Mediante a Orde do 24 de maio de 2024, publicada no Diario Oficial de Galicia núm. 112, do 11 de xuño, convocouse a provisión, polo sistema de libre designación, de catro postos de traballo vacantes na Consellería de Política Social e Igualdade.

De conformidade co establecido no artigo 92 da Lei 2/2015, do 29 de abril, do emprego público de Galicia, e nos artigos 5 a 8 e 25 a 28 do Decreto 151/2022, do 4 de agosto, polo que se aproba o Regulamento dos procedementos de mobilidade do persoal funcionario de carreira da Administración xeral da Comunidade Autónoma de Galicia e das entidades públicas instrumentais integrantes do sector público autonómico, e no uso das atribucións conferidas polo artigo 17.2.c) da citada lei, esta consellería

DISPÓN:

Primeiro. Resolver a convocatoria e adxudicarlle destino ás funcionarias cuxos datos se sinalan no anexo desta orde, seleccionadas conforme o establecido nas bases da convocatoria realizada mediante a Orde da Consellería de Política Social e Igualdade do 24 de maio de 2024, nos postos de traballo que se indican no mesmo anexo.

Segundo. O cesamento no actual destino das funcionarias que obtiveron praza producirase no prazo de tres días, contados a partir do seguinte ao da data da publicación desta orde no Diario Oficial de Galicia.

Se na data en que deben cesar no seu destino as funcionarias están desfrutando un período de licenza, vacacións ou permiso, o prazo para efectualo empezará a contar a partir do día seguinte ao da súa incorporación.

A toma de posesión das prazas adxudicadas deberase realizar no prazo dos tres días seguintes ao do cesamento, se non implica cambio de residencia; no prazo de sete días hábiles, se comporta cambio de residencia, ou dun mes se comporta o reingreso ao servizo activo, conforme o establecido no artigo 8 do Decreto 151/2022, do 4 de agosto.

Terceiro. A xefatura de persoal dos centros onde causen baixa as funcionarias, así como a daquel en que obteñan destino, consignará no título administrativo, dentro do prazo sinalado no punto anterior, as correspondentes dilixencias de cesamento e toma de posesión.

Cuarto. Contra esta orde, que esgota a vía administrativa, as persoas interesadas poderán interpoñer recurso potestativo de reposición, ante esta consellería, no prazo dun mes contado desde o día seguinte ao da súa publicación no Diario Oficial de Galicia, de conformidade co establecido na Lei 39/2015, do 1 de outubro, do procedemento administrativo común das administracións públicas, ou poderán impugnala directamente, ante o xulgado do contencioso-administrativo competente, no prazo de dous meses contados a partir da mesma data, segundo o establecido na Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 12 de xullo de 2024

Fabiola García Martínez
Conselleira de Política Social e Igualdade

ANEXO I

Apelidos e nome	DNI	Grupo	Corpo/ escala	Denominación do posto	Código	Nivel	Centro de destino	Localidade
Castro Paz, Manuela	****4767Y	A2	Corpo facultativo de grao medio, escala de técnicos facultativos, especialidade educadores	Director/a de centro de menores	PS.C99.40.301.32001.001	28	Centro de Menores A Carballeira	Ourense
Basalo Coutado, Ana	****3819N	A2	Corpo de xestión da Administración xeral da Comunidade Autónoma de Galicia	Director/a residencia de maiores	PS.C99.40.801.32001.001	26	Residencia de Maiores Nª Sª dos Miragres (Ourense)	Ourense
Tato Quiroga, Cristina	****0882R	C1	Corpo administrativo da Administración xeral da Comunidade Autónoma de Galicia	Director/a administrador/a	PS.C99.40.801.32190.001	25	Residencia de Maiores (O Carballiño)	O Carballiño
Fernández González, Patricia	****7171A	C1	Corpo administrativo da Administración xeral da Comunidade Autónoma de Galicia	Director/a administrador/a	PS.C99.40.801.32230.001	25	Residencia de Maiores (Castro Caldelas)	Castro Caldelas