito alegado polo/a xefe/a do corpo da Policía Local do concello en que traballe ou pola persoa responsable del.
No caso de cambios de cuadrante ou quendas de traballo, deberán quedar acreditados suficientemente os seus motivos e que se coñeceron con posterioridade á solicitude de inscrición no curso.
A renuncia debe ser comunicada por escrito a través do modelo que figura na páxina web da Agasp e cunha antelación de 3 días hábiles ao inicio do curso, co fin de poder cubrir a vacante.
A renuncia non xustificada ou a non acreditación documental da causa que a produce suporá a exclusión da persoa seleccionada nos seguintes dez cursos que convoque o Servizo de Formación en Seguridade Pública da Agasp e en que a persoa figure como posible destinataria, sen contar edicións repetidas, cursos xa realizados e que, como mínimo, teñan a mesma carga horaria do curso polo cal foi penalizada.
Quinta. Asistencia aos cursos
1. É obrigatoria a asistencia con puntualidade a todas as sesións dos cursos.
Durante a realización dos cursos levarase un control permanente da asistencia a través dos sistemas que se establezan para o efecto, e poderanse realizar controis de asistencia extraordinarios.
Unicamente se autorizará a ausencia por causas xustificadas e debidamente acreditadas e, en ningún caso, poderá superar o 10 % das horas lectivas.
A ausencia xustificada superior ao 10 % do total das horas lectivas suporá a perda do dereito á expedición do diploma. No caso de haber unha segunda edición do curso en cuestión, o Servizo de Formación en Seguridade Pública poderá valorar a posibilidade de que o/a alumno/a poida recuperar as horas non realizadas na edición anterior. En todo caso, para poder valorar esta posibilidade non poden transcorrer máis de seis meses entre unha edición e a seguinte.
A falta de asistencia dun número superior ao 10 % das horas lectivas sen xustificación ou a falta de acreditación documental da causa alegada no só dará lugar á perda do dereito ao diploma do curso, senón tamén á penalización coa non participación en cursos da Agasp durante un ano, contado desde o día seguinte ao da finalización do curso.
2. O alumnado asistirá aos cursos co uniforme regulamentario. No caso de non facelo, e de non existir causa suficientemente xustificada, a Agasp poderá impedir a asistencia ao curso e non emitirá diploma nin certificado acreditativo ningún.
En relación cos cursos que se realizarán na modalidade en liña, telepresenza e/ou formación semipresencial:
Todas as edicións dos cursos en liña, de telepresenza e/ou de formación semipresencial que se convocan na presente resolución desenvolveranse da seguinte maneira:
• Lugar: a través da plataforma de formación en liña. Todos os cursos contan cunha proba final presencial na sede da Agasp.
• Estableceranse sesións de videoconferencias ou clases en directo, de obrigada asistencia, e no suposto de non asistir, non se terá por realizado nin superado o curso.
• Horario: segundo a disposición e necesidade do alumnado, agás as clases programadas por videoconferencia, en directo ou presencial na sede da Agasp.
Cuestionarios e tarefas: durante o desenvolvemento dos cursos, o alumnado participante deberá realizar unha serie de cuestionarios e tarefas de acordo cun calendario de presentación; a non realización dalgún deles no prazo establecido será sancionada coa baixa no curso. No caso de que os exercicios non consigan un nivel de exixencia mínimo segundo o criterio do/da profesor/a, faráselle unha primeira advertencia ao alumnado e, de non atender a indicación, poderá ser dado de baixa no curso.
Os cuestionarios, agás a proba presencial final, e as tarefas realizaranse a través da plataforma de formación en liña.
Aquelas actividades recollidas no anexo cuxa modalidade de impartición sexa a formación semipresencial establecerán na plataforma de teleformación o horario das clases presenciais na Agasp.
É obrigatorio conectarse nas clases de telepresenza ou clases en directo con imaxe e son (é dicir, é obrigatorio para acceder a estes cursos dispor dunha cámara web e micrófono ou conectarse a través dun dispositivo móbil). De non facelo, terase como non asistente.
Sexta. Certificación
– Asistencia: poderase obter o certificado de asistencia sempre que se asistise a un mínimo do 90 % das horas lectivas e se xustifiquen documentalmente, no prazo máximo de cinco días hábiles inmediatamente posteriores ao remate do curso, as faltas de asistencia que representen o 10 %.
– Aproveitamento: esta certificación expediráselle exclusivamente ao alumnado que supere as probas que se determinen sobre os coñecementos impartidos en cada curso e se non excede o 10 % de faltas de asistencia xustificadas documentalmente.
Os certificados serán postos á disposición do alumnado no seu espazo persoal da páxina web da Agasp no prazo máximo de dez días hábiles desde o remate de cada curso.
Sétima. Desenvolvemento dos cursos
1. A Agasp poderá suspender a realización das actividades formativas convocadas cando sexa necesario, por motivos técnicos ou por insuficiencia de solicitudes de participación.
2. A Agasp poderá modificar as datas, os horarios, os contidos e o desenvolvemento dos cursos, así como resolver todas as continxencias e incidencias que poidan xurdir.
3. A Agasp poderá programar cursos diferentes cando así o exixan circunstancias que afecten a organización, a xestión e a docencia.
4. A Agasp, como consecuencia da entrada en vigor de novidades lexislativas, de novos procedementos administrativos ou técnicos ou da detección de novas necesidades operativas, poderá formular novas accións formativas.
ANEXO II
|
Denominación da actividade |
Nº de prazas |
Datas |
Nº de horas |
Modalidade |
|
Protección de personalidades |
14 |
7 ao 10 de outubro |
20 |
Presencial |
|
Uso e manexo de arma branca. Edición 1 |
12 |
14 de outubro |
6 |
Presencial |
|
Uso e manexo de arma branca. Edición 2 |
12 |
15 de outubro |
6 |
Presencial |
|
Técnicas, ferramentas e métodos empregados en roubos con forza en inmobles e vehículos. Nivel básico |
20 |
15 ao 17 de outubro |
21 |
Presencial |
|
Procedementos de intervención policial por binomios e equipos |
16 |
21 e 22 de outubro |
16 |
Presencial |
|
Aperturas subrepticias* |
20 |
22 ao 24 de outubro |
21 |
Presencial |
|
Reacción armada e sanitaria como primeiro interveniente. Edición 1 |
16 |
23 e 24 de outubro |
16 |
Presencial |
|
Autoprotección táctica. Edición 1 |
20 |
29 de outubro |
8 |
Presencial |
|
Autoprotección táctica. Edición 2 |
20 |
30 de outubro |
8 |
Presencial |
|
Reacción armada e sanitaria como primeiro interveniente. Edición 2 |
16 |
5 e 6 de novembro |
16 |
Presencial |
|
Tiro policial + Stop the bleed |
25 |
5 e 6 de novembro |
15 |
Presencial |
|
Comunicación de malas novas a persoas afectadas por unha emerxencia. Edición 1 |
20 |
11 de novembro |
7 |
Presencial |
|
Acompañamento a persoas en crise suicida. Edición 1 |
20 |
11 de novembro |
8 |
Presencial |
|
Comunicación de malas novas a persoas afectadas por unha emerxencia. Edición 2 |
20 |
12 de novembro |
7 |
Presencial |
|
Acompañamento a persoas en crise suicida. Edición 2 |
20 |
12 de novembro |
8 |
Presencial |
|
Aperturas dinámicas** |
20 |
19 ao 21 de novembro |
21 |
Presencial |
|
Entrada, progresión e rexistro de inmobles. Nivel 1 |
16 |
21 e 22 de novembro |
16 |
Presencial |
|
Investigación de delitos de odio |
35 |
4 de novembro ao 1 de decembro Clases presenciais: 5, 12, 19 e 26 de novembro |
20 |
Semipresencial |
|
Curso de tecnificación en armas e tiro policial |
12 |
25 ao 27 de novembro |
20 |
Presencial |
|
O réxime xurídico da Policía Local de Galicia |
35 |
7 de outubro ao 1 de novembro |
25 |
En liña |
|
Actualización do Código penal |
35 |
7 ao 31 de outubro |
20 |
En liña + telepresenza |
|
Documentoscopia e falsidade documental |
35 |
7 ao 30 de outubro |
20 |
En liña + telepresenza |
|
Básico de inspección de transportes |
35 |
7 ao 27 de outubro |
20 |
En liña + telepresenza |
|
Análise dos vehículos na mobilidade urbana (VMP) |
35 |
21 de outubro ao 10 de novembro |
20 |
En liña + telepresenza |
|
Inspección de locais |
35 |
31 de outubro ao 14 de novembro |
8 |
En liña |
|
Protección do territorio, patrimonio cultural e ambiente |
35 |
4 ao 30 de novembro |
25 |
En liña + telepresenza |
|
Avanzado en matriculación de vehículos |
35 |
4 ao 25 de novembro |
30 |
En liña + telepresenza |
|
Avanzado en VMP, mobilidade urbana e informe pericial |
35 |
11 ao 30 de novembro |
20 |
En liña + telepresenza |
|
Normativa e metodoloxía na medición do ruido. Operador de sonómetro |
35 |
18 ao 30 de novembro |
20 |
En liña + telepresenza |
* Para realizar este curso é requisito imprescindible ter feito previamente o curso Técnicas, ferramentas e métodos empregados en roubos con forza en inmobles e vehículos. Nivel básico.
** Para realizar este curso é requisito imprescindible ter feito previamente o curso Técnicas, ferramentas e métodos empregados en roubos con forza en inmobles e vehículos. Nivel básico.